يالىموۆا زۋحرا ءشارىپ قىزى اۋقاتتى تاتار كوپەسى ءشارىپ (شاريف) يالموۆتىڭ قىزى. ونىڭ وتباسى اقمولا وبلىسىندا تۇرعان. اناسى تۋبەركۋلەز دەرتىنەن ەرتە قايتىس بولعاننان كەيىن، اكەسى بىردەن ەكىنشى رەت ۇيلەنەدى. وگەي شەشەسىمەن ءتىل تابىسا الماعان زۋحرا 13 جاسىندا ۇيىنەن كەتىپ قالادى. ءوز بەتىنشە وقۋ وقىعان قىز جۇمىس ىستەيتىن جەرى بەرگەن جاتاقحانادا تۇرعان.
زۋحرا ءشارىپ قىزى ورتا-ءبىلىمدى، ەسەپشى - ەكونوميست ماماندىعىن العان. سوعان قاراماستان، تاريحي كىتاپتاردى كوپ وقىعان. زۋحرانى بىلەتىندەردىڭ ايتۋىنشا، ول باسقا ايەلدەر سەكىلدى التىن بىلەزىك، القاعا قىزىقپاي، ءدىني كىتاپتاردى جيناپ، قاسيەتتى قۇراندى قاستەرلەپ ۇستاعان.
ساياساتكەر زۋحرامەن 1937-جىلى بىرنەشە كۇنگە الماتىعا كەلگەندە تانىسقان. ونىڭ ينستيتۋتتاعى دوسى ماقسۇت باقايەۆ زۋحرامەن بىرگە تۇراتىن ايەلىنە حات بەرىپ جىبەرۋدى وتىنگەن. ولار وسىلايشا تانىسىپ، ءوزارا حات جازىسىپ جۇرەدى. 1939-جىلى ديماش احمەت ۇلىن ريددەرگە اۋىستىرۋعا شەشىم قابىلايدى. وسى كەز ول زۋحراعا كەلىپ: «مۇمكىن، سەن مەنىمەن بىرگە بارارسىڭ؟» - دەگەن.
ديماش جارىنا ۇيلەنۋ تۋرالى ۇسىنىستى وسىلايشا جاساعان.
جاس جۇبايلار ۇيلەنۋ تويلارىن قونايەۆتىڭ ۇلكەن اپكەسى ءامينانىڭ ۇيىندە وتكىزەدى. تويدان كەيىن ولار بىردەن ريددەرگە كەتكەن. ەكەۋىنىڭ ونداعى ءومىرى قيىندىققا تولى بولعان. ديماشتىڭ اپكەسى «ريددەرگە ولار العاش بارعاندا ەكەۋىنىڭ كۇنكورىستەرى زۋحرا ساۋاتىن ءبىر سيىر عانا بولعان»، - دەپ ايتقان ەستەلىكتەرىندە.
«ديماش احمەت ۇلى، ءوزى ايتپاقشى تۇپ-تۋرا 50 جىل 6 اي 2 كۇن وتاسقان جۇبايى زۋحرا ءشارىپ قىزىنا دەگەن ماحابباتىن ءومىر بويى جانىنا جالاۋ عىپ وتكەن، ولە-ولگەنشە سىيلاسقان.
كىشىپەيىل دە، جايدارى زۋھرا ءشارىپ قىزى «ۇلىقتىڭ» ايەلىمىن دەپ كەرگۋدى بىلمەگەن. كوپشىلدىگىمەن، قوناقجايلىعىمەن اعايىن-تۋىس پەن دوس-جاراننىڭ كوڭىلىن تابا بىلگەن.
قايىن اتاسى مەڭدىاحمەتتىڭ دارەت الار سۋىنا دەيىن جىلىتىپ بەرەتىن ادەتىنەن بىردە- ءبىر رەت جاڭىلماعان يبالى مىنەزىمەن اتا-ەنەسىنە، ەلىنە جاققان سىيلى كەلىن بولعان. زۋحرا ءشارىپ قىزىنىڭ وزىنە ادال جار بولعانىن ەسكە العان ديمەكەڭ باسىنا قارا بۇلت ۇيىرىلگەن كەزدەرگە وي جۇگىرتە وتىرىپ: «ەسەپ قىزمەتكەرلەرىنىڭ تابيعاتى بولەك قوي. مارقۇم زۋحراش مەن تاڭعالعان ءبىر ءىس جاسادى. جىلدار بويى العان زاتىنىڭ ەسەبىن جۇرگىزىپ وتىرىپتى. نە السا دا اقشاسىن تولەپ، كۆيتانتسياسىن ساقتاپ كەلىپتى. ءتىپتى باعاسىنا دەيىن كورسەتىلىپ، ساتىپ العاندىعىن راستايتىن اتى-ءجونى مەن قولىن قويدىرىپ وتىرىپتى. ماعان اراشا تۇسكەن ەڭ باستى قۇجاتتار وسى بولدى»، - دەگەن ەكەن.
ءوز پەرزەنتىنىڭ بولماعانىنا قاراماستان، ديمەكەڭ بالا كورسە ەركەلەتكىسى كەلىپ تۇراتىن وتە باۋىرمال ادام بولىپتى. سودان دا ءىنىسىنىڭ بالالارىن اكەلىك مەيىرىممەن باۋىرىنا باسقان، ولاردىڭ جانە باسقا دا ءىنى-قارىنداستارىنىڭ وقىپ، ءبىلىم الۋىنا، دۇرىس تاربيەلەنۋىنە سەبەپشى بولىپ وتىرعان»، - دەپ جازادى سەرىك ءابدىرايىم ۇلى «بەس مۇشەل بەلەسىندە» كىتابىندا.
زۋحرا كوز جۇمار الدىندا جارى دىنمۇحاممەدكە باقيلىقتا دا وزىمەن ءبىر جەردە بولۋىن وتىنگەن.
«سەنىڭ اتاعىڭ الىسقا كەتكەن، كەزىندە ەل سۇراعان ادامسىڭ. ساياساتقا جىعىپ، باسقا ءبىر جەرگە الا قاشىپ جۇرە مە؟ مەنىڭ ماڭگىلىك ۇيقىم تىنىش بولسىن دەسەڭ، باقيلىق عۇمىرىڭدا دا قاسىمدا بولشى»، - دەگەن ول.
ايتا كەتەيىك، دىنمۇحاممەد قونايەۆ 1991-جىلدىڭ ءساۋىر ايىندا زۋحرانىڭ كوك تاسىن ورناتىپ، جىلىن وتكىزگەننەن كەيىن قۇسالىقتان ەكى جەتى بويى ۇيدەن شىقپاي وتىرىپ العان دەسەدى.