زەينەپ ءازىمباي قىزى بوكستان ەل چەمپيونى اتاندى - Kaznews
ۇلانباتىر قالاسىندا بوكستان ەرەسەكتەر اراسىنداعى ەل بىرىنشىلىگىنىڭ فينالدىق ويىندارى ءوتتى. قىزدار اراسىنداعى باسەكەدە 81 كەلى سالماقتا ونەر كورسەتكەن زەينەپ ءازىمباي قىزى رينگدە قارسىلاسى ۋۆس ايماعىنىڭ سپورتشىسى د. ودونزاياانى باسىمدىقپەن ۇتىپ، ەل چەمپيونى اتاندى، دەپ حابارلايدى موڭعوليالىق Kaznews اقپاراتتىق پورتالى.
اتالعان ب ا ق-تىڭ دەرەگىنشە، زەينەپ ءازىمباي قىزى بۇعان دەيىن جاستار اراسىنداعى ەل بىرىنشىلىگىندە چەمپيون اتانعان بولاتىن. سونىمەن قاتار، ەرلەر اراسىنداعى باسەكەدە 67 كەلى سالماق دارەجەسىندە ونەر كورسەتكەن جاندوس اسقار ۇلى قولا جۇلدەگەر اتانسا، 92 كەلى سالماق دارەجەسىندە ونەر كورسەتكەن بەكنۇر قالي ۇلى كۇمىس جۇلدە جانە بۇل سالماقتا ونەر كورسەتكەن ەربولات تولەك ۇلى قولا جۇلدەگەر اتانعان.
وزبەكستان جۇكتەردى اقتاۋ تەڭىز پورتى ارقىلى تاسىمالدايتىن بولادى - «ءو ز ا»
قازاقستانداعى اقتاۋ تەڭىز پورتىنىڭ باسشىلىعى وزبەكستاندىڭ كومپانيالاردىڭ جۇكتەرىن تاسىمالداۋ ءۇشىن ءوتىنىم قابىلداۋعا دايىن. «Dunyo» اگەنتتىگىنىڭ حابارلاۋىنشا، وزبەكستاننىڭ اقتاۋداعى باس كونسۋلى مەن «اقتاۋ تەڭىز ساۋدا پورتى» باسشىلىعىنىڭ كەزدەسۋىندە وسىنداي كەلىسىم جاسالعان، دەپ جازادى «ءو ز ا» مەملەكەتتىك اقپارات اگەنتتىگى.
كەزدەسۋدە پورت ارقىلى وزبەكستان ونىمدەرىن الىس-جاقىن شەتەلدەرگە ەكسپورتتاۋ ماسەلەلەرى تالقىلانعانى ايتىلادى.
ايتا كەتەيىك، اقتاۋ تەڭىز پورتى ارقىلى ازەربايجان، يران، رەسەي جانە تۇركىمەنستانعا تىكەلەي شىعۋ مۇمكىندىگى بار. سونداي- اق پورت ارقىلى تەڭىزدەن وتكەننەن كەيىن باسقا ەلدەردىڭ اۋماعى ارقىلى تۇركيا مەن تاياۋ شىعىسقا شىعۋعا بولادى.
قازاقتىڭ ءداستۇرلى سۇيەك ويۋى ونەرىنىڭ مۇراگەرى گىمىڭ نۇرەكە ۇلى - «حالىق گازەتى»
قازاقتىڭ سۇيەك ويۋى - اۆتونوميالىق ولكە دەڭگەيىندەگى ماتەريالدىق ەمەس مادەني مۇرالار تىزىمىنە ەنگىزىلگەن، كوشپەلىلەردىڭ كوركەمدىك مادەنيەتىن كورسەتەتىن قازاقتىڭ ءداستۇرلى حالىق قولونەرى بولىپ تابىلادى. التاي ايماعى، جەمەنەي اۋدانىندا تۇراتىن گىمىڭ نۇرەكە ۇلى سۇيەك ويۋى ونەرىنىڭ ءۇشىنشى ۇرپاق مۇراگەرى، دەپ حابارلايدى قىتايدىڭ «حالىق گازەتى». ونىڭ بۇل ونەرگە مۇراگەرلىك ەتىپ، بىرگە دامىتاتىن كوپتەگەن شاكىرتتەرى بار.
گىمىڭنىڭ ۇلى دا سولاردىڭ ءبىرى. گىمىڭ نۇرەكە ۇلىنىڭ ءداستۇرلى سۇيەك ويۋ ونەرىن قالاشىقتاعى ساياحات تۇيىندەرى قولداپ، تەگىن ورىندار مەن جابدىقتاردى قامتاماسىز ەتىپ قانا قويماي، سونىمەن قاتار سۇيەك ويۋ جۇمىستارىن تۋريستىك ورىنداردا كورسەتۋگە جانە ساتۋعا مۇمكىندىك بەرگەن. «قازاقتىڭ بۇل ۇلتتىق ونەرى ولاردىڭ ءوتباسىنىڭ تابىسىنا عانا ەمەس، سۇيەك ويۋ ونەرىنىڭ تانىمال بولۋىنا جانە دامۋىنا جاقسى ىقپال ەتتى»، دەپ جازادى قىتايدىڭ «حالىق گازەتى» اقپاراتتىق پورتالى.
موڭعوليا پرەزيدەنتى قازاق حالقىنا التاي قىرانىنداي رۋح تىلەدى - Kaznews
قازاق حالقىنىڭ كوكتەم مەرەكەسى - ناۋرىز مەيرامىنا وراي موڭعوليا پرەزيدەنتى ۋ. ءحۇرەلسۇح جارلىق شىعارىپ، ەلىنىڭ دامۋىنا ەرەكشە ۇلەس قوسقان ءبىرقاتار ازاماتتاردى مەملەكەتتىك جوعارى اتاق، وردەن، مەدالدارمەن ماراپاتتاپ، ولاردىڭ وتباسى، بالالارىن، تۋعان- تۋىستارىن قۇتتىقتاپ، قازاق حالقىنا باقىت، ەڭبەگىنە تابىس، التاي قىرانىنداي رۋح تىلەدى، دەپ حابارلايدى Kaznews اقپارات اگەنتتىگى.
موڭعوليالىق ب ا ق-تىڭ دەرەگىنشە، موڭعوليا پرەزيدەنتى ناۋرىز مەيرامىنا وراي ءبىر قاتار قازاق ۇلتىنان شىققان ۇزدىكتەردى مەملەكەتتىك سىيلىقتارمەن ماراپاتتادى.
اتاپ ايتار بولساق، موڭعوليا ۇلتتىق ۋنيۆەرسيتەتىنىڭ عىلىم مەكتەبىنىڭ بيولوگيا كافەدراسىنىڭ كەڭەسشى ۇستازى، Ph.D.، ۇلىقپان كامان ۇلى جانە نالايح اۋداندىق اعا مۇعالىمدەر قاۋىمداستىعىنىڭ باسقارما مۇشەسى ريزاگۇل قاليدولدوي قىزى «ەڭبەك سىڭىرگەن ۇستاز» اتاعىمەن ماراپاتتالدى.
«داستان» جاۋاپكەرشىلىگى شەكتەۋلى سەرىكتەستىگىنىڭ كەڭەسشىسى جانە عىلىمي قىزمەتكەرى ەتەكباي تاتە ۇلىنا «ەڭبەك سىڭىرگەن مادەنيەت قايراتكەرى» اتاعى بەرىلدى.
اۆتوترانسپورت ۇلتتىق ورتالىعى ديرەكتورىنىڭ ورىنباسارى، ەكس ايماق اكىمى عىلىمحان ءايىپ ۇلى ەڭبەك سىڭىرگەن ەكونوميست اتاندى.
سونداي-اق، «ميات» مەملەكەتتىك قازىناداعى كاسىپورىننىڭ ۇشۋ بولىمشەسىنىڭ باستىعى، ۇشقىش اۋەز تاشتۋان ۇلى «ەڭبەك سىڭىرگەن ۇشقىش» اتاعىن الدى. ال نالايح اۋدانىنىڭ 4-اۋىلىنىڭ قوعامدىق حۋرالىنىڭ ءتوراعاسى راحمان جاناربەك، سونگينوحايرحان اۋدانىنىڭ «بۋيانت- مانال» وتباسىلىق دەنساۋلىق ورتالىعىنىڭ دارىگەرى ەركەجان سەيىل جانە «پرينسەسس» اۋرۋحاناسىنىڭ باس دارىگەرى جانبولات تىلەۋبەك «ەڭبەك قۇرمەت» مەدالىمەن ماراپاتتالعان.
ناۋرىز دەمالىسىن تۇركيادا وتكىزۋ ءۇشىن كەلدى - TRT
ناۋرىز مەرەكەسىندە بەرىلگەن دەمالىستى تۇركيادا وتكىزۋ ماقساتىمەن يراننىڭ كوپتەگەن ازاماتى ۆان قالاسىنا كەلدى. ولار تۇركيانى سونىمەن بىرگە مۇرىنعا ەستەتيكالىق وتا جانە شاش ەگۋ ءۇشىن دە تاڭدايدى، دەپ حابارلايدى «تۇركيا راديو تەلەديدار» اقپاراتتىق اگەنتتىگى.
اتالعان ب ا ق-تىڭ كەلتىرگەن دەرەگىنە سۇيەنسەك، 13 كۇندىك دەمالىستا تۇركيانى تاڭداعان تۋريستەر قۇرلىق جولىمەن ۆاننىڭ ساراي اۋدانىنداعى شەكارا قاقپاسىنان كىرەدى. ۆان قالاسىندا قوناقۇيلەرگە جايعاسقان يراندىق تۋريستەر كۇندىز قالانىڭ كورنەكتى جەرلەرىن ارالاپ، كەشكە ساۋدا جاسايدى. تۇندە ويىن-ساۋىققا ۋاقىت بولەدى.
«يراندىق تۋريستەر كوبىنە تەكستيل، كوسمەتيكالىق ونىمدەر، اشەكەي، اياقكيىم ساتىپ الۋدا. ولار تۇركيانى سونىمەن بىرگە مۇرىنعا ەستەتيكالىق وتا جانە شاش ەگۋ ءۇشىن دە تاڭدايدى. تۋريستەر ءۇشىن ۆان اكىمدىگى مەن قالالىق مۋنيتسيپاليتەت باسشىلىعى «ۆان ساۋدا فەستيۆالىن» وتكىزۋدە. جەرگىلىكتى ۇكىمەتتىك ەمەس ۇيىمدار جانە كاسىپكەرلەردىڭ دە قولداۋىمەن ۇيىمداستىرىلعان فەستيۆال 15-ناۋرىز كۇنىنەن 29-ناۋرىزعا دەيىن اشىق» ، دەپ جازادى TRT.
قازاقستان مەن وزبەكستان COVID سەرتيفيكاتىن ءوزارا تانيتىن بولدى - «ءو ز ا»
وزبەكستان مەن قازاقستان COVID-19 ەكپە سەرتيفيكاتتارىن تانۋ تۋرالى كەلىسىمگە كەلدى. سانيتارلىق- ەپيدەميولوگيالىق قىزمەتتىڭ حابارلاۋىنشا، تاراپتار ۆاكسيناتسيا سەرتيفيكاتى بولعان كەزدە پ ت ر تەستىنىڭ تەرىس ناتيجەسىن تالاپ ەتپەيدى. سونداي-اق، 5 جاسقا دەيىنگى بالالارمەن بىرگە جۇرەگەن ازاماتتار ءۇشىن ۆاكسيناتسيا سەرتيفيكاتتارى بولعان جاعدايدا پ ت ر تەستىلەۋىنىڭ سەرتيفيكاتىن كورسەتۋ تالاپ ەتىلمەيدى.
بۇل تۋرالى وسى اپتانىڭ باسىندا وزبەكستاننىڭ «ءو ز ا» مەملەكەتتىك اقپارات اگەنتتىگى حابارلاعان بولاتىن.
اتالعان ب ا ق-تىڭ دەرەگىنشە، 5 جاستان اسقان بالالار، وزىمەن بىرگە جۇرگەن ازاماتتاردىڭ ۆاكسيناتسيا سەرتيفيكاتتارى بار-جوعىنا قاراماستان، پ ت ر تەستتىڭ ناتيجەسىن كورسەتۋى كەرەك. جوعارىدا اتالعان كەلىسىم 2022 -جىلدىڭ 18-ناۋرىزىندا كۇشىنە ەندى.
ايتا كەتەيىك، بۇعان دەيىن، وزبەكستان مەن تۇركيا ەكى ەلدىڭ قۇزىرلى ورگاندارى بەرگەن COVID-19-عا قارسى ۆاكسيناتسيانى راستايتىن رەسمي سەرتيفيكاتتاردى ءوزارا تانيتىنى حابارلانعان ەدى.
اۆتور: بەيسەن سۇلتان ۇلى