«ءبىزدىڭ اۋىل شارۋاشىلىعى تاۋارىن وندىرۋشىلەرگە جىلىنا 800 مىڭ توننا جانارماي كەرەك. ارينە، ەگىس جانە وراق ناۋقاندارى بار. ارتىلعان كولەمگە قاتىستى ايتساق، ءبىرشاما جاقسى مولشەر بار. قىركۇيەك ايىندا مولشەرلەمەلەر تومەندەي باستادى دا، تاپشىلىق پايدا بولدى. قازان ايىنان باستاپ ارتىلعان كولەمنىڭ مولشەرى وسە باستادى جانە بۇگىندە بىزدە 240 مىڭ توننادان اسىپ وتىر. بۇل جانارمايمەن قامتاماسىز ەتۋدە ەشقانداي قيىندىقتار بولدىرماۋ ءۇشىن جەتكىلىكتى كولەم»، - دەدى ماعزۇم مىرزاعاليەۆ ورتالىق كوممۋنياتسيالار قىزمەتىندە وتكەن بريفينگىندە.
سونداي- اق، ول، جانار- جاعارماي باعاسى مۇنايدىڭ باعاسىنا تىكەلەي بايلانىستى ەكەنىن ەسكە سالدى.
«باعاعا كەلەتىن بولساق، مەنىڭ ويىمشا، بۇگىنگى تاڭدا جانار- جاعار ماي باعاسىنىڭ قىمباتتاۋىنا نەگىز بولاتىن ۇلكەن العىشارتتار جوق. دەگەنمەن، جانار- جاعارماي باعاسىنىڭ قالىپتاسۋىنا مۇناي باعاسى دا اسەر ەتەتىنىن ايتۋ كەرەك. كەيىنگى اپتادا ءبىر باررەل مۇنايدىڭ باعاسى % 10 نەمەسە 71 دوللاردان 78 دوللارعا دەيىن وسكەنىن كورىپ وتىرمىز. سوندىقتان جانار- جاعار ماي باعاسىن بولجاۋ - بەرەكەسىز شارۋا. ويتكەنى ءبىز مۇناي باعاسىنىڭ قالاي بولاتىنىن بىلمەيمىز»، - دەپ ءتۇسىندىردى ەنەرگەتيكا ءمينيسترى.
ورتالىق كوممۋنيكاتسيالار قىزمەتىندە وتكەن بريفينگىدە ق ر ەنەرگەتيكا ءمينيسترى ماعزۇم مىرزاعاليەۆ ەۋرازيالىق ەكونوميكالىق وداق نارىعىنىڭ قازاقستانداعى ديزەل باعاسىنا قالاي اسەر ەتىپ وتىرعانىن ايتتى.
«2025 -جىلعا دەيىن ەۋرازيالىق ەكونوميكالىق وداقتاعى كورشى ەلدەرمەن سالىستىرعاندا جانارماي باعاسىندا ايتارلىقتاي ايىرماشىلىق بولماۋعا ءتيىس. ۇلكەن ايىرماشىلىق بولسا، بىردەن جانار- جاعارماي تاپشىلىعى بايقالادى. وعان بيىل بولعان فاكتىلەر دالەل. مىسالى، تامىز، قىركۇيەك ايلارىندا ديزەل تاپشى بولدى. سول كەزدەگى ديزەلدىڭ كورشى ەلدەردەگى باعاسىنا قاراساق، ۇلكەن ايىرماشىلىق بولعان»، - دەدى ۆەدومستۆو باسشىسى.
اتالمىش ۇستانىمىن ول مىناداي فاكتىلەرمەن ءتۇسىندىردى.
«سول كەزدە ديزەلدىڭ ورتاشا باعاسى ەلىمىز بويىنشا - 200 تەڭگە بولسا، وزبەكستاندا - 380 تەڭگە، رەسەي فەدەراتسياسىندا - 300 تەڭگە، قىرعىزستاندا - 320-330 تەڭگە بولىپ تۇردى. تاپشىلىقتى جويۋ ماقساتىندا 280 مىڭ توننا ديزەل يمپورتتالدى (ەاەو وزگە ەلدەرىنە قازاقستاننان - رەد. ). ارينە، باعاسى دا كوتەرىلدى. قازىر ورتاشا باعا 245 تەڭگە بولىپ تۇر. وسىنداي باعا ورناتقاننان كەيىن ەشقانداي ءبىر تاپشىلىق جانە كولەڭكەلى يمپورت (ەاەو وزگە ەلدەرىنە قازاقستاننان - رەد.) بايقالىپ جاتقان جوق»، - دەدى مينيستر.
اۆتور: ەسىمجان ناقتىباي