ەلورداداعى ۇلتتىق اكادەميالىق كىتاپحانادا ءوتىپ جاتقان «شىعىستىڭ شوقجۇلدىزدارى» اتتى حالىقارالىق كونفەرەنسيادا ق ر پارلامەنتى ءماجىلىسىنىڭ دەپۋتاتى، فيلولوگيا عىلىمدارىنىڭ دوكتورى ساۋىتبەك ابدراحمانوۆ وسىنداي وي ايتتى، دەپ حابارلايدى قازاقپارات ءتىلشىسى.
ءماجىلىس دەپۋتاتى ءسوز بارىسىندا قازاقستان تاۋەلسىزدىك الماي تۇرعان شاقتا تۇركياداعى يۋنۋس ەمرەنىڭ مەرەيتويىنا بارىپ، باۋىرلاس ەلدەردىڭ مادەنيەتى الشاقتاپ كەتكەنىنە قىنجىلىپ ورالعانىن ەسكە الدى. ايتۋىنشا، ازاتتىقتىڭ ارقاسىندا ۋاقىتقا كەتكەن سول ەسە قازىر قايتىپ وتىر.
«2021 -جىل ازەربايجاندا نيزامي جىلى دەپ جاريالاندى. ازەربايجان باۋىرلار وسى نيزامي جىلىنا ۇلكەن تابىسپەن كەلدى. ەكىنشى قاراباق سوعىسى جەڭىسپەن اياقتالىپ، نيزاميدىڭ تۋعان قالاسى گيانجى ازات ەتىلىپ، نيزامي جىلى سول شاھاردا تويلاندى. بۇل ءبارىمىز ءۇشىن ۇلكەن قۋانىش. نيازميدىڭ قازاق پوەزياسىنا، سونىڭ ىشىندە ابايعا قانداي ىقپال جاساعانىن ايتپاي كەتۋگە بولمايدى. اباي «ەسكەندىر» پوەماسىن ءنيزاميدىڭ ۇلگىسى بويىنشا جازعان»، - دەدى عالىم.
سونداي-اق ول نيزامي مۇراسى ۇلى اقىن الىشەر ناۋايدىڭ قالىپتاسۋىنا دا ىقپال ەتكەنىن اتادى. «ناۋاي ءنيزاميدىڭ ۇلگىسىندە بەس داستان جازىپ شىققان. ناۋايدىڭ ۇلى ەڭبەگى - پارسى ءتىلىنىڭ باسىمدىعىن ىعىستىرىپ، تۇركى تىلىندە دە جىر تولعاۋعا بولاتىنىن، تۇركى ءتىلىنىڭ پوەزيالىق كەرەمەت كەمەلدىگىن العاش رەت اشىپ كورسەتتى. وسىنداي ەرلىكتى كەيىن پۋشكين دە قايتالادى»، - دەدى دەپۋتات. ساۋىتبەك ابدراحمانوۆ قازىرگى گەوساياسي جاعداي ۋشىعىپ تۇرعان زاماندا تۇركى مەملەكەتتەرىنىڭ حالىقارالىق ۇيىم اياسىندا توپتاسۋى ساتىمەن كەلگەن ءىس ەكەنىن اتاپ ءوتتى.
«دۇنيە تاعى دا دۇبىرلەپ تۇر. كەڭەس وداعى ىدىراپ، سوتسياليستىك لاگەر تاراعاننان كەيىن ازداعان جىلدار ىشىندە ءبىر پوليارلى بولۋعا بەت الىپ كورگەن الەم قايتادان بيپوليارلى بولۋعا اينالىپ بارادى. قىرعي- قاباق سوعىس قاتەرى تونە باستاعانىن ءبارىمىز بايقاپ وتىرمىز. وسىنداي كۇردەلى كەزەڭدە الەمدەگى كۇشتەردىڭ بالانسى قايتادان سالماقتالا باستاعان شاقتا ءدىنى ءبىر، ءتىلى ءبىر تۇركى الەمىنىڭ تۇتاستىعى قاي كەزدەگىدەن دە ماڭىزدى ەكەنىن ايتۋدىڭ ءوزى ارتىق. تۇركى كەڭەسىنىڭ تۇركى تىلدەس مەملەكەتتەردى بىرىكتىرەتىن حالىقارالىق ۇيىمعا اينالۋى ۋاقىت العا قويىپ وتىرعان سىن-قاتەرلەرگە لايىقتى جاۋاپ بەرۋدىڭ ءىرى تالپىنىسى دەپ بىلەمىز. تۇركى مەملەكەتتەرى ۇيىمنىڭ ومىرشەڭدىگىنىڭ باستى كەپىلدەرىنىڭ ءبىرى - ءدىن ورتاقتىعىنىڭ، ءتىل ورتاقتىعىنىڭ ءدىل ورتاقتىعىنا ۇلاسۋى. بۇل ىستە، ارينە، مادەنيەتتىڭ الار ورنى بولەكشە.
جالپى جاقسى كورۋ جاقسى بىلۋدەن باستالادى. جاقسى ءبىلۋ جاقىن تانىسۋدان باستالادى.
جاقىن تانىسۋ اۋدارمادان باستالادى. سوندىقتان بۇگىنگى ءىس- شارانى حالىقارالىق تۇركى اكادەمياسىنىڭ «شىعىستىڭ شوقجۇلدىزدارىن» جارقىراتا كورسەتۋ عانا ەمەس، تۇركى تۇتاستىعىنا سەپتەسەتىن ناقتى قادام دەپ باعالاۋعا بولادى»، - دەدى ول.
اۆتور: ەسىمجان ناقتىباي