بۇل تۋرالى دەنساۋلىق ساقتاۋ ءمينيسترى الەكسەي سوي مالىمدەدى.
«بالالاردى ۆاكسينالاۋ بۇرىننان وقۋ ورنىندارىنداعى ەگۋ پۋنكتتەرىندە، ياعني ءبىلىم بەرۋ ۇيىمدارىندا جۇرگىزىلەدى. COVID-19-عا قارسى ۆاكسيناتسيا ءبىلىم بەرۋ ۇيىمدارىندا جانە رەسپۋبليكانىڭ ەگۋ پۋنكتتەرى جەلىسىندە دە جۇرگىزىلدى. ۆاكسينالاۋ اتا-انالاردىڭ نەمەسە كامەلەتكە تولماعاندار مەن جاسوسپىرىمدەردىڭ باسقا دا زاڭدى وكىلدەرىنىڭ ەرىكتى تۇردە كەلىسىمىنەن كەيىن عانا جۇزەگە اسادى»، - دەدى سوي ۇكىمەت وتىرىسىندا.
ول پرەمەر- مينيستردەن وبلىستاردىڭ، الماتى، نۇر-سۇلتان جانە شىمكەنت قالالارىنىڭ اكىمدىكتەرىنە مينيسترلىكتەرمەن بىرلەسىپ، پەداگوگتەردى، كامەلەتكە تولماعانداردىڭ اتا-انالارى مەن وزگە دە زاڭدى وكىلدەرىن، جاسوسپىرىمدەردى كوروناۆيرۋسقا قارسى ۆاكسينالاۋ ماسەلەلەرى بويىنشا حاباردار ەتۋدى، سونداي- اق ەگۋ پۋنكتتەرىن سانيتاريالىق قاعيدالارعا سايكەس دايىنداۋدى، ۆاكسينانىڭ ءبىرىنشى پارتياسى كەلىپ تۇسكەنگە دەيىن مۇزداتقىش جابدىق ورناتۋدى، ۆاكسينالاردى تاسىمالداۋ، ساقتاۋ جانە قولدانۋ قاعيدالارىن ساقتاۋدى، مەديتسينا قىزمەتكەرلەرىن دايارلاۋدى قامتاماسىز ەتۋدى تاپسىرۋدى سۇرادى.
ەسكە سالايىق، بالالارعا Pfizer ۆاكسيناسى سالىنادى.
«بالالاردىڭ، جۇكتى جانە بالا ەمىزەتىن ايەلدەردىڭ كوروناۆيرۋس ينفەكسياسىنا قارسى ۆاكسينا الۋىنا مۇمكىندىك بەرۋ ءۇشىن 4 ميلليون 230 دوزا ۆاكسينا ساتىپ الىندى، بۇل 2 ميلليون 115 مىڭ ادامدى قامتۋعا مۇمكىندىك بەرەدى. ۆاكسينانى 12 دەن 17 جاسقا دەيىنگى بالالار، جۇكتىلىكتىڭ 16-37 اپتاسى مەرزىمىندەگى جۇكتى ايەلدەر جانە بوسانعاننان كەيىن 42 كۇننەن كەيىن بالا ەمىزەتىن ايەلدەر سالدىرا الادى. 15-قاراشاعا دەيىن Comirnaty Pfizer ۆاكسيناسىنىڭ العاشقى پارتياسىن 379 مىڭ دوزا كولەمىندە جەتكىزۋ جوسپارلانىپ وتىر»، - دەپ اتاپ ءوتتى مينيستر.