بۇل تۋرالى قازاقستان مۇسىلماندارى ءدىني باسقارماسىنىڭ ءتوراعاسى، ەلىمىزدىڭ باس ءمۇفتيى ناۋرىزباي قاجى تاعان ۇلى ءمالىم ەتتى، دەپ حابارلايدى قازاقپارات ءتىلشىسى.
قازاقستان مۇسىلماندارى ءدىني باسقارماسىنىڭ مالىمەتىنە سۇيەنسەك، ەل بويىنشا 2500 ادام ونلاين قۇرباندىق شالۋعا تاپسىرىس بەرگەن جانە بۇل تۇسكە دەيىنگى عانا كورسەتكىش. قۇرباندىق شالۋدىڭ جاڭا فورماتىن تاڭداپ، تاپسىرىس بەرۋشىلەردىڭ سانى ارتىپ كەلەتىن كورىنەدى.
ەلىمىزدىڭ باس مۇفتيى ەلوردا ماڭىنداعى قۇرباندىق شالۋعا ارنالعان ورىنداردى ارالاپ، ونىڭ بارىسىن باقىلاپ شىقتى. ءار تاپسىرىستى قازاقستان مۇسىلماندارى ءدىني باسقارماسىنىڭ وكىلدەرى رەسمي تىركەپ، ونىڭ ورىندالۋىن باسقارما ماماندارى ءجىتى قاداعالايدى.
«قازاق ەلى ءارقاشان دا قۇرباندىق شالعان، بۇل داستۇرىمىزگە ساي قالىپتاسقان دۇنيە. كەز كەلگەن كىسى ساپاردا نەمەسە سىرتتا جۇرسە دە بۇل ءداستۇردى ۇمىتپاعان. دەگەنمەن قازىرگى ۋاقىتتا قالالىق تۇرعىندارعا كىشكەنە قيىنعا سوعادى ياعني قالا سىرتىنداعى مال بازارعا بارۋى كەرەك، مال تاڭداۋى ءتيىس دەگەن سياقتى. وسى ورايدا قۇرباندىق شالىپ، قول ۇشىن سوزامىن دەگەن جاندار ونى ونلاين تۇردە ىسكە اسىرا الادى. سونىمەن قاتار ونلاين قۇرباندىق شالۋ ءداستۇرىن ءبىز ءالى دە جەتىلدىرە تۇسەمىز جانە ونى الداعى ۋاقىتتا تەك قۇربان ايت مەيرامىندا عانا ەمەس كەز كەلگەن ساتتە قولدانۋ مۇمكىندىگى بولادى. جالپى بايقاعانىمىزداي ونلاين قۇرباندىققا تاپسىرىس بەرۋشىلەردىڭ سانى ارتىپ كەلەدى»، - دەدى ەلىمىزدىڭ باس ءمۇفتيى ناۋرىزباي قاجى تاعان ۇلى.
ونىڭ ايتۋىنشا، ونلاين قۇرباندىق شالۋعا تاپسىرىس كوبىنەسە نۇر-سۇلتان مەن الماتى قالالارىنان ءتۇسىپ جاتىر. جالپى ونلاين قۇرباندىق شالۋ تاجىريبەسى تۇركيا، ب ءا ا جانە مالايزيا ەلدەرىندە كەڭىنەن تارالعان.
اۆتور: ءالي يبرايەۆ