ناۋرىز ايىندا ەۋروپالىق كوميسسيانىڭ ۇشۋ قاۋىپسىزدىگى كوميتەتى قازاقستاننىڭ اۆياتسيالىق اكىمشىلىگى مەن يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ قىزمەتتىك ەسەبىن تىڭداعان بولاتىن. كەزدەسۋدە قازاقستاننىڭ اۆياتسيا اكىمشىلىگىنىڭ باس ديرەكتورى پيتەر گريففيتس پەن ازاماتتىق اۆياتسيا كوميتەتىنىڭ ءتوراعاسى تالعات لاستايەۆ ۇشۋ قاۋىپسىزدىگىن قاداعالاۋ جانە سەرتيفيكاتتالعان اۆياتاسىمالداۋشىلاردىڭ جاعدايى تۋرالى تولىققاندى مالىمەت بەرگەن.
«سول ەسەپتى قورىتىندىلاعان ەۋروپالىق كوميسسيا قازاقستاندىق اۆياكومپانيالاردى ەۋروپالىق وداققا ۇشۋعا تىيىم سالىنعان اۆياتاسىمالداۋشىلار تىزىمىنە («قارا ءتىزىم») ەنگىزۋ ءۇشىن نەگىز جوق دەگەن شەشىم قابىلدادى. ەۋروكوميسسيا وكىلدەرىنىڭ قازاقستانداعى اۆياتسيانى رەتتەۋشى ورگاندارعا تاعار ءمىنى جوق جانە كەيبىر ساراپشىلار «بەك ەير» ۇشاعىمەن بولعان اۋە اپاتىنا الاڭداۋشىلىق بىلدىرگەنىمەن، «قارا تىزىمگە» ءتۇسۋ مۇمكىندىگى بارىنشا ازايتىلعانىن ەسكەردى. ەسكە سالساق، 2009 -جىلعى تىڭداۋ قورىتىندىسى بويىنشا ەۋروكوميسسيا قازاقستاندىق اۆياتاسىمالداۋشىلاردى «قارا تىزىمگە» ەنگىزۋ تۋرالى شەشىم قابىلداعان بولاتىن»، - دەپ جازادى ازاماتتىق اۆياتسيا كوميتەتىنىڭ باسپا ءسوز قىزمەتى.
دەگەنمەن، ەۋروپالىق كوميسسيا جاعدايدىڭ ودان ءارى دامۋىنا مونيتورينگ جاساپ، باعالاۋدى جالعاستىرادى. وسى تۇرعىدا كوميسسيا EASA جانە ە و- عا مۇشە مەملەكەتتەردىڭ كومەگىمەن قازاقستانعا شولۋ ساپارىن ۇيىمداستىرماقشى.