ايگىلى ءانشى ەسكەندىر حاسانعاليەۆ ومىردەن وزدى

بۇل تۋرالى مادەنيەت جانە سپورت ۆيتسە-ءمينيسترى نۇرقيسا داۋەشوۆ Facebook-تەگى پاراقشاسىندا جازدى.

«ارداقتى اعامىز، اسىل اعامىز، ايگىلى كومپوزيتور، ق ر مەملەكەتتىك سىيلىعىنىڭ يەگەرى، قازاقستان ك س ر حالىق ءارتىسى ەسكەندىر وتەگەن ۇلى حاسانعاليەۆ ومىردەن وزىپتى. مارقۇمنىڭ جاقىندارىنا قايعىرىپ كوڭىل ايتامىن. يمانى سالامات بولسىن»، - دەپ جازدى مادەنيەت ءمينيسترىنىڭ ورىنباسارى.

ەسكەندىر وتەگەن ۇلى حاسانعالييەۆ 1940-جىلى 13- اقپاندا باتىس قازاقستان وبلىسىندا تۋعان. 1959-جىلى قۇرمانعازى اتىنداعى الماتى مەملەكەتتىك كونسەرۆاتورياسىنىڭ ۆوكالدى- حور فاكۋلتەتىن، 1978-جىلى ءال-فارابي اتىنداعى شىمكەنت مادەنيەت ينستيتۋتىن ءبىتىردى.

ءومىرىن ونەرگە ارناعان حاسانعاليەۆتىڭ «اتامەكەن»، «ادەمى»، «اسىل ارمان»، «ءومىرىمنىڭ جازى»، «ەسكىرمەگەن ماحاببات» اندەرىن بىلمەيتىن قازاق جوق.

ەسكەندى حاسانعاليەۆ - قازاقتىڭ ءان ونەرىنە زور ۇلەسىن قوسقان سازگەر. ونىڭ رەپەرتۋارىنداعى اۆتورلىق تۋىندىلارى ەل جۇرەگىنەن ويىپ تۇرىپ ورىن العان.

شىعارماشىلىق عۇمىرىندا ورىس، تاتار، نەمىس اقىندارىنىڭ ولەڭدەرىنە دە ءان جازعان.

200 گە جۋىق ءان، رومانس جانە حورعا ارنالعان شىعارمالاردىڭ اۆتور بولدى.

ەسكەندىر حاسانعاليەۆ پەن جۇبايى داريكو حاسانعاليەۆانىڭ ەكى قىزى مەن ءبىر ۇلى بار.

ايتا كەتەيىك، بۇعان دەيىن ەسكەندىر حاسانعاليەۆ پەن جۇبايى كوروناۆيرۋسپەن جانساقتاۋ بولىمىنە تۇسكەنىن حابارلاعان ەدىك.