قازاق كاسىپكەرى قىتايدىڭ مەملەكەتتىك سىيلىعىن الدى - شەتەلدەگى قازاق تىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازاق بالاسى تۇسىرگەن وزبەكشە تاريحي سەريال جارىققا شىقتى - «ءوزا» اقپاراتتىق اگەنتتىگى

وزبەكستان مادەنيەت مينيسترلگىنىڭ تاپسىرىسى بويىنشا تۇركيالىق «Bo‘zdag‘ film» ستۋدياسى تاسپالاعان «مەنديرمان جالوليددين» تاريحي سەريالى جارىققا شىقتى، دەپ حابارلايدى «ءوزا».

اتالعان ب ا ق-تىڭ كەلتىرگەن دەرەگىنە سۇيەنسەك، العاشقى سەرياسى 14-اقپاندا كورەرمەنگە جول تارتقان تۋىندى حورەزمدى بيلەگەن جالوليددين مانگۋبەردىنىڭ ءومىرى، قولباسشىلىق ەتكەن ءداۋىرى مەن تاريحي شايقاستارى جايلى باياندايدى. دەسە دە، تەلەحيكايانىڭ باستى ۇعىمى حورەزمشاح پەن شىڭعىسحاننىڭ شايقاسىنا نەگىزدەلگەن.

«13 بولىمنەن تۇراتىن تاريحي كارتينادا باستى رولدەردى، حورەزمشاحتى تۇرىك اكتەرى ەمرە كيۆيلدجيم سومداعان بولسا، ۇلى شىڭعىسحان وبرازىن وزبەكتىڭ بەلگىلى اكتەرى دجاۆاحير زاكيروۆ بەينەلەگەن. ال، تەلەحيكايانى قازاقستاندىق رەجيسسەر نۇرعيسا ءالمۇرات تۇسىرگەن. تاريحي تۋىندىنى ءار اپتانىڭ جەكسەنبى كۇنى كەشكى ساعات 20:30-دا «ميللي ت ۆ» ارناسىنان كورۋگە بولادى»، - دەپ جازادى «ءوزا» اقپارات اگەنتتىگى.

جاھاندىق يننوۆاتسيا يندەكسى بويىنشا قازاقستان 77- ورىندا - فارس اقپارات اگەنتتىگى

جاھاندىق يننوۆاتسيالىق يندەكستىڭ جىل سايىنعى (2020 ج. ) رەيتينگىندە قازاقستان 77-ورىن يەلەندى. بۇل اقپاراتتى وسى اپتادا «فارس» اقپارات اگەنتتىگى دە جازعان بولاتىن.

جاھاندىق يننوۆاتسيالىق يندەكس (GII) بويىنشا جاڭا ەسەپتە قازاقستان 131 ەلدىڭ اراسىندا 77-ورىندا تۇر. بۇل رەسەي، ارمەنيا جانە بەلارۋس ەلدەرىنەن تومەن.

بۇل رەيتينگ يننوۆاتسيالاردى جۇرگىزۋ ءۇشىن قولدا بار رەسۋرستار مەن جاعدايلاردى پايدالانۋ، يننوۆاتسيالاردى جۇزەگە اسىرۋدىڭ قول جەتكىزىلگەن پراكتيكالىق ناتيجەلەرىن باعالاۋعا نەگىزدەلگەن.

«قازاقستان اتالعان كورسەتكىشتەردىڭ 1-توبى بويىنشا رەيتينگىدە 131-دەن 60-ورىندى جانە 2-توپ بويىنشا 94-ورىندى يەلەندى. يننوۆاتسيالاردىڭ دامۋ دەڭگەيىن سيپاتتايتىن بارلىق 80 كورسەتكىش 7 ءىرى ساناتقا بىرىكتىرىلەدى. قازاقستانداعى ەڭ تومەن كورسەتكىش «شىعارماشىلىق ناتيجەلەر» ساناتى بويىنشا بولدى»، - دەپ جازادى يراندىق ب ا ق.

مەملەكەتتىك سىيلىق العان قىتايلىق قازاق كاسىپكەرى - «جەنمين جيباو» (People Daily)

25-اقپاندا پەكيندەگى مەملەكەتتىك حالىق قۇرىلتايى سارايىندا كەدەيلىكپەن كۇرەسۋدى ۇلتتىق دەڭگەيدە قورىتىندىلاۋ مەن ماراپاتتاۋ كونفەرەنسياسى ءوتتى.

كونفەرەنسيادا ەل ەكونوميكاسىنىڭ دامۋىنا ەلەۋلى ۇلەس قوسىپ جۇرگەن ازاماتتار مەن ۇجىمدار ماراپاتتالدى، دەپ حابارلادى People Daily اقپارات پورتالى.

«ۇلتتىق كيىم كيگەن ايەل تريبۋناعا كوتەرىلگەندە ەرەكشە كوزگە ءتۇستى. ول شىڭجاڭنىڭ موري قازاق اۆتونوميالىق وكرۋگىنەن شىققان Hayinaer Ethnic Handicraft Manufacturing Co.، Ltd كومپانياسىنىڭ باس مەنەدجەرى سەكەر قۇسان قىزى بولاتىن»، - دەپ جازادى «جەنمين جيباو».

وسى اسەرلى كەزدەسۋدەن كەيىن اتالعان اقپارات كوزىنىڭ ءتىلشىسى بىردەن شەكەر قۇسان قىزىنا تەلەفون ارقىلى حابارلاسقان.

«بۇگىن شىنىمەن دە قىزىقتى كۇن. تاڭعى استان كەيىن ەلدەگى ەڭ مارتەبەلى حالىق قۇرىلتايى سارايىنا كەلدىم. شىڭجاڭدا ساحناعا وكىل رەتىندە مەملەكەتتىك ماقتاۋ قاعازىن الۋعا كەلگەن 4 ادام بار. مەن سولاردىڭ ءبىرى ەدىم. ول كەزدە مەن ءوزىمىزدىڭ قازاقتىڭ ۇلتتىق كيىمىن كيىپ ءجۇردىم»، - دەيدى س. قۇسان قىزى تىلشىگە بەرگەن سۇحباتىندا.

موريلىق قانداسىمىز بۇرىنىراق مال باققانىن، كەيىننەن ۇلتىمىزدىڭ ءداستۇرلى قولونەرىنىڭ ءبىرى - كەستەشىلىكتى قولعا العانىن ايتادى.

«مەن بۇرىن مال باققان ەدىم. كەيىننەن ۇلتتىق ناقىشتاعى كەستە تىگۋ فابريكاسىن قۇرىپ، اۋىلداستارىمدى كاسىپتەندىرۋگە جول اشتىم. سول ەڭبەكتەرىمنىڭ ارقاسىندا بۇگىن ماراپاتتى الۋ ءۇشىن حالىق قۇرىلتايى سارايىنا كەلدىم. بۇل سىيلىق ءوزىم ءۇشىن ومىرىمدەگى ەڭ بيىك مارتەبەنىڭ ءبىرى. مەن شىڭجاڭعا ورالعاننان كەيىن ۇلتتىق كەستە ونەركاسىبىن دامىتىپ، كەڭەيتىپ، بارلىق ەتنيكالىق توپتاردىڭ باۋىرلارىن بىرگە دامىپ، بىرگە باي بولۋعا كومەكتەسۋىم كەرەك»، - دەيدى سەكەر قۇسان قىزى.

«ۇلى دالانىڭ شىراقتارى» اتتى كونفەرەنسيا ۇيىمداستىرىلدى - TRT

قازاقستانداعى تۇركيا رەسپۋبليكاسىنىڭ ەلشىلىگى جانىنداعى ءبىلىم بەرۋ كەڭەسشىلىگى «ءبىلىم بەرۋ ديپلوماتياسى» جوباسىن جالعاستىرىپ كەلەدى.

وسى ايدا جوبا اياسىندا «ۇلى دالانىڭ شىراقتارى» كونفەرەنسياسى ونلاين فورماتتا ءوتتى. كونفەرەنسياعا ديپلوماتيالىق وكىلدەر، عالىمدار مەن ءتۇرلى ۋنيۆەرسيتەتتەردىڭ ستۋدەنتتەرى قاتىستى. بۇل تۋرالى وسى اپتادا تۇركيا راديوتەليەۆيزيا پورتالى حابارلادى.

تۇركيالىق ب ا ق- تىڭ دەرەگىنشە، سەمينار قوناعى قوجا احمەت ياساۋي اتىنداعى قازاق- تۇرىك ۋنيۆەرسيتەتى رەكتورىنىڭ ورىنباسارى دجەنگيز تومار يسلام جانە تۇرىك الەمىنىڭ ويشىلى ءياساۋيدىڭ تۇلعاسى، پىكىرلەرى جانە الەم كوزقاراسى جونىندە مالىمەت بەردى. ول ياساۋي مۇراسىنىڭ يۋنۋس ەمرە مۇراسى سەكىلدى عالامدىق دەڭگەيدە ەكەنىن ايتتى.

ول قاتىسۋشىلاردىڭ سۇراقتارىنا جاۋاپ بەرىپ، ياساۋيدىڭ جان-جاقتى تۇلعا ەكەنىن، مۇراسى ەگجەي- تەگجەيلى زەرتتەلۋى قاجەتتىگىن اتاپ كورسەتكەن.

«كونفەرەنسيادا باۋىرلاس ەكى ەلدىڭ ماماندارى اتاقتى ويشىل، اقىننىڭ ولەڭدەرىنىڭ اۋدارىلۋى جانە كەڭ تانىستىرىلۋى باعىتىندا كوزقاراس الماستى»، - دەپ جازادى TRT.

قازاقستان ەلشىسى موڭعوليانىڭ پرەمەر- مينيسترىمەن كەزدەستى - Kaznews

2021 -جىلى 25-اقپاندا قازاقستان رەسپۋبليكاسىنىڭ موڭعولياداعى توتەنشە جانە وكىلەتتى ەلشىسى جالعاس ادىلبايەۆ موڭعوليا پرەمەر- ءمينيسترى لۋۆساننامسراي ويۋۋن- ەردەنەمەن كەزدەسۋى ءوتتى، دەپ حابارلايدى موڭعوليانىڭ Kaznews اقپارات پورتالى.

ج. ادىلبايەۆ ل. ويۋۋن- ءەردەنەنى پرەمەر- مينيستر قىزمەتىنە تاعايىندالۋىمەن جانە ءداستۇرلى شاعان مەرەكەسىمەن (اي كۇنتىزبەسى بويىنشا جاڭا جىل) قۇتتىقتادى.

Kaznews اقپارات پورتالىنىڭ كەلتىرگەن دەرەگىنە سۇيەنسەك، كەزدەسۋ باسىندا قازاقستاندىق ديپلومات 2021 -جىلعى 27-اقپاندا ۇلانباتىر - الماتى جانە 5-ناۋرىزدا ۋلانباتىر - نۇر-سۇلتان باعىتتارى بويىنشا ەۆاكۋاتسيالىق ارنايى رەيستەردى ۇيىمداستىرعانى ءۇشىن ريزاشىلىعىن بىلدىرگەن.

سونداي-اق، ەلشى موڭعوليا ۇكىمەتىنىڭ باسشىسىنا 2021 -جىلدىڭ 1-اقپانىنان باستاپ قازاقستان رەسپۋبليكاسىندا كوروناۆيرۋس ىندەتىنە قارسى ەكپە جۇمىستارى باستالعانىن حابارلادى. سونىمەن قاتار، موڭعول تاراپىنا ۆاكسيناتسيا ءارتۇرلى توپتاردىڭ ەپيدەميولوگيالىق ماڭىزدىلىعىن ەسكەرە وتىرىپ، كەزەڭ- كەزەڭىمەن جۇزەگە اسىرىلاتىنى جەتكىزىلدى.

ءوز كەزەگىندە ل. ويۋۋن-ەردەنە قازاقستان مەن موڭعوليا اراسىنداعى ىنتىماقتاستىق ديپلوماتيالىق قاتىناستار ورناعاننان بەرى تۇراقتى دامۋدا ەكەنىن جانە وسى ىنتىماقتاستىق دەڭگەيىن ارتتىرۋ ءۇشىن بارلىق سالالاردا بەلسەندى ءوزارا ءىس-قيمىل جاساۋ قاجەتتىگىن اتاپ وتكەن. موڭعوليانىڭ پرەمەر- ءمينيسترى مادەني- گۋمانيتارلىق ىنتىماقتاستىقتى كەڭەيتۋ مۇمكىندىگىن قاراستىرۋدى ۇسىندى...

«بۇدان باسقا، تاراپتار اۋىل شارۋاشىلىعى، كولىك، تۋريزم، ساۋدا-ەكونوميكالىق ىنتىماقتاستىق، سونداي-اق حالىقارالىق ساحناداعى ءىس- قيمىلداردى ۇيلەستىرۋ سالالارىندا ەكىجاقتى قارىم- قاتىناستاردىڭ كۇن تارتىبىندەگى ءبىر قاتار وزەكتى ماسەلەلەردى كونسترۋكتيۆتى تۇردە تالقىلادى»، - دەپ تۇيىندەيدى موڭعوليالىق ب ا ق.

اۆتور: بەيسەن سۇلتان ۇلى