بۇل تۋرالى پارلامەنت سەناتىنىڭ ءتوراعاسى ماۋلەن اشىمبايەۆ ءمالىم ەتتى، دەپ حابارلايدى قازاقپارات ءتىلشىسى.
«شاعىن جانە ورتا بيزنەستى دامىتۋ ءۇشىن ماڭىزدى تالاپتاردىڭ ءبىرى - ول نەسيەلىك رەسۋرستارعا قولجەتىمدىك. سوڭعى جىلداردىڭ ستاتيستيكاسىنا قاراعاندا، شاعىن جانە ورتا بيززنەستى (شوب) بانك تاراپىنان نەسيەلۋ بىرتىندەپ تومەندەگەنى بايقالدى. 2017 -جىلدان شوب سۋبەكتىلەرىنە ارنالعان بانكتىك زايمدار 22 پايىزعا قىسقاردى، 5 تريلليون تەڭگەدەن 4,1 تريلليون تەڭگەگە دەيىن. سونىمەن قاتار وسى مەرزىمدە جەكە تۇلعالاردى نەسيەلەندىرۋ 64 پايىزعا ءوستى»، - دەدى م. اشىمبايەۆ قازاقستاندا شاعىن جانە ورتا كاسىپكەرلىكتى دامىتۋ سالاسىنداعى مەملەكەتتىك ساياساتتى جانە قۇقىقتىق رەتتەۋدى جەتىلدىرۋ تاقىرىبىنداعى پارلامەنتتىك تىڭداۋدا.
ونىڭ ايتۋىنشا، كاسىپكەرلىكتى جاڭا باستاعاندار مەن ميكروبيزنەسكە نەسيە الۋ قيىنعا تۇسەدى. ولاردىڭ كوبىندە كەپىلدى مۇلىك پەن جەتكىلىكتى اينالىم قارجىسى بولمايدى. بانكتەر قارىز الۋشىلاردىڭ وسى ساناتىن نەسيەلەۋگە اسىقپايدى، سەبەبى ءىرى كليەنتتەرگە عانا ەكپىن قويىلعان. بۇل باعىتتا بانكتەردە ءوز مۇددەسى بار، ياعني تاۋەكەلدەر مەن تابىستىڭ دەڭگەيىن نازارعا الىپ وتىر. وسى جاعدايدا ميكروبيزنەس يەلەرى جەكە تۇلعالار سياقتى جىلدىق 20-25 پايىزبەن قارجى قارىزىن الۋعا ءماجبۇر بولادى.
«بيزنەستى مەملەكەتتىك قولداۋ تەتىكتەرىن جەتىلدىرۋدى جالعاستىرۋ كەرەك. اسىرەسە، اقپاراتتىق- ءتۇسىندىرۋ بولىگىنە نازار اۋدارۋ قاجەت»، - دەدى سەنات ءتوراعاسى. زەرتتەۋ مالىمەتتەرىنشە، كاسىپكەرلەر كوبىنە وزىنە قاجەت كونسۋلتاتسيالاردى المايدى. شاعىن بيزنەس مەملەكەتتىك قولداۋ شارالارى جايىندا بىلمەي جاتادى. «وسى ورايدا ءبىرىڭعاي ۇيلەستىرۋ ورتالىعى جانە اقپاراتتىق پورتال كەرەك بولار، ياعني كاسىپكەرلەر «جالعىز تەرەزە» قاعيداتى بويىنشا كومەك الار ەدى»، - دەدى م. اشىمبايەۆ.