دەسە دە بالا كۇننەن تانىس بۇل ءتىزىمدى كەيدە ايتا الماي، ەسكە تۇسىرە الماي جاتامىز. ونىڭ ۇستىنە، 2007-جىلى الەمنىڭ جاڭا جەتى كەرەمەتى جاريالانىپ، سانامىزدا جاڭعىرىپ كەلگەن كونە ەسكەرتكىشتەردى مۇلدەم شاتاستىرا باستادىق.
ەندەشە الەمنىڭ جەتى كەرەمەتىن تاعى ءبىر ەسكە تۇسىرەيىك.
حەوپس پيراميداسى - كونە داۋىردەن بۇگىنگى كۇنگە جەتكەن، جەر بەتىندەگى ەڭ ەجەلگى قۇرىلىس. جەتى كەرەمەتتىڭ العاشقىسى. گيزا قالاسى جانىنداعى پيراميدا كەشەندەرىنىڭ ءبىرى. بيىكتىگى بۇرىن 146 مەتر بولاتىن، قازىر 138 مەتر.
شامامەن، ءبىزدىڭ زامانىمىزعا دەيىنگى 2600-جىلى سالىنعان. ءبىراق مۇنى ناقتى داتا دەپ ايتۋ قيىن. عالىمداردىڭ پىكىرى ءارتۇرلى.
پيرامادينانىڭ ەسىگى بار. عيماراتقا 15 مەتر كوتەرىلىپ بارىپ، ەسىگىنەن كىرۋگە بولادى. قۇرىلىستىڭ ءبىر جاعىنا جاساندى جول سالىنعان. شامامەن، بۇل جول 820-جىلى قازىلسا كەرەك.
بابىلدىڭ اسپالى باعى - الەمنىڭ ەكىنشى كەرەمەتى. ءبىزدىڭ زامانىمىزعا دەيىنگى VII عاسىردا سالىنىپ ءبىزدىڭ زامانىمىزدىڭ I عاسىرىندا قۇردىمعا كەتكەن عاجايىپ باق. اڭىزعا سەنسەك، بۇل جۇماق باقتى ۆاۆيلون پاتشاسى II ناۆۋحودونوسور ومىرلىك جارى، پاتشايىم اميتيسكە دەگەن ماحابباتىن بىلدىرمەك نيەتپەن سالعان.
باقتىڭ ورنى قازىر باعدات قالاسىنىڭ ماڭىندا ساقتالعان. قيراعان باقتىڭ بۇگىنگى كۇنگە جەتكەن قالدىقتارىنىڭ ءوزى ادام تاڭقالارلىق. اۋدانى اتشاپتىرىم، سودان-اق بۇل باقتىڭ شىنايى ومىردە قانداي الىپ باۋ-باقشا بولعانىن اڭعارۋعا بولادى.
زيەۆس ءمۇسىنى. گرەكيانىڭ كيەلى كونە مەكەنى وليمپيا عيباداتحاناسىندا ورنالاسقان. ءمۇسىننىڭ بيىكتىگى - 12 مەتر، تۇعىرىمەن قوسا ساناعاندا 17 مەتر. قاڭقاسى ءپىلدىڭ سۇيەگى مەن ەبەن اعاشىمەن قۇرىلىپ، التىنمەن قۇيىلعان. داڭقتى گرەك ساۋلەتكەرى فيديانىڭ جوباسىمەن سوعىلعان. ب. ز. د. 432-جىلى سالىنعان، ءبىراق V عاسىردا ورتەنىپ كەتكەن.
زيەۆس ءمۇسىنى ورنالاسقان وليمپيا مەكەنىنەن وليمپيادا ويىندارى باستاۋ العان.
ارتەميدا عيماراتى. كونە ەفەس قالاسىندا V عاسىردا تۇرعىزىلعان عيباداتحانا. بۇل قالا قازىرگى تۇركيا جەرىندە ورنالاسقان. عيماراتتىڭ باسقا انتيكالىق كەرەمەتتەردەن ەرەكشەلىگى - قيراعان بولىگى ساقتالىپ قالعان، بۇگىنگى كۇنگە ءبىر بولىگى جەتكەن.
كونە گرەك سەنىمىندە ارتەميدا اڭشىلىق پەن مولشىلىقتىڭ قۇدايى، قامقورشى ايەل بولعان.
گاليكارناس تابىتحاناسى. الەمنىڭ بەسىنشى كەرەمەتى. كاري جەرىن باسقارعان احەمەنيدتەر اۋلەتىنىڭ ۇرپاعى ماۆسول پاتشا سالدىرعان بيىك عيمارات. ءبىر جاعى قورىم، ەكىنشى جاعى تابىناتىن جەر، ەسكەرتكىش بولعان. مۇنى ساۋلەت ونەرىندە زيگگۋرات عيماراتى دەيدى. كونە مەسوپوتاميا مەن ەلام جەرىندە سالىنعان كوپ كەشەندى عيمارات ءتۇرى.
بۇل ماۆزولەي جەر سىلكىنىسى كەزىندە قيراپ، قازىر ءۇيىندىسى قالعان. تۇركيانىڭ بودرۋم قالاسىنا جاقىن جەردە ورنالاسقان.
رودوس الابى. جەرورتا تەڭىزىنىڭ رودوس ارالىنداعى كۇن قۇدايى - گەليوستىڭ الىپ ءمۇسىنى. نەبارى 65 جىل عانا تۇرعان. جەر سىلكىنىسى كەزىندە جەرمەن جەكسەن بولدى. ب. ز. د Ⅲ عاسىردا سالىنعان.
ونى رودوس ارالىنىڭ حالقى ەسكەندىر زۇلقارنايىن قولباسشىسىنىڭ ۇلى دەمەتري زۇلقارنايىن باستاعان اسكەردى كەرى قايتارىپ، جاۋدى جەڭگەن جەڭىسى ءۇشىن سالعان. الىپ ءمۇسىندى 45 مەتر ەتىپ سوققان.
الەكساندريا شامشىراعى. مىسىردىڭ الەكساندريا قالاسىنا جاقىن فاروس ارالىنداعى شامشىراق. الەمنىڭ جەتىنشى كەرەمەتى. وكىنىشكە وراي، ول دا جەر سىلكىنىسى كەزىندە قيراعان. ءبىر ەمەس، بىرنەشە جەر سىلكىنىسىن باستان كەشكەن.
عيماراتتىڭ ارنايى قىزمەتى بولعان. جەرورتا تەڭىزىندە اداسقان كەمەشىلەرگە جول كورسەتۋ ءۇشىن ءارى تەڭىزدىڭ باسقا ارالدارىمەن شاتاستىرىپ الماس ءۇشىن سالىنعان.
1994-جىلى فرانسۋز ارحەولوگتارى شامشىراقتىڭ ءۇيىندىسىن، امان قالعان ءبىراز بولىگىن تاپقان. ال 2016-جىلى مىسىر بيلىگى بۇل اۋماقتى سۋ استى مۇراجايى دەپ تانىپ، قورعاۋعا العان.
massaget.kz