ياعني سودان بەرى بەيبىت ميتينگ وتكىزۋ كەزىندە رۇقسات الۋدىڭ قاجەتى جوق، تەك ول تۋرالى جەرگىلىكتى اتقارۋشى ورگانعا حابارلانۋى كەرەك.
بۇل شارالار ازاماتتاردىڭ كونسترۋكتيۆتى سۇرانىسىنا جەدەل ءارى ءتيىمدى جاۋاپ بەرەتىن «حالىق ۇنىنە قۇلاق اساتىن مەملەكەتتى» قۇرۋعا باعىتتالعان، دەپ حابارلايدى قازاقپارات ءتىلشىسى.
13-قىركۇيەكتە ەلدىڭ ءتورت قالاسىندا، اتاپ ايتقاندا الماتى، قاراعاندى، اقتوبە مەن سەمەي قالاسىندا ميتينگ بولىپ ءوتتى. الماتىدا ميتينگكە 100 گە تارتا ادام قاتىستى. باسقا ايماقتاردا اكسياعا قاتىسۋشىلاردىڭ سانى از بولدى. مەملەكەتتىك ورگاندار جينالىستاردى وتكىزۋ كەزىندە زاڭدا قاراستىرىلعانداي قولداۋ كورسەتتى. قاجەت بولعان جاعدايعا مەديتسينالىق كومەك قاراستىرىلىپ، قوعامدىق ءتارتىپتى ساقتاۋ ءۇشىن قۇقىق قورعاۋ ورگاندارى قىزمەتكەرلەرى دە بولدى. جۋرناليستەرگە ارنالعان جەدەل باسپا ءسوز ورتالىعى قۇرىلدى. ميتينگكە قاتىسۋشىلارعا ماسكانى پايدالانىپ، قوقىستى تاستاماۋى كەرەكتىگى تۋرالى جادىنامالار تاراتىلدى. سونداي- اق ميتينگكە قاتىسۋشىلاردىڭ تەمپەراتۋراسى ولشەندى. جيىنعا قاتىسۋشىلار قازاقستاندىق جەردى شەتەلدىكتەرگە جانە ازاماتتىعى جوق ادامدارعا جالعا بەرمەۋ، حالىققا نەسيەلىك امنيستيا جاريالاۋ ماسەلەلەرىن كوتەردى. ەل پرەزيدەنتى قاسىم- جومارت توقايەۆ جەر ماسەلەسىنە قاتىستى سۇراققا نۇكتە قويعان بولاتىن.
10-شىلدەدە وتكەن ۇكىمەتتىڭ كەڭەيتىلگەن وتىرىسىندا ول جەر شەتەلدىكتەرگە ساتىلمايتىنىن جانە مۇنىڭ تۇپكىلىكتى شەشىم ەكەنىن مالىمدەگەن ەدى. ۇكىمەتكە جەردى ءتيىمدى پايدالانۋ ماسەلەسىن شەشۋ، جەر كودەكسىنە تۇزەتۋلەردى ەنگىزۋ، بۇل تاقىرىپتى فەرمەرلەر بىرلەستىگىمەن ەل الدىندا تالقىلاۋ تاپسىرىلعان بولاتىن. ينۆەنتاريزاتسيا بارىسىندا انىقتالعان، پايدالانىلماي جاتقان 12,8 ميلليون گەكتار جەردىڭ 7 ميلليون گەكتارى مەملەكەتكە قايتارىلدى. اگروونەركاسىپتىك كەشەندى دامىتۋ ءۇشىن ينۆەستيتسيالار مەن تەحنولوگيالار تارتىلۋدا. نەسيەلىك امنيستياعا كەلەر بولساق، بانكتەن العان نەسيەلەر بويىنشا مەملەكەت ازاماتتارعا قارىزىن قايتارۋعا كومەكتەسكەن ەدى.
2019 -جىلدىڭ 26-ماۋسىمىندا قازاقستان پرەزيدەنتى «قارىز جۇكتەمەسىن تومەندەتۋ تۋرالى» جارلىققا قول قويدى. ۇكىمەت پەن ۇلتتىق بانككە الەۋمەتتىك تۇرعىدا از قامتىلعان ازاماتتاردىڭ كەپىلسىز تۇتىنۋشىلىق قارىزىن ەسەپتەن شىعارۋ بويىنشا پروتسەستى باستاۋدى تاپسىرعان ەدى. ول ساناتتاعى ازاماتتاردىڭ قاتارىنا - كوپبالالى وتباسىلار، مۇگەدەك بالالارى بار وتباسىلار، اسىراۋشىسىنان ايىرىلعان وتباسىلار، اتاۋلى الەۋمەتتىك كومەك الۋشىلار، ومىرلىك ءارتۇرلى اۋىر جاعدايدا قالعان ازاماتتار جاتقىزىلدى.
وسىنىڭ ناتيجەسىندە قارىزى بارلاردىڭ 300 مىڭ تەڭگەدەن نەسيەسى جابىلدى. سونىمەن بىرگە جارتى ميلليون قازاقستاندىق قوسىمشا نەسيەسىن جابۋ ءۇشىن 300 مىڭ تەڭگەدەن الدى. قارىزى بارلارعا قۇجات جيناۋى كەرەكتىگى سۇرالمادى. قارىزدى جابۋ ماسەلەسىن تولىعىمەن مەملەكەت ءوز موينىنا الدى. قارىزى بارلار امنيستيادان كەيىن بانك قىزمەتىنەن نەسيە تاريحىن تەكسەرىپ بىلەتىن بولدى. جالپى سانكتسيالانعان ميتينگتەر مەملەكەتتىك ورگانداردىڭ «حالىق ۇنىنە قۇلاق اساتىن مەملەكەت» تۇجىرىمداماسىنىڭ تابىستى جۇزەگە اسىرىلىپ جاتقانىن كورسەتتى.