«قىمباتتى وتانداستار، الەمدى ءبىر ساتتە تار قاپاسقا اينالدىرعان ىندەت جارتى جىلعا جۋىق ۋاقىت ىشىندە، وكىنىشكە قاراي، ءاربىر قازاقستاندىق وتباسىن اينالىپ وتپەدى دەسەك - قاتەلەسپەيمىز. اتا- انامىزدان، باۋىرلارىمىزدان، دوس، تانىس، ارىپتەستەرىمىزدەن قاپىدا ايىرىلىپ جاتىرمىز. كوزگە كورىنبەيتىن، قۇبىلىپ بارىپ تۇتقيىلدان شاباتىن كەسىرلى ىندەت ەلىمىزدىڭ قانشاما دارىنىن، داراسىن ارامىزدان جۇلىپ اكەتتى.
«جاۋ جاعادان العاندا، ءبورى ەتىكتەن شالادى» دەمەكشى، تار جەردە قوعامنىڭ ەسكى جارالارى - جەمقورلىق، الىپساتارلىق سياقتى جيىركەنىشتى فاكتورلەر اشكەرەلەنىپ جاتسا، ەكىنشى جاعىنان ىندەتپەن كۇرەسىپ جاتقان دارىگەرلەردىڭ جانكەشتىلىگى، ولارعا كومەككە كەلگەن ەرىكتىلەر، جەر- جەردە قايىرىمدىلىق جاساپ جۇرگەن جانداردىڭ قاتارى كوبەيىپ، ادامگەرشىلىك پەن وتانسۇيگىشتىكتىڭ ەڭ بيىك ۇلگىسىنە كۋا بولىپ جاتىرمىز»، - دەدى ق ر پارلامەنت سەناتىنىڭ دەپۋتاتى دانا نۇرجىگىت Instagram پاراقشاسىنا جاريالاعان بەينەجازبادا.
ونىڭ ايتۋىنشا، بۇل كۇرەس قازاقستان قوعامىن وزگەرتىپ جاتىر.
«ۇلت رەتىندە، قوعام رەتىندە سىننان ءوتىپ، ورتاق قاسىرەتكە قارسى تۇرىپ، بەكي تۇستىك دەپ انىق ايتا الامىن. بۇل كۇرەس ءبىزدىڭ ءومىر سالتىمىزدى وزگەرتتى. سول ارقىلى سانامىزدى وزگەرتىپ جاتىر. ىندەت ۇلت، مەملەكەت رەتىندە ساقتالىپ، امان قالۋدىڭ باستى شارتى - تەمىردەي ءتارتىپ ەكەنىن سانامىزعا تۇرىپ قۇيىپ جاتىر. كەز كەلگەن ءتارتىپ قانمەن جازىلادى. وكىنىشكە قاراي، بۇل - اقيقات. ىندەت قۇرباندارى وسى سوزىمە دالەل. كارانتين ءتارتىبىن ساقتاۋ ءوزىڭدى عانا ەمەس، ۇلتتى ساقتاۋ ەكەنىن ۇمىتپايىق. سابىر ساقتاپ، توي، جيىندى توقتاتىپ، جانازانى دا قازىرگى جاعدايعا ساي وتكىزىپ، ىندەتتىڭ ورشۋىنە جول بەرمەيىك. بارلىعىڭىزعا اماندىق تىلەيمىن»، - دەيدى ول.
اۆتور: زارينا قاھارمان