«مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا «قاراپايىم زاتتار ەكونوميكاسى» باعدارلاماسى بويىنشا قاراجاتتى يگەرۋ قارقىنىن ۇلعايتۋ قاجەتتىگىنە نازار اۋدارعانىن بىلەسىزدەر. ماڭىزدى مىندەت - ىشكى ءوندىرىستى جەدەل دامىتۋ جانە ونەركاسىپتىك وزىندىك قامتاماسىز ەتۋ دەڭگەيىن جوعارىلاتۋ ارقىلى بۇكىل ەكونوميكاعا جاڭا سەرپىن بەرۋ. وسى باعىتتاعى جۇمىستى جالعاستىرۋ قاجەت»، - دەدى اسقار مامين ۇكىمەت وتىرىسىندا.
پرەمەر-مينيستر وسىعان بايلانىستى بىرنەشە ماسەلەگە نازار اۋدارۋ كەرەكتىگىن ايتىپ ءوتتى. «قاراپايىم زاتتار ەكونوميكاسى» باعدارلاماسىنىڭ شەڭبەرىندە 491,5 ميلليارد تەڭگەگە 2 مىڭنان استام جوبا ماقۇلداندى. يمپورت الماستىرۋعا باعىتتالاتىن جوبالاردى ويداعىداي ىسكە اسىرۋ ءۇشىن قازىرگى راسىمدىك جانە جۇيەلىك توسقاۋىلداردى جويۋ قاجەت. قارجى نارىعىن رەتتەۋ جانە دامىتۋ اگەنتتىگى قارجىگەرلەر قاۋىمداستىعىمەن جانە ەكىنشى دەڭگەيلى بانكتەرمەن بىرگە بانكتەردىڭ بيزنەس- پروتسەستەرىن وڭتايلاندىرۋ مۇمكىندىگىن، اتاپ ايتساق، كرەديتتىك وتىنىمدەردى قاراۋ مەرزىمىن، قۇجاتتار تىزبەسىن قىسقارتۋدى جانە كەپىل ساياساتىن وڭايلاتۋدى قاراستىرۋى كەرەك. جۇيەلىك توسقاۋىلدار بويىنشا جوبالىق ءوفيستىڭ جۇمىسى اياسىندا ۇلتتىق بانكپەن بىرگە اينالىم كاپيتالىن 100 پايىز قارجىلاندىرۋدى كەڭەيتۋ مۇمكىندىگى تۇرعىسىنان جۇمىس جۇرگىزۋدى تاپسىرامىن» ، - دەدى ول.
اسقار مامين ودان بولەك «قاراپايىم زاتتار ەكونوميكاسىندا» جەرگىلىكتى قامتۋدىڭ ۇلەسىن ۇلعايتۋعا قول جەتكەنىن اتاپ ءوتتى.
«الماتى، قاراعاندى، قوستاناي وبلىستارى قازاقستاندىق قامتۋ بويىنشا ۇزدىك وڭىرلەر بولىپ وتىر. اقمولا، اتىراۋ، جامبىل، ماڭعىستاۋ وبلىستارى، نۇر- سۇلتان، شىمكەنت قالالارى ارتتا قالعان. بارلىق اكىمدىكتەر، اسىرەسە ارتتا قالعاندار، وتاندىق تاۋاردىڭ قولدانىلۋىن باقىلاۋ جۇمىسىن كۇشەيتىپ، ەسەپتىڭ شىنايىلىعىن قامتاماسىز ەتۋى قاجەت. قۇرىلىس سالاسىندا دا وسىنداي ناتيجەگە جەتۋىمىز كەرەك»، - دەدى اسقار مامين.