«اتالعان زاڭ جوباسى پرەزيدەنت قاسىم-جومارت توقايەۆتىڭ ۇلتتىق قوعامدىق كەڭەستىڭ وتىرىسىندا «پارلامەنتتىك وپپوزيتسيا» ينستيتۋتىن زاڭنامالىق بەكىتۋ تۋرالى تاپسىرماسىن ورىنداۋ ماقساتىندا دايىندالدى. مەملەكەت باسشىسىنىڭ اتالعان تاپسىرماسىن پايدالانىپ، «اق جول» پارتياسى الدىن الا دايىنداعان پارلامەنتتىك وپپوزيتسيا تۋرالى زاڭ جوباسىن قازىرگى جاعدايدىڭ تالاپتارىنا سايكەس قايتا جاڭارتتى. زاڭ جوباسى فراكسيا دەپۋتاتتارىنىڭ ساپارلارى بارىسىندا جەرگىلىكتى جانە ۇلتتىق دەڭگەيىندە سايلاۋشىلاردىڭ، عالىمداردىڭ ءارى ساياسي قوعام وكىلدەرىنىڭ تالقىلاۋىنان ءوتتى. تالقىلاۋ جۇمىستارى بۇقارالىق اقپارات قۇرالدارىندا جاريالاندى»، - دەدى ءماجىلىسىنىڭ دەپۋتاتى ازات پەرۋاشيەۆ. زاڭ جوباسىنىڭ نەگىزگى ماقساتى - قولدانىستاعى زاڭنامادا «پارلامەنتتىك كوپشىلىك» جانە «پارلامەنتتىك وپپوزيتسيا» ۇعىمدارىن بەكىتۋ بويىنشا قۇقىقتىق نەگىزدەردى قامتاماسىز ەتۋ.
ماسەلەن، پارلامەنتتىك وپپوزيتسياعا قانداي دا ءبىر ماسەلە بويىنشا ءوز ۇستانىمىن بىلدىرۋگە كەپىلدىك بەرۋ ماقساتىندا زاڭ جوباسىندا ساياسي پارتيالار فراكسيالارى باسشىلارىنىڭ پارلامەنت پالاتالارىنىڭ بىرلەسكەن وتىرىستارىندا، پارلامەنت ءماجىلىسىنىڭ جالپى وتىرىستارىندا، تۇراقتى كوميتەتتەردىڭ، جۇمىس توپتارىنىڭ وتىرىستارىندا، پارلامەنتتىك تىڭداۋلار مەن وزگە دە ءىس- شارالاردا ءسوز سويلەۋگە كەپىلدىك بەرىلگەن قۇقىعىن بەكىتۋ كوزدەلەدى. زاڭ جوباسىمەن پارلامەنتتىك وپپوزيتسياعا پارلامەنت ءماجىلىسىنىڭ رەگلامەنتىندە كوزدەلگەن تارتىپپەن كۇنتىزبەلىك جىلدا كەمىندە ءبىر پارلامەنتتىك تىڭداۋ وتكىزۋگە باستاماشىلىق جاساۋ، سونداي- اق پارلامەنتتىك سەسسيادا كەمىندە ەكى رەت «ۇكىمەت ساعاتتارىنىڭ» كۇن ءتارتىبىن ايقىنداۋ قۇقىعى بەرىلەدى. «كەز كەلگەن پارلامەنتتىك ءىس- شارالاردا پارلامەنتتىك كوپشىلىكتىڭ ورنى، ءرولى شەشۋ ەكەنىن جاقسى بىلەمىز. ال وسى زاڭ جوباسىنىڭ ماقساتى - پارلامەنتتىك وپپوزيتسيانىڭ قۇقىقتارىن ىسكە اسىرۋ. قوعامدى الاڭداتاتىن پروبلەمالاردى كوشەدە ەمەس، پارلامەنت قابىرعاسىندا كوتەرگەن دۇرىس دەپ سانايمىز. سول ءۇشىن وپپوزيتسياعا كەمىندە سەسسيا سايىن وزەكتى تاقىرىپتاردى پارلامەنتتىك تىڭداۋ دەڭگەيىندە كوتەرۋگە مۇمكىندىك بەرۋ كەرەك»، - پەرۋاشەۆ.
ءوز كەزەگىندە ءماجىلىس ءتوراعاسى نۇرلان نىعماتۋلين اتالعان ماسەلەگە قاتىستى پىكىر ءبىلدىردى. «مەنىڭشە، بۇل نورمانىڭ باسقا نورمالارمەن سالىستىرعاندا ۇلكەن ايىرماشىلىعى بار. ەندى زاڭ دەڭگەيىندە پارلامەنتتىك وپپوزيتسيا كەمىندە ءبىر رەت وسى ءبىزدىڭ پارلامەنتتىك تىڭداۋعا باستاماشى بولۋىنا مۇمكىندىك بەرەدى. ول بۇرىن بولماعان، سوندىقتان بۇل قادام ماڭىزدى»، - دەدى ن. نىعماتۋلين.