«ارينە، كارانتين ءوز تۇزەتۋىن ەنگىزىپ كەتتى. كوپتەگەن كاسىپورىن جۇمىسىن توقتاتتى. بۇل قاجەتتى شارا ەدى. سونىڭ ارقاسىندا ىندەتتى وقشاۋلاي الدىق. دەگەنمەن، تاۋەكەل ءالى دە قالىپ وتىرعانىمەن ەپيدەميولوگيالىق احۋال بىرتىندەپ جاقسارىپ كەلە جاتىر. تاۋلىگىنە ىندەت جۇقتىرعان 60-قا جۋىق ناۋقاستى انىقتاعان كەز بولدى. ودان كەيىن جاپپاي تەستىلەۋدى باستادىق»، - دەدى التاي كولگىنوۆ.
سونىمەن قاتار ول كوروناۆيرۋس ىندەتى تارالۋىنىڭ باسەڭدەۋىنە بايلانىستى مەملەكەتتىك كوميسسيا شەشىمىمەن بىرتىندەپ كارانتين شارالارى جەڭىلدەتىلىپ جاتقانىن ايتتى.
«ءبىراق، تۇرعىندارعا ايتارىم، بوساڭسۋعا بولمايدى. ەگەر سانيتارلىق تالاپتاردى، ياعني، ارا قاشىقتىق ۇستاۋ، ادامدار كوپ جينالاتىن جەردە ماسكا تاعۋ، قولدى ۇنەمدى جۋۋ تالاپتارىن ساقتاماساق كارانتين رەجيمىنە قايتا ورالۋىمىز مۇمكىن. مۇنى قالامايمىز. سوندىقتان سانيتارلىق جاڭا تالاپ، كارانتيندىك رەجيم تالاپتارى اياسىندا ءومىر سۇرۋگە داعدىلانۋعا ءتيىسپىز. بۇل وتە ماڭىزدى. دەگەنمەن، ەپيدەميولوگيالىق احۋالدىڭ جاقسارا تۇسۋىنە قاراي بىرتىندەپ قالىپتى ءومىر ارناسىنا تۇسەمىز دەپ ويلايمىن»، - دەدى ەلوردا اكىمى.
اۆتور: مارلان جيەمباي