زاڭ جوباسى قازاقستان رەسپۋبليكاسىنىڭ 2010 - 2020 -جىلدارعا ارنالعان قۇقىقتىق ساياسات تۇجىرىمداماسىنا سايكەس، الەۋمەتتىك ارىپتەستەرمەن جانە مۇددەلى مەملەكەتتىك ورگاندارمەن بىرلەسىپ ازىرلەندى جانە ەڭبەك قاتىناستارىن، الەۋمەتتىك ارىپتەستىكتى، ەڭبەك قاۋىپسىزدىگى مەن ەڭبەكتى قورعاۋدى رەتتەۋگە باعىتتالعان.
ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ ايتۋىنشا، قازىرگى ۋاقىتتا تەڭ ەڭبەك جاعدايلارىن قامتاماسىز ەتپەۋ بويىنشا كەمسىتۋ فاكتىلەرىنە جول بەرگەنى ءۇشىن اكىمشىلىك جاۋاپكەرلىك زاڭنامالى تۇردە جوق. وسىعان بايلانىستى زاڭ جوباسىندا جۇمىسكەردىڭ لايىقتى ەڭبەك جانە تۇرمىس جاعدايلارىنا قۇقىعىن بەلگىلەۋ ءارى اكىمشىلىك زاڭناماعا تەڭ ەڭبەك جاعدايلارىن قامتاماسىز ەتپەۋ بويىنشا كەمسىتۋ فاكتىلەرىنە جول بەرگەنى ءۇشىن جۇمىس بەرۋشىلەردى جاۋاپكەرشىلىككە تارتۋعا نەگىزدەمە ەنگىزۋ ۇسىنىلادى.
«قولدانىستاعى ەڭبەك كودەكسى بويىنشا جۇمىسكەردىڭ اسكەرگە شاقىرىلۋى ەڭبەك شارتىن توقتاتۋعا نەگىزدەمە بولىپ تابىلادى. وسىعان بايلانىستى مەرزىمدى اسكەري بورىشىن وتەپ جۇرگەن ازاماتتاردىڭ جۇمىس ورىنىن ساقتاۋ، سونداي- اق ولارعا جالاقىسى ساقتالمايتىن دەمالىس بەرۋ بويىنشا جۇمىس بەرۋشىنىڭ مىندەتتەرىن بەكىتۋ ۇسىنىلادى. بۇل رەتتە جۇمىسكەردىڭ اسكەردەن قايتىپ كەلگەن كۇننەن باستاپ ءبىر ايدىڭ ىشىندە ءوز جۇمىسىنا كىرىسۋ مىندەتى بەكىتىلەدى»، - دەدى مينيستر.
ايتۋىنشا، بۇگىندە جالاقىسى ساقتالمايتىن دەمالىس تاراپتاردىڭ كەلىسۋى بويىنشا بەرىلەدى. الايدا وتباسىنىڭ ناۋقاس مۇشەسىنىڭ كۇتىمى بويىنشا ۇزاق دەمالىس قاجەت بولعان كەزدە جۇمىسكەرلەر جالاقىسى ساقتالمايتىن دەمالىس الا الماي، سونىڭ سالدارىنان جۇمىستان شىعۋعا ءماجبۇر بولىپ جاتادى. وسى ورايدا مەديتسينالىق قورىتىندىعا سايكەس، كۇتىمدى قاجەت ەتەتىن وتباسى مۇشەسىنە كۇتىم جاساۋ ءۇشىن جۇمىسكەرلەرگە تولىق ەمەس جۇمىس ۋاقىتى رەجيمىن ەنگىزۋ ۇسىنىلادى.
«كەلىسسوزدەر جۇرگىزۋ جانە ۇجىمدىق شارتتارعا قول قويۋ بارىسىندا بارلىق جۇمىسكەرلەردىڭ پىكىرىن ەسكەرۋ ماقساتىندا، كاسىپوداق مۇشەلەرى بولىپ سانالمايتىن جۇمىسكەرلەردىڭ مۇددەلەرىن ءبىلدىرۋ بويىنشا سايلانبالى وكىلدەردىڭ وكىلەتتىگىن بەكىتۋ جوسپارلانۋدا. بۇدان بولەك جەكە ەڭبەك داۋىن رەتتەۋدىڭ سوتقا دەيىنگى ءتارتىبىن ناقتىلاۋ ماقساتىندا جۇمىس بەرۋشىگە كەلىسىم كوميسسيالارىن قۇرۋدى مىندەتتەۋ ۇسىنىلادى»، - دەدى ب. نۇرىمبەتوۆ.
اتالعان زاڭ جوباسى اياسىندا ەڭبەك شارتتارىن جاساسۋ جانە ەسەپكە الۋ پروتسەسىن اۆتوماتتاندىرۋ ماقساتىندا «ەڭبەك شارتتارىن ەسەپكە الۋدىڭ ءبىرىڭعاي جۇيەسى» دەگەن ۇعىم ەنگىزىلىپ وتىر.