بۇل تۋرالى ق ر پرەزيدەنتى قاسىم-جومارت توقايەۆتىڭ مالىمدەمەسىندە ايتىلعان، دەپ حابارلايدى قازاقپارات ءتىلشىسى.
«ءساۋىر- مامىر ايلارىندا 1,6 ميلليوننان استام ادامعا كوممۋنالدىق تولەم ءۇشىن كومەك كورسەتىلەدى. ازىق- تۇلىكتىڭ جەتكىلىكتى بولۋىنا جانە ونىڭ ساپاسىنا قاتىستى ۇدايى مونيتورينگ جۇرگىزىلۋدە. ەلىمىزدە ازىق- تۇلىك تاپشىلىعى جوق»، - دەدى قاسىم-جومارت توقايەۆ. پرەزيدەنتتىڭ اتاپ وتۋىنشە، جەرگىلىكتى بيلىك ورگاندارى الەۋمەتتىك ماڭىزى بار تاۋارلار باعاسىن باقىلاۋدا ۇستاپ وتىر.
«ءبىز ىندەتپەن كۇرەستىڭ الدىڭعى شەبىندە جۇرگەن دارىگەرلەردى قارجىلاي قولداپ جاتىرمىز. دەنساۋلىق ساقتاۋ مينيسترلىگى جانە اكىمدەر باسقا دا مەديتسينا قىزمەتكەرلەرىنە كومەك كورسەتۋ ءۇشىن شارالار قابىلداۋدا. 1,6 ميلليوننان استام ادام، 11,5 مىڭ شاعىن جانە ورتا بيزنەس وكىلى نەسيەلەرىن كەيىن تولەۋگە مۇمكىندىك الدى. بۇل جالپى العاندا 360 ميللياردتان استام تەڭگەنى قامتيدى»، - دەدى مەملەكەت باسشىسى.
اۆتور: مارلان جيەمباي