پرەزيدەنت تاپسىرماسىنا سايكەس كارانتين رەجيمى ءساۋىر ايىنىڭ سوڭىنا دەيىن ۇزارتىلعان. وسىعان بايلانىستى قوعامدىق كولىكتىڭ جۇمىسى دا توقتاتىلعان. 12-ساۋىردە ەلوردادا ينفەكتسيانى جۇقتىرعان تاعى 7 ادام تىركەلدى.
تۇرعىن ءۇي كەشەنىنىڭ 4 كىرەبەرىسى مەن جاتاقحانا كارانتينگە جابىلدى. وسىعان دەيىن كوروناۆيرۋس جەكە تاكسي جۇرگىزۋشىسىندە جانە №1-اۆتوبۋس پاركىنىڭ قىزمەتكەرىندە انىقتالدى. ولارمەن بايلانىستا بولعان بارلىق تۇلعالار انىقتالدى. بايلانىستا بولعان تۇلعالار قاتارىندا مەديتسينا قىزمەتكەرلەرى دە بار.
«13-ءساۋىر كۇنى مەملەكەت باسشىسىنىڭ تاپسىرمالارىن ورىنداۋ اياسىندا توتەنشە جاعدايلار جونىندەگى مەملەكەتتىك كوميسسيانىڭ وتىرىسى وتەدى. وتىرىستا جۇمىسىن قايتا باستاي الاتىن كاسىپورىنداردىڭ ناقتى ءتىزىمى قارالادى. كاسىپورىن قىزمەتى بىرتىندەپ جاڭارتىلادى. الايدا جۇمىسىن قايتا باستايتىن نىساندار قاتاڭ سانيتارلىق- ەپيدەميولوگيالىق رەجيمدى قامتاماسىز ەتۋگە مىندەتتى. كارانتين رەجيمىنىڭ وزگەرۋى تۋرالى اقپارات نۇر- سۇلتان قالاسى اكىمدىگىنىڭ سايتىندا شىعادى. تۇرعىندار تەك رەسمي اقپارات كوزدەرى مەن رەسمي حابارلامالارعا جۇگىنۋى قاجەت. ءتارتىپبۇزۋشىلىق فاكتىلەرى قاتاڭ تۇردە جازالانادى»، - دەپ حابارلايدى قالالىق اكىمدىكتىڭ باسپا ءسوز قىزمەتىنەن.
تۇرعىندارعا ۇيدەن شىعۋعا قاتاڭ تىيىم سالىنادى. جاقىن ماڭداعى ازىق- تۇلىك دۇكەنىنە، ءدارىحاناعا، مەديتسينالىق قىزمەت الۋ ءۇشىن جانە جۇمىسقا بارۋ ءۇشىن ۇيدەن شىعۋعا رۇقسات. «قالا تۇرعىندارى كارانتين ەرەجەلەرىن قاتاڭ ساقتاپ، بارلىق قاۋىپسىزدىك شارالارىن ۇستانۋى ءتيىس. قازىرگى تاڭدا ءبىز وسى جاعدايعا نەمقۇرايلى قاراپ جاتقان تۇرعىنداردىڭ بار ەكەنىن كورىپ وتىرمىز. كوشەدە جۇرۋگە قاتاڭ تىيىم سالىنادى. ينفەكتسيانىڭ تارالۋىنا جانە كوروناۆيرۋستىڭ ورشۋىنە جول بەرمەۋ قاجەت. ءوز دەنساۋلىعىڭىز بەن جاقىندارىڭىزدىڭ دەنساۋلىعى تۋرالى ويلاڭىز»، - دەپ اتاپ ءوتتى قالالىق شتابتا.
ادام كوپ جينالاتىن ورىندار، كينوتەاترلار، ساۋدا ويىن-ساۋىق ورتالىقتارى، كلۋبتار، مەيرامحانالار جابىق قالا بەرەدى. قوعامدىق كولىك جۇمىسى جاڭارتىلمايدى.