بۇل شارا تۋرالى پرەزيدەنتتىڭ توتەنشە جاعدايدىڭ جاريالاناتىنى تۋرالى جارلىعىندا جازىلعان، دەپ حابارلايدى قازاقپارات ءتىلشىسى.
«قوعامدىق ءتارتىپتىڭ ساقتالۋى بويىنشا اسا ماڭىزدى مەملەكەتتىك جانە ستراتەگيالىق، ەرەكشە رەجيمدىك، رەجيمدىك جانە ەرەكشە قورعالاتىن وبەكتىلەردىڭ، سونداي-اق حالىقتىڭ تىنىس- تىرشىلىگىن جانە كولىك قىزمەتىنىڭ جۇمىس ىستەۋىن قامتاماسىز ەتەتىن وبەكتىلەردىڭ كۇزەتىلۋى كۇشەيتىلسىن»، - دەلىنگەن پرەزيدەنتتىڭ جارلىعىندا.
ەسكە سالا كەتسەك بۇگىن ساعات 13.00 دە «حابار 24» ارناسىندا ونلاين رەجىمدە دەنساۋلىق ساقتاۋ ءمينيسترى ەلجان ءبىرتانوۆ قازاقستاندا كوروناۆيرۋس ينفەكتسياسىن جۇقتىرعانداردىڭ سانى 8 گە جەتكەنىن حابارلاعان ەدى.
ايتا كەتسەك بۇگىن قازاقستان رەسپۋبليكاسىندا توتەنشە جاعداي ەنگىزىلدى. بۇل تۋرالى جارلىققا ق ر پرەزيدەنتى قول قويدى. جارلىققا سايكەس ويىن-ساۋىق ورتالىقتارىنىڭ، كينوتەاترلار مەن تەاترلاردىڭ جۇمىسى توقتاتىلىپ، قازاقستان رەسپۋبليكاسىنا كەلەتىن حالىقارالىق ۇيىمدار دەلەگاتسيالارىنىڭ مۇشەلەرىن قوسپاعاندا ەل اۋماعىنا كولىكتىڭ بارلىق تۇرلەرىمەن كىرۋگە، سونداي-اق ونىڭ اۋماعىنان شىعۋعا شەكتەۋلەر بەلگىلەندى.
اۆتور: ايان بەكەن ۇلى