سمارتفون قولدانۋ بالالاردىڭ ميىنا كەرى اسەر ەتەدى
سينتسينناتي بالالار اۋرۋحاناسىنىڭ مەديتسينالىق ورتالىعىنىڭ ماماندارى گادجەتتەردى ۇزاق ۋاقىت پايدالانۋ سويلەۋ مەن جازۋ سەكىلدى قابىلەتتەرگە جاۋاپ بەرەتىن ميدىڭ اق زاتىنا كەرى اسەر ەتەتىنىن انىقتادى. عالىمداردىڭ زەرتتەۋى تۋرالى ماقالا JAMA Pediatrics جۋرنالىندا جاريالاندى.
«عالىمدار 2-3 جاس ارالىعىنداعى 47 بالانىڭ ميىن م ر ت- عا تۇسىرگەن. ولاردىڭ گادجەتتەردى پايدالانعانىنا قاراي بالالاردىڭ ميىنداعى اق زاتتا وزگەرىستەر بولاتىنى انىقتالدى. كۇنىنە ءبىر ساعاتتان ارتىق سماتفون نەمەسە پلانشەت ويناعان بالالاردىڭ مي قۇرىلىمىنىڭ دامۋىندا وزگەرىستەر بولعانى بايقالدى»، دەپ جازادى باسىلىم.
اۆتوردىڭ جازۋىنشا، عالىمداردىڭ زەرتتەۋى سمارتفونداردى پايدالانۋدىڭ زيانى تۋرالى بولجامدى دالەلدەدى.
«سمارتفوندى قولدانۋ بالا اعزاسىنىڭ دامۋىنا كەرى اسەر ەتەدى. بۇگىنگى تاڭدا اتا انالار سانالى تۇردە بالامەن ۋاقىت وتكىزۋدىڭ ورنىنا ولاردى سمارتفوندارمەن وڭاشا قالدىرادى. ءتىپتى، كەيدە تاماقتانۋ كەزىندە دە بالا سمارتفونمەن وتىرادى. بۇنىڭ سالدارى وتە جامان بولۋى مۇمكىن»، دەيدى عالىمدار.