قاۋىننىڭ پايداسى مەن زيانى

نۇر-سۇلتان. قازاقپارات - قاۋىننىڭ حوش ءيىسى مەن تاتتىلىگىنەن بولەك دەنساۋلىققا كوپتەگەن پايداسى بار. ول قۇرامىنداعى دارۋمەندەردىڭ جانە قۇنارلى زاتتاردىڭ كوپتىگىمەن پايدالى.

قاۋىن جاسۇنىققا باي. سوندىقتان ىشەكتىڭ جۇمىسىن جاقسارتادى،

قاۋىننىڭ قۇرامىندا فولات، ك دارۋمەنى جانە ماگني بار. ولار سۇيەكتىڭ ساۋلىعى ءۇشىن اسا ماڭىزدى.

 قاۋىننىڭ قۇرامىندا كالي كوپ بولعاندىقتان، ول قان قىسىمىن تومەندەتەدى.

قاۋىن سۋ جانە ەلەكتروليتتەرگە باي. ءوز كەزەگىندە ولار ورگانيزمدەگى سۇيىقتىقتىڭ تەڭگەرىمى ءۇشىن پايدالى.

قاۋىندا كوللاگەننىڭ بولىنۋىنە اسەر ەتەتىن جانە تەرىڭىزدى كۇن ساۋلەسىنەن قورعايتىن c دارۋمەنى بار. سونىمەن قاتار اسكوربين قىشقىلى يممۋنيتەتتى نىعايتادى.

 قاۋىندا ليۋتەين جانە زەاكسانتين اتالاتىن انتيوكسيدانتتار بار. ولار كوزدىڭ ساۋلىعىن ساقتاپ، كوزدىڭ كورۋىن جاقسارتادى.

قاۋىننىڭ قۇرامىندا تەمىر، كالي، كالتسي، ماگني، B، C، جانە ا توپتارىنىڭ دارۋمەندەرى كوپ. سولاردىڭ اسەرىنەن قاۋىن ىسىكتەردىڭ پايدا بولۋىنىڭ الدىن الىپ، جۇرەك- قان تامىرلار جۇيەسى اۋرۋلارى مەن ديابەتتىڭ الدىن الاتىن قۇرال بولىپ تابىلادى. سونىمەن قاتار قانداعى حولەستەرين مولشەرىن تومەندەتىپ، اتەروسكلەروزدىڭ دامۋىنىڭ الدىن الىپ، ورتالىق جۇيكە جۇيەسىن تىنىشتاندىرادى.

قاۋىننىڭ دەنساۋلىققا زيانى

بالا ەمىزەتىن ايەلدەرگە قاۋىن جەۋگە بولمايدى. سەبەبى ءسابيدىڭ اس قورىتىۋىن بۇزۋى مۇمكىن. سونىمەن قاتار قانت ديابەتى، اسقازان جانە اش ىشەك جاراسىنان زارداپ شەگەتىندەرگە دە قاۋىن زيان. سونداي- اق، ىشەك بۇزىلۋىندا دا قاۋىندى كوپ جەمەگەن ابزال.

 ەگەر بۇيرەگىڭىز بەن ءوت قابىنىڭ ساۋلىعىنا دياگنوستيكالىق تۇرعىدان كوز جەتكىزبەسەڭىز، اتالعان اعزالارىڭىزدا قۇم نەمەسە تاستىڭ بار- جوعىن بىلمەۋىڭىز مۇمكىن. مۇنداي جاعدايدا قاۋىندى كوپ جەۋ كەرى اسەر ەتىپ، وتاعا جەتكىزۋى مۇمكىن.

 قاۋىننىڭ قۇرامىندا جاسۇنىقتىڭ كوپتىگىنە بايلانىستى، ول اۋىر ءونىم بولىپ تابىلادى. ەگەر قاۋىندى ىشىمدىكپەن ارالاستىرسا، ءىش وتەتىنىن انىق. سوندىقتان قاۋىن جەگەن كەزدە سۋىق سۋ، اسىرەسە، قىشقىل ءسۇت، ايران ىشۋگە جانە يوگۋرت جەۋگە بولمايدى.

قاۋىننىڭ قۇنارلىلىعى جانە قالاي دۇرىس جەۋ كەرەك

100 گرامم قاۋىندا 34 كيلوكالوريا بار. قاۋىندى نەگىزگى استاردىڭ اراسىندا، ياعني استان ەكى ساعات بۇرىن جانە ەكى ساعات كەيىن جەگەن ءجون. كەرىسىنشە جاعدايدا، اسقازاندا اۋىرلىق سەزىمى پايدا بولادى. سونىمەن قاتار ءبىر كۇندە 300 گراممنان ارتىق قاۋىن جەمەگەن ءجون.

ءتاتتى ءارى پىسكەن قاۋىندى قالاي تاڭداۋ كەرەك

قاۋىننىڭ ءتۇسى ءوز سۇرپىنا ساي بولۋى كەرەك. ەگەر سىرتىندا جاسىل تۇستارى بولسا، پىسپەگەنىن اڭعارتادى. ال قاۋىننىڭ كەيبىر سۇرىپتارىندا وزىنە ءتان جاسىل جولاقتارى بولادى.

قاۋىننىڭ سىرتىن جاقسىلاپ قاراڭىز: ول ءبۇتىن، قارا داقتارسىز، سىزاتسىز بولۋى كەرەك. سونىمەن قاتار جارىلعان جەرلەرى بولماۋى ءتيىس. قاۋىندا باكتەريالار تەز كوبەيەدى. سوندىقتان ۇنەمدەۋ ءۇشىن بولىنگەنى قاۋىندى الۋدىڭ قاجەتى جوق.

قاۋىننىڭ قابىعىن باسىپ كورىڭىز. ول قاتتىلاۋ بولۋى كەرەك. ءبىراق تىم جۇمساق نەمەسە تىم قاتتى بولسا، باسقاسىن تاڭداعانىڭىز دۇرىس. قاۋىن پىسكەن كەزدە ونىڭ قابىعىنىڭ جاسۋشالارىنا قاتتىلىق بەرەتىن پروتوپەكتين پەكتينگە اينالىپ، قاۋىننىڭ مايەگىن جۇمسارتادى.

 قاربىز تاڭداعانداعى سياقتى، قاۋىننىڭ دا سىرتىن الاقانمەن ۇرىپ كورۋ كەرەك. ەگەر قاتاڭ دىبىس شىقسا، پىسكەنىن اڭعارتادى.

قاۋىن قانشالىقتى جاقسى پىسسە، ونىڭ قۇرامىندا حوش ءيىس بەرەتىن زاتتار دا سونشالىقتى كوپ بولادى. سوندىقتان ابدەن پىسكەن قاۋىننىڭ ءيىسى مۇرىن جارادى. ودان اناناس، ۆانيل جانە المۇرتتىڭ ارالاس ءيىسى شىعادى.

 جولدىڭ بويىندا ساتىلاتىن نەمەسە جەردە جاتقان قاۋىنداردى ساتىپ الماعانىڭىز دۇرىس. سەبەبى قاۋىننىڭ سىرتى جۇقا ءارى نازىك بولاتىندىقتان، توكسيندەر، اۋىر مەتاللدار جانە باسقا دا ۋلى زاتتاردى جىلدام ءسىڭىرىپ الادى.