باسپا ءسوز تۋرىنا قاتىسۋشىلار ۇلى دالا داڭعىلى بويىنداعى ەسىل اۋداندىق سوتىنىڭ جانىندا تۇرعان جانار-جاعارماي بەكەتىندە بولدى. مۇناي ونىمدەرىنىڭ ساپاسىن باقىلايتىن ماماندار بەكەتتەن سىناما الىپ، ونى تەكسەرۋ ءۇشىن لابوراتورياعا جىبەردى.
«مۇناي ءونىمىنىڭ ءوزى اينالىپ كەلگەندە توتىعۋعا بەيىم، دۇرىس ساقتالماسا ساپا كورسەتكىشىن جوعالتىپ الاتىن كۇردەلى حيميالىق تاۋار. مىنە، مۇنداي قيىندىققا ۇرىنباۋ ءۇشىن ءبىزدىڭ كومپانيا مۇناي ونىمدەرىنىڭ ساپاسىن تۇپكىلىكتى باقىلاۋ جۇيەسىن ەنگىزدى»، - دەدى «PetroRetail» ج ش س مۇناي ونىمدەرىنىڭ ساپاسىن باقىلاۋ ءبولىمىنىڭ باستىعى اقىلبەك سۋحانبەرديەۆ تىلشىلەرگە بەرگەن سۇحباتىندا.
ونىڭ ايتۋىنشا، بەنزيننىڭ ساپاسى زاۋىتتان شىققاننان باستاپ، ساقتاۋ، جەتكىزۋ جانە ساتۋ كەزەڭىنە دەيىن ۇنەمى تەكسەرىلىپ وتىرادى.
«ءبىزدىڭ كومپانيا وتاندىق ءۇش مۇناي-وڭدەۋ زاۋىتىنىڭ ونىمدەرىن ساتادى. بارلىق وتاندىق زاۋىت جاڭارتىلعاننان كەيىن ولاردا حالىقارالىق ستاندارتتارعا سايكەس كەلەتىن وتىن شىعارىلادى. مودەرنيزاتسيادان كەيىن ءبىز ك-4، ك-5 ەكولوگيالىق ساناتتارىنداعى جانارمايدى ساتامىز. ايىنا كەمىندە ءبىر رەت بۇكىل قازاقستان بويىنشا جانار-جاعارماي ستانتسيالارى تەكسەرىلەدى. بۇل شامامەن - 350 جانارماي بەكەتى. بۇزۋشىلىقتار ءىس جۇزىندە كوپ انىقتالمايدى. مۇناي ونىمدەرىنىڭ ءوزى توتىعۋعا بەيىم بولعاندىقتان، ەگەر قانداي دا ءبىر ولقىلىق انىقتالسا، بىزدە ول ءونىمدى قالپىنا كەلتىرۋ نورماسى بار. ونى دەرەۋ ساتۋدى توقتاتا تۇرىپ، تەكسەرىپ، قاجەت بولعان جاعدايدا ءونىمدى قالپىنا كەلتىرەمىز. تەك قالپىنا كەلتىرىلىپ، ساپا سايكەستىگى زەرتحانالىق تەكسەرۋدەن وتكەننەن كەيىن، ءبىز ونى ساتۋعا رۇقسات بەرەمىز»، - دەيدى اقىلبەك سۋحانبەرديەۆ.
ول سونداي-اق، وتاندىق بەنزيننىڭ رەسەيلىك ونىمنەن ەش كەمشىلىگى جوق ەكەنىن ايتادى.
«مامان رەتىندە ايتارىم، بارلىق زاۋىتىمىز حالىقارالىق ستاندارتتارعا سايكەس وتىن شىعارادى. بارلىق رەسەيلىك جانە قازاقستاندىق زاۋىتتار تۇپتەپ كەلگەندە وتىندى ەۋروپالىق ستاندارتتارعا سايكەس وندىرەدى. قازاقستاننىڭ جانار-جاعارماي قۇيۋ بەكەتتەرىندە ساتىلاتىن وتىننىڭ رەسەيلىك ونىمنەن ەش ايىرماشىلىعى جوق. ءدال سول رەسەيلىكتەردىڭ ءوزى ءبىزدىڭ شەكاراداعى اۋداندارعا كەلىپ، ارزانعا بەنزين ساتىپ الىپ كەتىپ جاتىر»، - دەدى ول.