ولاردىڭ ءبىرى اۆتومات اسىنىپ قاراۋىل كۇزەتىندە تۇرسا، ءبىرى بايلانىس قىزمەتىندە بولعان. ال تاعى ءبىرى كولىك جۇرگىزۋشىسى بولىپ شابۋىلعا ارالاسىپتى دەپ حابارلايدى «ك ت ك» ارناسى.
2013-جىلى ساتبايەۆ قالاسىنان سيرياعا اتتانعان دانيار التايەۆتىڭ لاقاپ اتى - ءابۋ يۋسۋف. ونىڭ كۇردتەردىڭ اۋىلىنا شابۋىل جاساعاندا جاياۋ اسكەردى الىستان بۇركەمەلەپ تۇراتىن كولىگى بولىپتى.
ۇستىنە ورناتىلعان پۋلەمەتتى نۇرلان ەسىمدى تاعى ءبىر قازاق اتىپ وتىرعان ەكەن. ول ۇرىس دالاسىندا كوز جۇمعان دا، دانيار وڭ قولىنان جارالانىپ اۋرۋحاناعا تۇسكەن. كەيىن تاعى وڭ اياعىنان جارالانعان ول قازىر اياعىنا تەمىر سالىنعان كۇيى ءجۇر.
سۇراۋعا الىنعان ەكىنشى سوتتالۋشى داۋرەن ءسابيت ۇلى بالالاردى وقىتۋ، جەسىر ايەلدەرگە كومەكتەسۋمەن اينالىسا ءجۇرىپ، كۇزەت قىزمەتىندە دە بولعان.
تەلەارنانىڭ مالىمەتىنشە، جالپى، سوتتالۋشىلار ءبىر-ءبىرىن تانىسا دا، جاقىن ارالاسپاعانىن ايتقان. تەك كىمنىڭ قانداي قىزمەت اتقارعانىنان حاباردار. ولار تەك سيرياعا بارعانىن، سوعىسقا قاتىسقانىن عانا مويىندايدى. ءبىراق لاڭكەستىك توپ قۇرىپ، ونى باسقاردى، ەلدى تەرروريزمگە شاقىردى دەگەن ايىپتاۋلارمەن كەلىسپەيدى.
كەيبىرى ءتىپتى «اللاھۋ اكباردى» نە ءۇشىن ايتىپ جۇرگەنىن دە بىلمەيدى دەپ حابارلايدى تەلەارنا.