ەگەر الكوتەستەر 0.5 پروميللەدەن تومەن بولسا، جۇرگىزۋشى ماس ادام سانالمايدى. ‰0-0.5 اراسىنداعى كورسەتكىشكە ءدارى- دارمەك، ەندوگەن الكوگول سەبەپ بولۋى مۇمكىن. ال 0.5 پروميللەدەن جوعارى بولسا، جۇرگىزۋشى جاۋاپقا تارتىلادى. اكىمشىلىك قۇقىق بۇزۋشىلىق كودەكسىنىڭ 608-بابى.
1. كولىكتى الكوگول، ەسىرتكى، ۋىتقا ماس كۇيىندە باسقارسا، جۇرگىزۋشى كۋالىگىنەن 3 جىلعا ايىرىلادى.
2. ءدال سول ارەكەت اپاتقا سەبەپ بولسا، جۇرگىزۋشى كۋالىگىنەن 4 جىلعا ايىرىلادى.
3. ءدال سول ارەكەت جابىرلەنۋشىنىڭ دەنساۋلىعىنا قىلمىستىق جازا بەلگىلەرى جوق زيان كەلتىرسە نەمەسە كولىك قۇرالدارىن، جۇكتەردى، جول قۇرىلىستارى مەن وزگە دە قۇرىلىستاردى نە وزگە مۇلىكتى بۇلدىرۋگە سەبەپ بولسا، جۇرگىزۋشى كۋالىگىنەن 5 جىلعا ايىرىلادى.
4. 1,2,3 بولىمدەگى ارەكەت اكىمشىلىك جازا مەرزىمى وتكەننەن كەيىن ءبىر جىل ىشىندە قايتالانسا، جۇرگىزۋشى كۋالىگىنەن 6 جىلعا ايىرىلادى جانە 15 تاۋلىككە اكىمشىلىك قاماققا الىنادى.
5. وسى باپتىڭ ءتورتىنشى بولىگىندەگى اكىمشىلىك جازا مەرزىمى وتكەننەن كەيىن ءبىر جىل ىشىندە قايتالانسا، جۇرگىزۋشى كۋالىگىنەن 10 جىلعا ايىرىلادى جانە 30 تاۋلىككە اكىمشىلىك قاماققا الىنادى.
6. وسى باپتىڭ 1,2,3 بولىمىندەگى ارەكەتتى كولىك قۇرالدارىن باسقارۋ قۇقىعى جوق ادامدار جاساسا، 20 تاۋلىككە اكىمشىلىك قاماققا الىنادى.
7. وسى باپتىڭ التىنشى بولىگىندەگى اكىمشىلىك جازا مەرزىمى وتكەننەن كەيىن ءبىر جىل ىشىندە قايتالانسا، 30 تاۋلىككە اكىمشىلىك قاماققا الىنادى.
8. وسى باپتىڭ 6,7 بولىمدەرىندەگى ارەكەتتى اكىمشىلىك قاماققا الۋ جازاسى قولدانىلمايتىن ادامدار جاساسا، 200 اەك ايىپپۇل سالىنادى.
اكىمشىلىك قاماۋعا الۋ جازاسى قولدانىلمايتىن ادامدار:
- جۇكتى ايەل؛ - 14 جاسقا جەتپەگەن بالا تاربيەلەپ وتىرعان انا؛ - 1,2 توپ مۇگەدەكتەرى؛
- كامەلەتكە تولماعاندار؛
- 58 جاستان اسقان ايەلدەر جانە 63 جاستان اسقان ەركەكتەر. اكىمشىلىك قۇقىق بۇزۋشىلىق كودەكسىنىڭ 613-بابى.
4. ىشكى ىستەر، اسكەري پوليتسيا ورگاندارى قىزمەتكەرىنىڭ بەلگىلەنگەن تارتىپكە ساي اعزاداعى الكوگول، ەسىرتكى جانە ۋىتقۇمارلىقتى تەكسەرۋ تۋرالى زاڭدى تالابىن ورىنداماسا، جۇرگىزۋشى كۋالىگىنەن 3 جىلعا ايىرىلادى. بۇل - قازىرگى اكىمشىلىك قۇقىق بۇزۋشىلىق كودەكسىندەگى زاڭ.
پرەزيدەنت قاسىم- جومارت توقايەۆ اتالعان جازالاردى قاتاڭداتۋدى تاپسىردى. بۇل تۋرالى ول Twitter جەلىسىندەگى پاراقشاسىندا جازدى.
«زاڭعا وزگەرتۋلەر ەنگىزۋدى تاپسىردىم: الكوگولدى ىشىمدىكتەردىڭ كەز كەلگەن ءتۇرىن ىشكەن كۇيىندە كولىك جۇرگىزگەنى ءۇشىن، سونداي- اق مال ۇرلىعى ءۇشىن بەرىلەتىن جازانى قاتاڭداتۋ قاجەت»، - دەپ جازدى توقايەۆ.
بۇعان قاتىستى ق ر ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ ماجىلىستەگى وتىرىس كۋلۋارىندا كولىكتى ماس كۇيدە ايداعانداردىڭ جازاسى قالاي كۇشەيتىلەتىنىن ايتتى. «مەملەكەت باسشىسىنىڭ تاپسىرماسىن، زاڭنامادا قالىپتاسقان ولقىلىقتاردى ەسكەرە وتىرىپ، بۇل باپتار بويىنشا سانكتسيالاردى قاتايتۋ مۇمكىندىگىن زەرتتەپ جاتىرمىز. ازاماتتاردىڭ كولىكتى كۋالىكسىز جۇرگىزەتىن، زاڭ بۇزعانى ءۇشىن كولىك جۇرگىزۋ قۇقىعىنان ايىرىلعاننان كەيىن دە اۆتوكولىككە وتىراتىن جاعدايلارى كوپ»، - دەدى ول.
Massaget.kz