تارازدا تۇرمە قورشاۋىنان ەسىرتكى اسىرىپ لاقتىرعان ايەل ۇستالدى

21 -قازاندا قالاداعى توتەنشە قاۋىپسىزدىك رەجىمىندەگى تۇزەۋ مەكەمەسىنىڭ باربولوۆ كوشەسى جاعىن تورۋىلداپ جۇرگەن ايەل ادام نەگىزگى قورشاۋدى اسىرىپ تاس لاقتىرعانداي بولادى. كۇدىك تۋدىرعان قيمىلدى زەردەلەۋ بارىسىندا جەدەل- رەجىم توبى ىشكى كۇزەت اۋماعىنان ءتۇرى تاسقا ۇقساس زاتتى تابادى. تەكسەرە كەلە ونىڭ تاس ەمەستىگى، سۇرعىلت- قوڭىر تۇستەس جەرگە ۇقساس ەرمەكسازدان جاسالعاندىعى انىقتالىپ، ىشىنەن 2,48 گرام قويۋ جاسىل كەپتىرىلگەن ەرەكشە ءيىستى وسىمدىك تابىلدى.

«بۇل فاكتى بويىنشا 44 جاسار تارازدىق ازاماتشانى ءتىنتۋ كەزىندە وڭ قالتاسىنان گازەتكە ورالعان 3,82 گرام مولشەرىندە وسى تەكتەس زات تابىلدى. سوت- حيميالىق تالداما بارىسىندا ونىڭ «كەپتىرىلگەن ماريحۋانا» ەكەندىگى دالەلدەندى. مۇنىمەن قويماي، كۇدىكتى ازاماتشادان 7,384 گرام «ترامادول»، 0,634 گر «سومنول» جانە 2 قۇتى «تروپيكاميد» اتتى ەسىرتكى تەكتەس دارىلىك زاتتارى الىندى»، دەيدى وبلىستىق پوليتسيا دەپارتامەنتىنىڭ باسپا ءسوز قىزمەتىنىڭ جەتەكشىسى گۇلسارا مۇحتارقۇلوۆا.

كۇدىكتىدەن تابىلعان دارىگەردىڭ قاتاڭ رەتسەپتىمەن عانا بەرىلەتىن ءدارى- دارمەككە ونىڭ وڭاي قول جەتكىزگەندىگى سۇراق تۋىنداتىپ، قازىرگى تاڭدا وسىعان بايلانىستى تالداپ-تەرگەۋ امالدارى جۇرگىزىلۋدە.

اۆتور: عيبرات سەمباي