مينيستر بيىل كوپبالالى وتباسىلارعا قانشا پاتەر بەرىلەتىنىن ايتتى

بۇل تۋرالى ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ءمالىم ەتتى، دەپ حابارلايدى قازاقپارات ءتىلشىسى.

«2017-2018 -جىلدارى 369,8 مىڭ شارشى مەتر جالعا بەرىلەتىن تۇرعىن ءۇيدى (6797 پاتەر) ىسكە قوسۋ جوسپارلانعان، ءىس جۇزىندە 429,2 مىڭ شارشى مەتر (7750 پاتەر) پايدالانۋعا بەرىلدى (57,2 ميلليارد تەڭگە ءبولىندى). 2019 -جىلى حالىقتىڭ الەۋمەتتىك جاعىنان وسال توپتارىن 6002 جالعا بەرىلەتىن پاتەرمەن قامتاماسىز ەتۋ جوسپارلانعان. بۇل باعىتتا 32,8 ميلليارد تەڭگە ءبولىندى»، - دەدى مينيستر پارلامەنت ماجىلىسىندە «نۇرلى جەر» باعدارلاماسىنىڭ جۇزەگە اسىرىلۋىنا ارنالعان ۇكىمەت ساعاتىندا.

بۇدان باسقا، ەلباسىنىڭ تاپسىرماسى بويىنشا 2025 -جىلعا دەيىن 40 مىڭ جالعا بەرىلەتىن تۇرعىنجاي نەمەسە جىل سايىن كوپبالالى وتباسىلار ءۇشىن 6 مىڭ پاتەر سالۋ جوسپارلانعان. وسى ماقسات ءۇشىن 7 جىلدىڭ ىشىندە 350 ميلليارد تەڭگە كوزدەلگەن، ياعني جىل سايىن 50 ميلليارد تەڭگەدەن.

«تۇرعىن ۇيگە كەزەكتە 38 مىڭ وتباسى تۇر. 3 وڭىردە: تۇركىستان (5937)، الماتى (5093) وبلىستارىندا، نۇر-سۇلتان قالاسىندا (3409) كوپ بالالى وتباسىلاردىڭ سانى كوپ. كوپبالالى وتباسىلاردىڭ تۇرعىن ءۇي ماسەلەلەرىن تەز ارادا شەشۋ ءۇشىن مامىر ايىنان باستاپ بارلىق قارجىلاندىرۋ كوزدەرىنەن 3046 باسپانا بەرىلدى. اكىمدىكتەردىڭ دەرەكتەرى بويىنشا ۇستىمىزدەگى جىلى كوپبالالى وتباسىلارىنا بارلىق كوزدەردەن 8 مىڭنان اسا پاتەر بەرۋ جوسپاردا»، - دەدى بەيبىت اتامقۇلوۆ.

اۆتور: رۋسلان عابباسوۆ