«تاۋەكەل توبىنا جاتاتىن ازاماتتار تىركەلگەن جەرىندەگى ەمحانادا نەمەسە جىلجىمالى بريگادالار ارقىلى تەگىن ەگىلەدى. اكىمدىك رەسەيدە شىعارىلعان «گريپپول پليۋس» ۆاكسيناسىنىڭ 100 مىڭ داناسىن ساتىپ الدى. ۆاكسينانى اقىلى تۇردە سالدىرعىسى كەلەتىن تۇرعىندار قالالىق ەمحانالار مەن جەكە مەديتسينالىق ۇيىمدارعا جۇگىنە الادى. ولاردىڭ ءتىزىمى نۇر- سۇلتان قالاسىنىڭ تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ Facebook جەلىسىندەگى پاراقشاسىندا كورسەتىلگەن» ، - دەدى اكىمدىكتەن.
ۆاكسيناتسيامەن 7210 مەديتسينالىق قىزمەتكەر، 33789 بالا (6 جاستان اسقان، ديسپانسەرلىك تىركەۋدە تۇرعان جانە ءجيى اۋىراتىن) ، جابىق مەكەمەلەردەگى 370 بالا (بالالار ءۇيى، تۇزەتۋ مەكتەپ- ينتەرناتى، جەتىمدەر ءۇيى، بالالار قالاشىعى) ، مەديتسينالىق- الەۋمەتتىك مەكەمەدەن 270 ادام (قارتتار ءۇي) ، ەكىنشى نەمەس ءۇشىنشى كەزەڭدەگى جۇكتىلىگى بار 6000 ايەل، سوزىلمالى اۋرۋمەن تىركەۋدە تۇرعان 52361 ادام قامتىلادى.
«ۆيرۋس جىل سايىن مۋتاتسياعا ۇشىرايتىندىقتان، ءبىر رەت اۋىرىپ ءومىرىنىڭ سوڭىنا دەيىن يممۋنيتەتكە يە بولۋعا بولمايدى. وتكەن جىلى تۇماۋعا قارسى الىنعان يممۋنيتەت بيىلعى جىلدىڭ ۆيرۋسىنان قورعاي المايدى. سوندىقتان ۆاكسينانى جىل سايىن الىپ وتىرعان ءجون. يممۋنيتەت 14 كۇننىڭ ىشىندە قالىپتاسىپ، بارلىق ماۋسىم ىشىندە ساقتالادى (12 اي) . ۆاكسينانى قازان جانە قاراشا ايلارىندا الۋ ۇسىنىلادى» ، - دەدى نۇر- سۇلتان قالاسىنىڭ تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ءسادۋاقاس بايعابىلوۆ.
ايتا كەتەيىك، تۇماۋ ۆيرۋسى ينفەكتسيالانعان ادامنان تۇشكىرۋ نەمەسە جوتەل كەزىندە اۋا ارقىلى تاراتىلادى. سونداي- اق ەسىك تۇتقاسى، ويىنشىقتار، ليفت باتىرماسى، قاعاز اقشا، قول الىسۋ كەزىندە بەرىلۋى مۇمكىن.