«بىزدە ترانسپلانتولوگيا - مەديتسينا مەن حيرۋرگيالىق سالا رەتىندە دامىپ كەلەدى. جالپى، ءبىزدىڭ حيرۋرگتەر ترانسپلانتاتسيانىڭ بارلىق تۇرلەرىن مەڭگەرگەن. ءبىراق، ترانسپلانتاتسيانىڭ قاجەتتىلىكتەرىن قامتاماسىز ەتپەۋ ماسەلەسى بار. بۇل - قارجىلاندىرۋ ەمەس، دونورلىق ماتەريالدىڭ شەكتەلىپ قالۋىنا بايلانىستى پروبلەمالار. بۇل جەردە اڭگىمە، البەتتە، ءىرى دونورلىق تۋرالى ايتىلىپ وتىر. زاڭنامالىق تۇرعىدا بارلىق كەدەرگىلەر جويىلعان. ءبىراق، قوعامدا قايتىس بولعان ادامنىڭ دەنەسىن كەسۋگە تۋىستارى قارسى شىعىپ جاتادى. ايتسە دە، بارلىق ءدىني قاۋىمداستىقتار بۇل تۇرعىدا ءبىزدى قولدايدى»، - دەدى ۇكىمەتتىڭ باسپا ءسوز ورتالىعىنداعى باسپا ءسوز ءماسليحاتىندا ەلجان ءبىرتانوۆ.
ءمينيستردىڭ ايتۋىنشا، مۇسىلمان ەلدەرىندە اعزا دونورلىعى جاقسى جولعا قويىلعان.
«دەسە دە، ءبىزدىڭ ەلدىڭ مادەني ەرەكشەلىكتەرىنە ساي، دونورلىقتىڭ ازدىعىنا قاتىستى پروبلەما بار. دارىگەرلەر ترانسپلانتاتسيانى جۇرگىزۋگە قورقادى. ويتكەنى، تۋعان- تۋىستارى بۇعان قارسى. ءتىپتى دارىگەرلەردى سوتپەن قۋدالاۋ جاعدايى دا تىركەلگەن. زاڭ بويىنشا، ءتىرى كەزىندە ادام اعزاسىن دونورلىققا بەرۋدەن باس تارتپاسا، كوپتەگەن ەلدەردەگى تاجىريبەگە ساي ونىڭ دونورلىققا كەلىسىم بەرگەنىن بىلدىرەدى. دەسە دە، حالىق ىشىندە ءتيىستى ءتۇسىندىرۋ جۇمىستارىن جۇرگىزۋ كەرەكتىگىن ۇعىپ وتىرمىز»، - دەدى ەلجان ءبىرتانوۆ.
ءمينيستردىڭ ايتۋىنشا، د س م حالىققا ءتۇسىندىرۋ جۇمىستارىن جۇرگىزۋ بويىنشا كونكۋرس وتكىزۋدەن باس تارتقان.
«ويتكەنى، بۇل كونكۋرسقا ەشكىم قاتىسقىسى كەلمەيدى. سول سەبەپتى، ءبىز ۇكىمەتتىك ەمەس ۇيىمدارمەن بىرگە جۇمىس جۇرگىزۋدەمىز»، - دەدى ەلجان ءبىرتانوۆ.
اۆتور ايان بەكەن ۇلى