ەرىنەن ايىرىلعان كەلىنشەك سول ءبىر زۇلمات ۋاقىتتى كوز جاسىنسىز ەسىنە المايدى.
ايەلدىڭ باسىنان كەشكەن وقيعاسىن الماتىداعى وڭالتۋ ورتالىعىنىڭ ماماندارى جازىپ العان.
ساعيدا قان توگىسكە تولى سيريانىڭ توپىراعىن ءبىرىنشى رەت 2013-جىلى باسقان.
ونىڭ كۇيەۋى 1 جىل بۇرىن بارعان.
جات ەلگە كەلە سالىسىمەن ءبىرىنشى كەزدە ءبارى جاقسى بولعان. كەيىن الاساپىران دۇنيە باستالدى.
«بىزدە بالامىز جوق ەدى. ول جاقتا كۇيەۋىم قارسى الدى. جىلاپ-ەڭىرەپ، ايتەۋىر، جەتتىك-اۋ سيرياعا! العاشىندا ءبارى جاقسى بولدى. كەيىن كيشمادان باعۋزعا دەيىن قاتتى قيىندىق كوردىك. جاياۋ اسكەر كورمەدىك، اۋىر ارتيللەريا بولدى ول جەردە. اسىرەسە، اۋەدەن بومبالاۋ قورقىنىشتى ەدى…»، - دەيدى ايەل.
كۇيەۋى 3 جىلدان سوڭ بومبانىڭ استىندا قالىپ، كوز جۇمعان.
جالعىز قالۋدان قورىققان ساعيدا رەسەيدىڭ ءالي دەگەن قازاعىمەن باس قوسادى. كۇردتەردىڭ لاگەرىنە اپارار جولدا ول كۇيەۋىنەن اداسىپ قالادى. كەيىن بۇل كۇيەۋى قۇقىق قورعاۋ ورگاندارىنىڭ قۇرىعىنا تۇسكەنىن بىلەدى.
«كۇيەۋىم بۇگىندە تۇرمەدە وتىر. ەكى كۇيەۋىم دە د ا ي ش- تىڭ قۇرامىندا بولدى. ءبىز كىشكەنە قاتەلىك جىبەردىك، اسىعىستىق جاساپپىز. ول جاقتا نە بولىپ جاتقانىن كوزىمىزبەن كوردىك. ساياسات ول جاقتا، مۇنايعا تالاسىپ جاتىر. تۇسىنبەي جۇرگەن «باۋىرلارعا» اسىعىستىق جاساماڭدار دەر ەدىم. ول جاقتا باسقا ەلدەردەن كەلگەندەرگە جامان قارايدى. ارابتاردىڭ تاماقتارى توق، اقشاسى بار. ال بىزدەر، جان-جاقتان كەلگەندەر، اشىقتىق، اقشامىز بولمادى. مەن بالانىڭ ۇلكەنىمىن. مەن جوقتا اكەم قايتىس بولىپتى. ونى وسى جاڭا ەستىپ وتىرمىن… انام بار. ءبىزدى ەلگە الدىرعان ەلباسىعا، پرەزيدەنتكە راقمەت! قانشا ءسابيدىڭ، ايەلدەردىڭ ءومىرىن ساقتاپ قالدى. وتە رازىمىن»، - دەدى ول.
ايەل جات ەلدەن مۇگەدەك بوپ ورالدى. سۋعا شىققاندا سودىرلاردىڭ جاۋدىرعان وعىنىڭ استىندا قالعان. قاڭعىعان وق ايەلدىڭ سان سۇيەگىن شاعىپ كەتكەن. سونىڭ كەسىرىنەن ساعيدا قازىر ارباعا تاڭىلعان.
الايدا ول سۇيەگىندەگى تەمىرلەرىن العان سوڭ جۇمىس ىستەپ ەلگە پايداسىن تيگىزۋ نيەتىن دە جاسىرمادى.
«مەن بۇرىن تىگىنشى بولعانمىن. ەمدەلىپ العان سوڭ ەشكىمگە سالماعىمدى سالماي، جۇمىس ىستەگىم كەلەدى. ۇكىمەت ءبىزدى سيريادان اكەلۋگە قىراۋار اقشا جۇمسادى، وتە ىڭعايسىز»، - دەدى ساعيدا.
سيرياعا كەتكەن وتانداستارىمىز بۇگىندە ەلباسى نۇرسۇلتان نازاربايەۆتىڭ قولداۋىمەن «جۋسان» وپەراتسياسى ارقىلى ەلگە قايتىپ جاتىر.
وسى ۋاقىتقا دەيىن «جۋسان-1» وپەراتسياسىنان - 47 ادام، «جۋسان-2» وپەراتسياسىنىڭ ارقاسىندا - 231 ادام، «جۋسان-3» وپەراتسياسى ارقىلى 300 گە جۋىق ادام ەلگە قايتقان. «جۋسان-4» وپەراتسياسىنىڭ ارقاسىندا قانشا ادام كەلگەنى ناقتى بەلگىسىز.
ق ر ءبىلىم جانە عىلىم ۆيتسە-ءمينيسترى بيبىگۇل اسىلوۆا حابارلاعانداي، بۇگىندە 506 بالا سيريادان قايتىپ كەلدى. قازىرگى تاڭدا ەلىمىزدە جاس وسپىرىمدەردى قولداۋعا ارنالعان 15 الەۋمەتتىك-پسيحولوگيالىق، قۇقىقتىق ورتالىق جۇمىس ىستەپ تۇر. ورتالىقتا تاۋلىك بويى ستاتسيوناردا 14 بالالى 4 انا بار. قالعاندارى كۇندىزگى ستاتسيوناردا. 254 بالا مەكتەپكە دەيىنگى تاربيەمەن قامتىلعان. ياعني، ول بالالار مەكتەپكە دەيىنگى ۇيىمدارعا بارىپ ءجۇر.
مەكتەپتەردە 153 بالا وقىپ جاتىر. سونداي-اق جەتىم قالعان 33 بالا بار. ولار جەتىمدەرگە ارنالعان ۇيىمدارعا تاراتىلدى.
اۆتور: گۇلميرا عوسمانالي