وندا سۋيتسيدكە پوليتسەيلەردى كىنالاعان اقپاراتتار شىندىققا سايكەس كەلمەيتىنى ايتىلعان، دەپ حابارلايدى قازاقپارات ءتىلشىسى.
ايتا كەتەيىك، جۋىردا ب ا ق-تا اتالمىش وقيعاعا قاتىستى اقپارات جارىق كورىپ، وندا مارقۇمنىڭ جۇبايى الەكساندرا مينگاليموۆا جولداسىنىڭ ولىمىنە پوليتسيا قىزمەتكەرلەرىن كىنالاعان. «جازىقسىز جالا جاۋىپ، ءوز-وزىنە قول جۇمساۋعا دەيىن جەتكىزدى»، - دەگەن ا. مينگاليموۆانىڭ جانايقايى الەۋمەتتىك جەلىدە تالقىعا تۇسكەن بولاتىن. الايدا، وبلىستىق پوليتسيا دەپارتامەنتى ازاماتشانىڭ قۇقىققورعاۋ ورگاندارىنا ارتقان ايىبى نەگىزسىز ەكەندىگىن اتاپ ءوتتى.
بايزاق اۋدانىنىڭ تۇرعىنى دميتري مينگاليموۆ اعىمداعى جىلدىڭ 31 -ناۋرىزىندا سەكسۋالدىق سيپاتتاعى زورلىق-زومبىلىق جاساعانى ءۇشىن ۇستالعان بولاتىن. سوتقا دەيىنگى تەرگەۋ بارىسىندا ونىڭ قىلمىسى جابىرلەنۋشىنىڭ جانە 4 كۋاگەردىڭ ايعاعىمەن، سونداي-اق جابىرلەنۋشىنىڭ دەنەسىندەگى دەنە جاراقاتىمەن راستالعان. سونىمەن قاتار، قىلمىس ورنىندا كۇدىكتىنىڭ ۇيالى تەلەفونى تابىلعان.
كۇدىكتىنى تەرگەۋ ارەكەتتەرىنىڭ بارلىعى زاڭ شەڭبەرىندە ونىڭ قورعاۋشىسىنىڭ قاتىسۋىمەن جۇرگىزىلگەن. ونىڭ تۇراقتى تۇراتىن جەرىنىڭ، وتباسىنىڭ جانە كامەلەتكە تولماعان ەكى بالاسىنىڭ بولۋىن ەسكەرە وتىرىپ، ول «كەلۋ تۋرالى مىندەتتەمەمەن» ۋاقىتشا بوساتىلعان. الايدا، كەلەسى كۇنى تالاس وزەنىنىڭ ماڭىنان، سارىكەمەر اۋىلىنا جاقىن جەردەن د. مينگاليموۆتىڭ ءمايىتى تابىلعان. كۇدىكتىنىڭ ءوز-وزىنە قول جۇمساعانى انىقتالدى.
وقيعا بولعان جەردى قاراۋ كەزىندە حات تابىلىپ، وندا مارقۇم ءوز ولىمىنە پوليتسيا قىزمەتكەرلەرىن ايىپتاعان.
«اتالعان وقيعاعا قاتىستى پوليتسيا قىزمەتكەرلەرى تاراپىنان قۇقىقبۇزۋشىلىقتار انىقتالعان جوق، تولىق جانە وبەكتيۆتى تەرگەۋ جۇرگىزىلدى. جامبىل وبلىسى پ د وزىندىك قاۋىپسىزدىك باسقارماسى وزىنە- ءوزى قول جۇمساۋعا جەتكىزۋ فاكتىسى بويىنشا سوتقا دەيىنگى تەرگەۋ جۇرگىزىپ، ءبىرقاتار سوت ساراپتامالارى تاعايىندالدى.
مارقۇمنىڭ دەنەسىنەن جۇبايى ايتقانداي ەلەكتروشوكەرلەردىڭ ىزدەرى، سونداي-اق تەرگەۋدىڭ رۇقسات ەتىلمەگەن ادىستەرىن قولدانۋدان پايدا بولعان دەنە جاراقاتتارى انىقتالمادى. سونىمەن قاتار، مارقۇمنىڭ قانىندا الكوگول تابىلدى. اعىمداعى جىلدىڭ 30 ماۋسىمىندا تەرگەۋ قورىتىندىسى بويىنشا پوليتسيا قىزمەتكەرلەرىنە قاتىستى قىلمىستىق ءىس قىلمىس قۇرامىنىڭ بولماۋىنا بايلانىستى توقتاتىلدى»، - دەدى وبلىستىق پوليتسيا دەپارتامەنتى باسپا ءسوز قىزمەتىنىڭ جەتەكشىسى گۇلسارا مۇحتارقۇلوۆا.
سونىمەن قاتار، قۇزىرلى ورگاننىڭ حابارلاماسىندا اعىمداعى جىلدىڭ 2 -تامىزىنداعى مامانداندىرىلعان تەرگەۋ سوتىنىڭ قاۋلىسىمەن ءمايىتتى قوسىمشا ساراپتامالىق زەرتتەۋ ءۇشىن ەكسگۋماتسيالاۋدى جۇرگىزۋ قاجەتتىلىگى تۋرالى، سونداي-اق قىلمىستىق ءىستى توقتاتۋدى زاڭسىز دەپ تانۋ تۋرالى جەكە شاعىم قاناعاتتاندىرۋسىز قالدىرىلعاندىعى ايتىلعان.
اۆتور: عيبرات سەمباي