بۇل جونىندە سەناتتىڭ باسپا ءسوز قىزمەتىنە سىلتەمە جاساپ قازاقپارات حابارلايدى.
كەزدەسۋ بارىسىندا وڭىرلىك ىنتىماقتاستىق، پريەۆەنتيۆتى ديپلوماتيانى نىعايتۋ، ايەلدەر مەن جاستار باستامالارىنا قولداۋ كورسەتۋ ماسەلەلەرى تالقىلاندى.
سەنات ءتوراعاسى قازاقستاننىڭ ب ۇ ۇ باستامالارىن قولدايتىنىن، ەلىمىز ءۇشىن ۇيىم مەن ونىڭ قۇرىلىمدىق مەكەمەلەرىمەن قارىم- قاتىناس ورناتۋ سىرتقى ساياساتتىڭ باسىم باعىتتارى ەكەنىن اتاپ ءوتتى.
«ءبىز ب ۇ ۇ باسشىلىعىنا قازاقستاننىڭ حالىقارالىق باستامالارىنا تۇراقتى قولداۋ ءبىلدىرىپ وتىرعانى ءۇشىن ريزاشىلىعىمىزدى بىلدىرەمىز. وعان باس حاتشى ا. گۋتەريشتىڭ 2016 -جىلعى قازاقستانعا ساپارى ايقىن دالەل» ، - دەدى د. نازاربايەۆا.
ءوز كەزەگىندە ناتاليا گەرمان قازاقستان الەمدە ەكونوميكالىق جانە الەۋمەتتىك دامۋدىڭ تاڭعاجايىپ مودەلى رەتىندە قابىلداناتىنىن ايرىقشا اتاپ ءوتتى.
«قازاقستان بەيبىتشىلىك، تۇراقتىلىق جانە قاۋىپسىزدىك ىسىنە زور ۇلەس قوسىپ كەلەدى. ءبىز مۇنى وتە جوعارى باعالايمىز. ءسىزدىڭ ەلىڭىزدىڭ ماڭىزدى ستراتەگيالىق جوبالارعا بەلسەندى قاتىسىپ كەلە جاتقانىن كورىپ وتىرمىز. سوندىقتان قازىر قازاقستاننىڭ ورتالىق ازيا ەلدەرىنىڭ ايەلدەر ۇيىمى جەلىسىن قۇرۋعا قاتىسقانىڭىزدى قالايمىز. مەنى وسى يدەياعا ءسىزدىڭ اۋعانستانداعى ايەلدەردىڭ قۇقىعى مەن مۇمكىندىگىن كەڭەيتۋ بويىنشا وتكىزگەن وڭىرلىك كونفەرەنتسياسى شابىتتاندىردى» ، - دەپ اتاپ ءوتتى ن. گەرمان.
داريعا نازاربايەۆا بۇل باستاماعا قولداۋ بىلدىرەتىنىن جەتكىزدى.
«ايەلدەر قاۋىمىن مەملەكەتتىك باسقارۋعا قاتىستىرۋ، ەكونوميكالىق جانە الەۋمەتتىك ومىرگە ارالاستىرۋ مۇمكىندىگىن كەڭەيتۋدى قولداۋ قاجەتتىگى ءسوزسىز. وسى جىلى ءبىزدىڭ پالاتامىزعا سەناتور ايەلدەر قوسىلدى. بۇل وتە جاقسى. ءبىراق ونىمەن توقتاپ قالمايمىز. ەلىمىزدە نازىك جانداردى ناتيجەلى جۇمىسپەن الەۋمەتتىك كوتەرمەلەۋ - باسىم باعىت بولىپ وتىر» ، - دەدى سەنات سپيكەرى.
سونداي- اق، كەزدەسۋ بارىسىندا جاستار ماسەلەسى ءسوز بولدى. ن. گەرماننىڭ ايتۋىنشا، بۇگىنگى كۇنى ورتالىق ازيا وڭىرىندە 29 جاسقا دەيىنگى 50 پايىزدان استام جاستار ءومىر ءسۇرىپ جاتىر. سوندىقتان بيىلعى جىلى ونىڭ باسشىلىعىمەن جاستار اراسىنداعى پريەۆەنتيۆتى ديپلوماتيانى دامىتۋعا قولداۋ كورسەتۋ جونىندەگى ورتالىق قۇرىلاتىن بولادى.
داريعا نازاربايەۆا وڭىرلىك ورتالىقتىڭ وسى سالادا اتقارىپ وتىرعان جۇمىستارىن جوعارى باعالادى.
«ءوڭىر جاستارى ءۇشىن پريەۆەنتيۆتى اكادەميانى ىسكە قوسۋدى جوسپارلاپ وتىرعانىڭىزدى بىلەمىز. بۇل باستاما ءبىزدىڭ ەلىمىزدىڭ جاستار ساياساتىنا ساي كەلەدى، سونىقتان ءبىز ءۇشىن وتە قىزىقتى. وزىڭىزگە بەلگىلى، وسى جىلى ەلباسى ن. نازاربايەۆتىڭ باستاماسىمەن جاستار جىلى بولىپ جاريالاندى. جاستار جىلىندا ەلدى، مەملەكەتتى دامىتۋدا جاس بۋىنعا ايرىقشا، شەشۋشى ءرول جۇكتەلىپ وتىر دەپ سەنەمىز. ولاردى جۇمىسقا ورنالاستىرۋعا، بيزنەس- ستارتاپتاردى قولداۋعا، ۆولەنتەرلىك قىزمەتتى ىنتالاندىرۋعا باعىتتالعان باعدارلامالار بار» ، - دەپ اتاپ ءوتتى داريعا نازاربايەۆا.
سونىمەن قاتار تاراپتار ب ۇ ۇ- نىڭ وڭىرلىك ورتالىعىمەن ترانسشەكارالىق سۋ رەسۋرستارىن بىرلەسىپ پايدالانۋ مەن قولدانۋ سالاسىنداعى جۇمىسىن تالقىلادى.
«قازاقستاندا ەكولوگيا، گەولوگيا جانە تابيعي رەسۋرستار مينيسترلىگى قۇرىلدى. جاڭا ەكولوگيالىق كودەكس تە ازىرلەنىپ جاتىر. مۇنىڭ بارلىعى دا ورتالىق جۇمىسىمەن ۇندەسەدى. ورتالىق ازيا ەلدەرىمەن بىرلەسىپ، سۋ- ەكولوگيا پروبلەمالارىن شەشۋگە سەپتىگىن تيگىزەتىن كوپ جىلدىق ستراتەگيا ازىرلەۋ قاجەت دەپ سانايمىز» ، - دەدى داريعا نازاربايەۆا.