ەلباسىنىڭ رەسمي سايتىنداعى اقپاراتقا سۇيەنسەك، كەنشىلەر ءوز حاتىندا كاسىبي مەرەكەمەن قۇتتىقتاعانى جانە تاۋ-كەن سالاسىن دامىتۋعا ەرەكشە كوڭىل بولگەنى ءۇشىن ن. نازاربايەۆقا العىس بىلدىرگەن.
«اسا قادىرلى ەلباسى! كاسىبي مەرەكەمىزبەن قۇتتىقتاعان جىلى لەبىزىڭىز ءۇشىن شىن جۇرەكتەن العىس بىلدىرەمىز. ءسىزدىڭ ەگەمەن ەلىمىزدىڭ تاۋ-كەن سالاسىن دامىتۋعا ءارقاشان ەرەكشە كوڭىل بولەتىنىڭىز قۋانتادى. قازاقستاننىڭ بارلىق كەنشىلەرى حالىقتىڭ ءال-اۋقاتىن ارتتىرۋعا جانە ءومىر ءسۇرۋ ساپاسىن جاقسارتۋعا باعىتتالعان يگى باستامالارىڭىزدى تولىق قولدايدى. ءبىز، ەڭبەك ادامدارى، ءارقاشان كوشباسشىمىز - ءسىز ءۇشىن جانە وتانىمىز - قازاقستان ءۇشىن قورعان بولامىز. ءبىز ءسىزدىڭ ساليقالى باسشىلىعىڭىزدىڭ ارقاسىندا ەلىمىزدىڭ تاۋەلسىزدىك جىلدارى قول جەتكىزگەن جەتىستىكتەرىن باعالايمىز»، - دەلىنگەن حاتتا.
سونداي-اق كەنشىلەر قازاقستاندا بارلىق جاعداي جاسالعانىن ايتقان. ماسەلەن، ساپالى جولداردىڭ بولۋى، جاستار ءۇشىن تۇرعىن ۇيلەردىڭ سالىنۋى، ولاردىڭ ەلىمىزدىڭ جانە دۇنيەجۇزىنىڭ ەڭ ۇزدىك وقۋ ورىندارىندا ءبىلىم الۋ مۇمكىندىگى، مەديتسينانىڭ دامۋى اتاپ وتىلگەن. ەڭ باستىسى، ادامدارعا جۇمىس ىستەۋگە جانە تابىس تابۋعا مۇمكىندىك مول.
«قيىن-قىستاۋ كەزەڭدەرگە قاراماستان، ءبىز ءارقاشاندا سىزگە جانە ەلىمىزگە ادال بولدىق. ءدال ءسىزدىڭ، نۇرسۇلتان ءابىش ۇلى، قازاقستاندى عالامات بيىكتەرگە جەتەلەيتىنىڭىزگە كامىل سەندىك. بۇگىن ءسىزدىڭ ولشەۋسىز ەڭبەگىڭىزگە شەكسىز ريزامىز. ءسىز ءبىزدىڭ كوشباسشىمىز، ءبىزدىڭ - ەلباسىمىزسىز! تۋعان جەرىمىزدەگى بەيبىت اسپان مەن تۇراقتىلىقتىڭ يگىلىگى ءۇشىن ءبىز ءاردايىم ءسىزدىڭ ارتىڭىزدان ەرە بەرەتىن بولامىز!»، - دەلىنگەن جەدەلحاتتا.