تۇركىستان وبلىسىنىڭ اكىمى ءومىرزاق شوكەيەۆ ءتوراعالىق ەتكەن جيىندا ءار سەكتورداعى قۇرىلىس جۇمىستارى باياندالدى.
قۇرىلىس باسقارماسى باسشىسىنىڭ ورىنباسارى ەربول احمەتوۆتىڭ سوزىنشە، ارىس قالاسىندا ورنالاسقان 7، 8، 9، 10 جانە 11-سەكتورلاردا جالپى زاقىمدالعان ۇيلەردىڭ سانى 2971. ونىڭ ىشىندە، جوندەۋدى قاجەت ەتەتىن 2563 جەكە جانە 73 كوپقاباتتى تۇرعىن ۇيلەر، سونىمەن قاتار، جاڭادان سالىنىپ جاتقان 335 ءۇي بار. ماسەلەن، تۇركىستان وبلىسىنا تيەسىلى 7-سەكتوردا زاقىمدالعان 478 ءۇي تىركەلگەن. بۇگىنگى كۇنگە جوندەۋدى قاجەت ەتەتىن جەكە جانە كوپقاباتتى تۇرعىن ۇيلەردە جۇمىستار تولىق اياقتالدى.
«شىمكەنت قالاسىنا تيەسىلى 10-سەكتوردا - 636 ءۇي بار بولسا، بۇگىنگى كۇنگە جوندەۋدى قاجەت ەتەتىن 8 جەكە جانە 2 كوپقاباتتى ءۇيدىڭ سىرتقى جانە ىشكى ارلەۋ جۇمىستارى قولعا الىنعان. ال باتىس قازاقستان وبلىسىنا قاراستى 11-سەكتوردا 627 ءۇي بار. بۇگىنگى كۇنگە جوندەۋدى قاجەت ەتەتىن 107 جەكە جانە 2 كوپقاباتتى ءۇيدىڭ سىرتقى جانە ىشكى ارلەۋ جۇمىستارى جۇرگىزىلۋدە. اعىمداعى جىلدىڭ 20-قىركۇيەگىندە بارلىق ۇيلەر پايدالانۋعا تاپسىرىلادى» ، - دەدى ەربول احمەتوۆ قالادا وتكەن اپپاراتتىق جيىندا.
ونىڭ ايتۋىنشا، جاڭادان قۇرىلىسى جۇرگىزىلىپ جاتقان 100 ۇيدە ءتيىستى جۇمىستار جۇرگىزىلۋدە. شىعىس قازاقستان وبلىسىنا قاراستى 8-سەكتوردا 537 ءۇي بار بولسا، جوندەۋدى قاجەت ەتەتىن 65 ءۇيدىڭ سىرتقى جانە ىشكى ارلەۋ جۇمىستارى جۇرگىزىلۋدە. جاڭادان قۇرىلىسى جۇرگىزىلىپ جاتقان 5 ءۇيدىڭ بارلىعىندا ءتيىستى جۇمىستار اتقارىلۋدا.
سونداي-اق، جيىندا تۇركىستان وبلىسىنىڭ مەملەكەتتىك ساۋلەت-قۇرىلىس باقىلاۋى باسقارماسىنىڭ باسشىسى مۇحيت تۇرىسبەكوۆ قۇرىلىس-جوندەۋ جۇمىستارىنىڭ تالاپقا ساي ءجۇرىپ جاتقاندىعىن جەتكىزدى.
ءوز كەزەگىندە ءومىرزاق شوكەيەۆ جوندەۋ جۇمىستارىن جەدەلدەتىپ، قۇرىلىسى باياۋلاپ جاتقان سەكتورلار بويىنشا ارنايى كوميسسيا قۇرۋدى تاپسىردى. سالا ماماندارىنا بارلىق جۇمىستاردى قاتاڭ باقىلاۋعا الۋ قاجەتتىگىن اتاپ ءوتتى.