الماگۇل 20 جىلعا جۋىق ءبىر شاڭىراق استىندا ءومىر سۇرگەن جۇبايىنىڭ كىشكەنتاي بالاسىمەن بىرگە ءبىر كۇندە ۇيدەن قۋىپ شىققانىن تۇسىنە الار ەمەس.
«ەنەم قايتىس بولعانشا تىنىش ءومىر سۇردىك. ودان كەيىن جالعىز ۇلىمىزدان ايىرىلىپ قالدىق. جولداسىم اراققا سالىنا باستادى. مەن بەسىنشى ءسابيدى دۇنيەگە اكەلدىم. دۇنيەگە كەلگەن ءسابيدىڭ قىز ەكەنىن بىلگەن جولداسىم مەنى ۇيگە كىرگىزبەدى. ۇلكەن قىزدارىمدى كورۋگە مۇمكىندىك بولمادى، سەبەبى ولاردى وزىممەن بىرگە الىپ كەتۋگە باسپانام جوق. ءوزىمنىڭ انام كورشى وبلىستا تۇرادى، جاعدايىمدى ايتىپ، كوڭىل-كۇيىن تۇسىرگىم كەلمەيدى. اتىراۋدان تۇراقتى جۇمىس تاپقىم كەلگەنمەن، بالامدى قارايتىن ادام جوق، ونىڭ ۇستىنە پاتەر جالداۋعا دا قاراجاتىم جەتپەيدى»، - دەپ مۇڭىن ايتتى اتىراۋ تۇرعىنى.
اتىراۋ وبلىسى پوليتسيا دەپارتامەنتى جەرگىلىكتى پوليتسيا قىزمەتى ايەلدەردى زورلىق-زومبىلىقتان قورعاۋ توبىنىڭ ەرەكشە تاپسىرمالار جونىندەگى اعا ينسپەكتورى بيبىگۇل تولەگەنوۆا ءتۇرلى تاعدىردىڭ كۋاسى بولعان. پوليتسيا پودپولكوۆنيگى ب. تولەگەنوۆا قۇقىقتىق ءتۇسىندىرۋ جۇمىستارىن جۇرگىزسە، ينسپەكتور سامال سۋپالييەۆا بالالى انانى الماگۇل ىقشاماۋدانىنداعى داعدارىس ورتالىعىنا ورنالاستىرۋ ءۇشىن قۇجاتتاردى تولتىردى.
داعدارىس ورتالىعىنىڭ ماماندارى پوليتسەيلەرمەن بىرگە نەكە كۋالىگىن قايتا جاساپ، سودان كەيىن بالانىڭ تۋۋ تۋرالى كۋالىگىن راسىمدەۋگە كىرىسەدى.
داعدارىس ورتالىعىندا ايەلدەر بالاسىمەن بىرگە 6 اي تەگىن تۇرا الادى، وسى ۋاقىت ىشىندە اياققا تۇرىپ، تۇراقتى جۇمىس تابۋىنا مول مۇمكىندىك بار.
«بالامدا «راحيت» اۋرۋىنىڭ العاشقى بەلگىلەرى بار، ونى ەمدەپ، الداعى ۋاقىتتا قالعان قىزدارىممەن دە قاۋىشاتىن بولامىن»، - دەيدى داعدارىس ورتالىعىنا ورنالاسقان الماگۇل.
پوليتسيا دەپارتامەنتىمەن مەموراندۋمعا كەلىسكەن ازاماتتىق بىرلەستىكتەر قازىرگى ۋاقىتتا الماگۇلگە قامقورلىق تانىتۋدى جوسپارلاپ وتىر، كيىم-كەشەك جانە تۇرمىسقا قاجەتتى زاتتارمەن قامتاماسىز ەتۋدە.
ايتا كەتەلىك، اتىراۋدا جارتى جىلدىڭ ىشىندە پوليتسيادان 400 دەن استام ايەل كومەك سۇراعان. ونىڭ ىشىندە 16 ايەل مەن كامەلەت جاسىنا تولماعان 31 بالا جان-جاقتى قامقورلىق كورسەتەتىن مەملەكەتتىك مەكەمەگە ورنالاستىرىلدى.