كوپبالالى انالارعا ارنالعان ءىس-شارا اياسىندا تىگىن جانە قولدانبالى ونەر بويىنشا تەگىن شەبەرلىك سىنىپتارى ۇيىمداستىرىلدى، دەپ قالا اكىمدىگىنىڭ رەسمي سايتى حابارلادى.
ءىس- شارا ەلوردا كۇنى قارساڭىندا قالا اكىمدىگىنىڭ باستاماسىمەن «اسىل انا» جوباسى اياسىندا ۇيىمداستىرىلىپ وتىر.
ەلىمىزدىڭ تۇكپىر-تۇكپىرىنەن جينالعان كوپبالالى انالار 6-10 -ماۋسىم ارالىعىندا وتكەن «اسىل انا» سەمينار-ترەنينگتەرىنەن العان بىلىمدەرىن ورتاعا سالادى. ولار ءوز جۇمىستارىن كورمەگە قويىپ، جۇرتشىلىق نازارىنا ۇسىندى. شارانىڭ اشىلۋىنا نۇر-سۇلتان قالاسىنىڭ اكىمى التاي كولگىنوۆ جانە قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ قاتىستى.
جيىنعا قاتىسقان قالا اكىمى التاي كولگىنوۆ ايەل انا تەك وتباسىنىڭ بەرەكە-بىرلىگىن ويلايتىن تۇلعا عانا ەمەس، ومىرگە جانە ەلىمىزدى دامىتۋ جۇمىستارىنا بەلسەندى ارالاساتىن قوعام مۇشەسى ەكەنىن اتاپ ءوتتى. ءسوز اراسىندا ول قازىرگى ۋاقىتتا ايەلدەردىڭ ەكونوميكالىق مۇمكىندىكتەرى كەڭەيىپ جاتقانىن، ولاردىڭ بەلسەندىلىگى اسىرەسە شاعىن جانە ورتا بيزنەس سەكتورىندا بايقالاتىنىن جەتكىزدى. ال شەبەرلىك ساعاتىن ۇلتتىق قولونەر بۇيىمدارىن شىعاراتىن ەتنو- ديزاينەر، ق ر پرەزيدەنتىنىڭ «التىن ساپا» سىيلىعىنىڭ لاۋرەاتى، «قۇرمەت» وردەنىنىڭ يەگەرى ىرزا تۇرسىنزادا وتكىزدى. ول وسى سالانىڭ قۇپيالارىمەن، جەكە كاسىپتى اشۋدىڭ قىر-سىرىمەن ءارى ونى الەۋمەتتىك جەلىلەردە جۇرگىزۋ ادىسىمەن ءبولىستى.
«ەجەلگى داستۇرلەرىمىزدى جاڭعىرتۋ ارقىلى جوعارى جەتىستىكتەرگە جەتەمىز. بۇگىنگى كورمەگە قويىلعان دۇنيەلەرگە ءمان بەرسەك، ۇلكەن ەڭبەكتى عانا ەمەس قولونەر قازاق ايەلدەرىنىڭ قانىندا بارىن بايقاۋعا بولادى. ءبىز ءتورت جىل بويى قايىرىمدىلىق اياسىندا شەبەرلىك ساعاتىن وتكىزۋمەن اينالىسىپ كەلەمىز. بۇگىندە ەلوردادا ۇلتتىق قولونەرمەن اينالىسىپ، 500 مىڭ قارجى تاباتىن انالار بار. ولار ءوز ەڭبەگىمەن باستاعان بيزنەسى ارقىلى قارجى تاۋىپ، تابىسقا جەتۋ مۇمكىن ەكەنىن ىسپەن كورسەتتى»، - دەدى ىرزا تۇرسىنزادا.
قاتىسۋشىلار ديپلومدارمەن ماراپاتتالدى، سونداي-اق 50 ايەلگە تىگىن ماشيناسى مەن وزگە دە باعالى سىيلىقتار تابىس ەتىلدى.
Kaz.tengrinews.kz