وسى شارادا 8 رەت قۇرساق كوتەرگەن ەلوردالىق «التىن القا» يەگەرى دە بولعان. قازاقپارات ءتىلشىسى ءبىر قولىمەن بەسىك تەربەتىپ، ءبىر قولىمەن كورپە تىگىپ جۇرگەن ءاسيا وسپانقۇلوۆادان ۋاقىتىن قالاي ءتيىمدى ۇيىمداستىرىپ جۇرگەنىن سۇراپ ءبىلدى.
قازاقتا ءتالىمى مول ءبىر ءتامسىل بار. ءسابي دۇنيەگە كەلەردە «ولاق ايەلدىڭ ەكى قولىن، پىسىق ايەلدىڭ ءبىر قولىن بايلايمىن» دەيتىن كورىنەدى. 40 جاسىندا سەگىز قۇرساق كوتەرىپ، ءبىر قولىنا بەسىك، ءبىر قولىنا ۇرشىق ۇستاعان ەلوردالىق ءاسيا وسپانقۇلوۆانى كورگەندە وسى ءتامسىل ەرىكسىز ەسكە ءتۇستى.
ول كوپبالالى انالاردىڭ «كورپە Fest» اتتى رەسپۋبليكالىق فەستيۆالىنە اۋرۋحانادا جاتقان جەرىنەن بوساپ كەلىپتى. ناقتىراق ايتساق، شىمكەنتتەگى اۋرۋحانادا ونىڭ جولداسى جاتىر. بۇل سونىڭ كۇتىمىمەن جۇرگەن.
«ۇستازىمىز ىرزا تۇرسىنزادا تەلەفون شالىپ، نۇر- سۇلتاندا كورمە وتەدى دەگەن سوڭ ۇشاقپەن جەتىپ كەلدىم. جولداسىم - ەكىنشى توپتاعى مۇگەدەك. سونىڭ كۇتىمىمەن اۋرۋحانادا جۇرگەنمىن. كورپە تىگۋدى 4 كۇننىڭ ىشىندە مەڭگەرىپ الدىم. بۇگىنگى كورمەگە العاشقى تۋىندىمدى اكەلىپ وتىرمىن»، - دەيدى ءاسيا.
كوپبالالى انانىڭ ەلورداعا قونىس اۋدارعانىنا 15 جىل بولىپتى. قازىرگى تۇركىستان وبلىسىنىڭ ورداباسى اۋدانىنا قاراستى تورتكۇل دەگەن جەردە بالالىق شاعى قالعان. قازىر سەگىز بالامەن پاتەر جالداپ تۇرادى. نەگىزگى جۇمىسى مەكتەپتە. وندا وقۋشى قىزدارعا قولونەردەن ساباق بەرەدى.
«تىگىنشىلىككە باياعىدان يكەمىم بار. اجەمنەن قالعان قاسيەت ەكەن. ءبىراق ۇلتتىق ناقىشتا كورپە تىگىپ، قۇراق قۇراپ كورمەپپىن. ءىستى وڭاي الىپ كەتۋىمە سول كۇندەلىكتى ماشىعىم كومەكتەستى»، - دەيدى ءوزى.
مەكتەپتەگى جۇمىس، ونداعى قالىڭ قۇجات، سەگىز بالانىڭ كۇتىمى. وسىنىڭ بارىنەن قولونەرگە ۋاقىت تاۋىپ جۇرگەن انا بالانىڭ كوپتىگى ەشقاشان قولبايلاۋ بولمايتىنىن ايتادى.
«ءوزىم 13 بالانىڭ ىشىندە وسكەنمىن. ۇلكەندەرىمىز كىشىلەرگە قاراپ، اتا-انانىڭ قاداعالاۋىنسىز-اق ءوسىپ-جەتىلگەن ەدىك. ەندى ءوز بالالارىم دا سولاي ءوسىپ جاتىر. تۇڭعىشىم انا اتانىپ ۇلگەرسە، ەڭ كىشىسى ءالى بىرگە دە تولعان جوق. وسىنىڭ ءبارى ەرتە ۇيلەنگەننىڭ ارقاسىندا ءبىر جاعىنان. شاڭىراق كوتەرگەندە مەن 18 دە، جولداسىم 20 دا بولاتىن. قازىر بالالار ءبىر-ءبىرىن كيىندىرىپ، تاربيەلەپ كەلەدى. ۇلتتىق قولونەر قولىما بايلاۋ بولمايتىن سياقتى. كەرىسىنشە، شارشاعانىمدى ۇمىتتىرىپ، شابىت سىيلاپ ءجۇر»، - دەيدى ءاسيا.
كەيىپكەرىمىز ءىس تىگۋگە قاجەت ويۋ تۇرلەرىن ينتەرنەتتەن ەمەس، تابيعاتتان ىزدەيدى ەكەن.
«بالا كۇنىمىزدەن اۋىلدا وستىك. باۋ-باقشا ەگىپ، تابيعات قۇشاعىندا جۇردىك. قاراپ وتىرساڭىز، قازاقتىڭ ويۋ-ورنەگىنىڭ ءبارى تابيعاتتان الىنعان عوي. مەن دە سويتەمىن. اسپان الەمى، جازيرا دالا، شۇرقىراعان مال، تاكاپپار ءتۇز تاعىلارى. وسىنىڭ ءبارى كەسكىندەمە ءۇشىن سارقىلمايتىن قاينار سياقتى. قيالىڭدى ويات تا، الا بەر. ۇستازىمىز ىرزا اپا بىزگە ۇنەمى بىرەۋدىڭ كوشىرمەسى بولماۋ كەرەكتىگىن ايتىپ كەلەدى. سول ءۇشىن ينتەرنەت اقتارا بەرمەيمىن»، - دەيدى كوپبالالى انا.
ءاسيا وسپانقۇلوۆا العاشقى كورپەلەرىن الەۋمەتتىك جەلىگە جۇكتەگەن ساتتە-اق قىزىعۋشىلار پايدا بولىپتى.
«قازىردىڭ وزىندە تاپسىرىس ءتۇسىپ جاتىر. سۇندەت تويعا قاجەت كورپە جابدىقتارىن جاساۋىم كەرەك. ۇلكەن قىزىم دا تىگىنگە بەت بۇرىپ ءجۇر. يكەمى جامان ەمەس سياقتى. ەكەۋلەپ ول تاپسىرىستى دا ۋاقىتىندا ورىنداپ تاستايمىز. ىرزا اپامىز «ەڭبەكتەرىڭنىڭ باعاسىن بىلىڭدەر» دەگەندى ءجيى ايتادى. قولدان تىگىلگەندىكتەن، تابيعي ءونىم رەتىندە جاقسى باعالانادى. ەگەر تۇبەگەيلى اينالىسسا، ۇلتتىق قولونەردىڭ كومەگىمەن-اق سەگىز بالانى ەمىن-ەركىن اسىراۋعا بولادى. ءبىراق وعان جولداسىم كونبەيدى. ءوزىڭدى شارشاتپاي-اق، بالالارعا قارا دەيتىنى بار. ءوزى زاڭگەر. سونداي قوساعىم بولعانىنا شۇكىر»، - دەيدى ءاسيا.