ادەتتەگىدەي، ساياباقتاردا، پاركتەردە، تۇرعىن الاپتارىندا ءتۇرلى مەرەكەلىك شارالار ۇيىمداستىرىلادى. قازاقپارات اكىمدىككە سىلتەمە جاساي وتىرىپ ەلوردا قانداي مەرەكەلىك شارالار وتەتىندىگىن حابارلايدى.
4- شىلدەدە ەلوردادا يگى داستۇرگە اينالعان بىرنەشە فەستيۆال وتەدى. بۇل كۇنى «ازيا جاڭعىرىعى» حالىقارالىق سيرك ونەرى فەستيۆالى اشىلادى. كورەرمەندەر الەمنىڭ تۇكپىر-تۇكپىرىنەن كەلگەن سيرك مايتالماندارىنىڭ ونەرىن تاماشالايدى.
باعدارلاماعا ۇيرەتىلگەن اڭدار، اۋە گيمناستشىلارى، ەكۆيليبريستەر، سايقىمازاقتار مەن ت. ب. ەنگىزىلدى. سونداي-اق، فەستيۆالگە قاتىسۋشىلاردىڭ ءداستۇرلى شەرۋى ۇيىمداستىرىلادى.
سونىمەن قاتار، 4- شىلدەدە اكىمدىك الدىنداعى قالالىق الاڭدا «شاتتىق» حالىقارالىق بالالار شىعارماشىلىعى فەستيۆالىنىڭ شىمىلدىعى اشىلادى. كىشكەنتاي ونەرپازدار ءان سالىپ، ءبي بيلەيدى، ءسان كورسەتىلىمىنە قاتىسادى. شىلدەنىڭ 4 ءى مەن 6 سى ارالىعىندا ەلوردالىق الاڭداردا X «استانا سامالى» ۇرمەلى اسپاپتار وركەسترلەرى فەستيۆالى باستالادى.
6- شىلدە كۇنى تاڭەرتەڭ شاراعا قاتىساتىن وركەسترلەردىڭ شەرۋى وتەدى. سودان كەيىن قالالىق الاڭدا قالا تۇرعىندارى مەن قوناقتارىنىڭ نازارىنا پلاتس-كونسەرت ۇسىنىلادى. ءان سۇيەر قاۋىم 5-6- شىلدەدە كاراوكەدەن «ءبارى دە ءان شىرقايدى!» چەمپيوناتىنا قاتىسادى.
بالالار مەن ەرەسەكتەر ءان ايتۋدان جارىسادى. حالىقتىق كاراوكە ەسىل وزەنىنىڭ جاعاسىنداعى امفيتەاتردا وتەدى. ۇلى قازاق اقىندارى مەن جاس جازۋشىلاردىڭ شىعارماشىلىعىمەن ەتەنە تانىسقىسى كەلەتىن جاندار ءۇشىن ەلوردادا «نۇر-سۇلتان - ەلىمىزدىڭ باس قالاسى، جاستار - بولاشاقتىڭ باستاماسى!» اتتى كىتاپ پەن پوەزيا كەشى ۇيىمداستىرىلادى.
5- شىلدەدە اباي ەسكەرتكىشىنىڭ جانىندا اباي وقۋلارى، مانەرلەپ وقۋشىلار بايقاۋى، كىتاپ كورمەسى ءوتىپ، تەاترلاندىرىلعان قويىلىمدار كورسەتىلەدى. وسى كۇنى قالالىق الاڭدا «International Street dance Session in Astana» حالىقارالىق كوشە ءبيى فەستيۆالى ءوز كورەرمەندەرىن كۇتەدى.
جينالعان قاۋىم ءبي بيلەۋدەن توپتىق جارىستار مەن جەكپە-جەكتەر تاماشالايدى. مۇنىمەن قوسا، ەكسپو اۋماعىنداعى جازعى ساحنادا The Spirit of Eurasia 2019 حالىقارالىق زاماناۋي ەتنيكالىق مۋزىكا فەستيۆالى وتەدى. مۇندا ارتيستەر ونەر كورسەتىپ قانا قويماي، شەبەرلەردىڭ ەتنيكالىق قالاشىعى مەن جارمەڭكە اشىلادى.
6- شىلدەدە پرومىشلەننىي، ينتەرناتسيونالنىي، جەلەزنودوروجنىي، پريگورودنىي، ۇركەر، كوكتال-1 تۇرعىن الاپتارىندا بۇكىل وتباسىعا ارنالعان «دۋماندى سارىارقا» مەرەكەلىك باعدارلاماسى كوپشىلىك نازارىنا ۇسىنىلادى.
شارا اياسىندا ەسترادا جۇلدىزدارى ونەر كورسەتىپ، مۋلتفيلمدەردىڭ كەيىپكەرلەرىنىڭ كيىمىن كيگەن انيماتورلار كىشكەنتاي ەلوردالىقتارعا كوتەرىڭكى كوڭىل كۇي سىيلايدى. مەرەكەلىك باعدارلامادا سپورت سۇيەر قاۋىمعا ارنالعان شارالار دا قاراستىرىلعان. ولاردىڭ قاتارىندا «بولاشاق اڭىز تۇلعالار» اتتى كاسىپقوي بوكس كەشى دە بار.
6- شىلدەدە «بارىس ارەنا» مۇز ايدىنى سارايىندا كەشتىڭ باستى جەكپە-جەگىن بۇعان دەيىن جەڭىلىس تاپپاعان قازاقستاندىق بىلعارى قولعاپ شەبەرى جانقوش تۇراروۆ وتكىزەدى. ەلوردا كۇنىنە ارنالعان سالتاناتتى شارالار لەگىن ۇلتتىق دومبىرا كۇنىنە ارنالعان كونسەرت اياقتايدى.
شارا 7- شىلدەدە «قازاق ەلى» مونۋمەنتىنىڭ الدىنداعى الاڭدا ساعات 12.00 وتەدى. سونىمەن قاتار، وسى كۇنى كەشكە ساعات 17.00 امفيتەاتردا ونەر سۇيەر قاۋىم «ناعىز قازاق دومبىرا» اتتى كونسەرتتى تاماشالايدى.
مەرەكەنىڭ سوڭعى كۇندەرى 7-8- شىلدەدە امفيتەاتر ساحناسىندا تاي ارتيستەرى «تاي تۇندەرى» اتتى كونسەرتتىك باعدارلاماسىن ۇسىنادى. بۇل شارا - تايلاند كورولدىگىنىڭ قازاقستانداعى ەلشىلىگىنىڭ ەلوردا كۇنىنە تارتقان سىيى. سونداي-اق، كونسەرت نۇر-سۇلتان مەن بانگكوك قالالارىنىڭ باۋىرلاستىق قارىم-قاتىناسىنىڭ 15 جىلدىعىنا ورايلاستىرىلعان.
ەلوردا كۇنىنە ارنالعان مەرەكەلىك شارالار تۋرالى تولىق اقپارات www.astanaday.kz رەسمي سايتىندا جاريالانعان.