بۇگىن ول جۇمىس ساپارىمەن ناۋرىزباي اۋدانىندا بولدى، دەپ حابارلايدى قازاقپارات ءتىلشىسى.
اۋداندى ارالاعان كەزدە قالا باسشىسى اكىمشىلىك ورتالىقتا بولدى. مۇندا ول اۋداندى دامىتۋدىڭ پەرسپەكتيۆالىق جوسپارىمەن جانە نەگىزگى الەۋمەتتىك- ەكونوميكالىق كورسەتكىشتەرىمەن تانىستى. ناۋرىزباي اۋداندىق حقو كەلۋشىلەرىمەن مەملەكەتتىك قىزمەت كورسەتۋدىڭ ساپاسىن ارتتىرۋ ماسەلەسىن تالقىلادى.
سونىمەن قاتار، الماتى اكىمى «شۇعىلا» شاعىناۋدانىندا سالىنىپ جاتقان تۇرعىن ءۇي كەشەنىن كوردى. اۋلانى ارالاعان كەزدە ب. ساعىنتايەۆ تۇرعىندارمەن تىلدەستى جانە الداعى بولاتىن اپپارات وتىرىسىندا مولتەك اۋداندى اباتتاندىرۋ ماسەلەسى قارالاتىنىن اتاپ ءوتتى.
«ناقتى جوسپار ازىرلەۋدەمىز. وعان جاۋاپتىلاردى بەلگىلەيمىز، ولاردىڭ تەلەفوندارى مەن اتى- جوندەرى جازىلعان تاقتايشالاردى ىلەمىز. سول ارقىلى تۇرعىندار كىمنىڭ قاي ۋچاسكەگە تىكەلەي جاۋاپتى ەكەنىن بىلەتىن بولادى. ءومىر ءسۇرۋ ءۇشىن جايلى جاعداي جاساۋ - ءبىزدىڭ باستى مىندەتىمىز»، - دەدى الماتى اكىمى.
سونىمەن قاتار، باقىتجان ساعىنتايەۆ «اقساي» فيلتر ستانساسىندا بولدى. مۇندا ول سۋمەن قامتۋدىڭ اعىمداعى جاعدايى مەن جوسپارى تۋرالى ەسەپتى تىڭدادى. تاۋسامالى، اقجار، قۇرامىس شاعىن اۋداندارىندا سۋ تاسىمالىن ۇلعايتۋدى تاپسىردى.
«اۋدان ءالى جاس، ونىڭ قالاعا قوسىلعانىنا نەبارى بەس جىل تولدى. مۇنداعى جەكە سەكتور ۇلكەن، ادامداردىڭ قالا ستاندارتى بويىنشا ءومىر سۇرگىسى كەلەدى. سوندىقتان قازىردەن باستاپ ءتيىستى باسقارلامالار مەن اۋدان اكىمدىگى بىرگە وسى باعىتتار بويىنشا جۇمىستى كۇشەيتۋى ءتيىس»، - دەدى باقىتجان ساعىنتايەۆ.
قالا باسشىسى اۋدان اكىمى سانجار توعايعا بۇگىن بەرىلگەن تاپسىرمالاردىڭ ورىندالۋ بارىسىن كۇندەلىكتى تەكسەرۋدى جانە جۇمىس ءجۇرىپ جاتقان ۋچاسكەلەردە ۇنەمى ءوزى ءجۇرۋدى تاپسىردى. قالا اكىمى اباي داڭعىلى بويىن ياسساۋي كوشەسىنەن قالا شەكاراسىنا دەيىن ۇڭگىلەۋ جۇمىسىمەن جانە ءاشىموۆ كوشەسىنىڭ قيىلىسىنا سالىنىپ جاتقان جولايرىعى قۇرىلىسىنىڭ بارىسىمەن تانىستى.