قازىر شاشتىڭ ساۋلىعىنا ارنالعان ءتۇرلى سالوندىق پروتسەدۋرالار بار. ءبىراق حالىقتىق مەديتسينا دا ءوز تيىمدىلىگىن دالەلدەپ كەلەدى. شاشتى قاتايتۋعا جانە وسىرۋگە كومەكتەسەتىن حالىقتىق قۇرالدىڭ ءبىرى - قىزىل بۇرىش. قىزىل بۇرىشتى قۇرامى جانە ادام اعزاسىنا بەلسەندى اسەرى ءۇشىن ەمدىك ماقساتتا رەسمي تۇردە دە، حالىقتىق مەديتسينادا دا كەڭىنەن قولدانادى.
قىزىل بۇرىش قورەكتىك زاتتارعا باي: ونىڭ قۇرامىندا قاجەتتى دارۋمەندەر مەن مينەرالدار، اقۋىزدار، كومىرسۋلار، قانىققان مايلى قىشقىلدار، الكالويدتار (سونىڭ ىشىندە، قاتەرلى ىسىككە قارسى اسەرى بار كاپسايتسين) ، ەفير مايلارى جانە ت. ب بار.
c دارۋمەنى قىزىل بۇرىشتا ليمونعا قاراعاندا 3,5 ەسە كوپ. كۇيدىرگىش قىزىل بۇرىشتىڭ ەمدىك قاسيەتى ونىڭ قۇرامىنداعى كاپسايتسينمەن تۇسىندىرىلەدى: ول جۇيكە ۇشتارىنان ميعا بەلگى بەرەتىن زاتتارعا اسەر ەتەدى. قىزىل بۇرىشپەن ماسكا دايىندايدى، ماسساج جاسايدى، سەلليۋليتتى ەمدەيدى جانە شاش تۇسۋدەن قورعايدى.
قىزىل بۇرىش كەپتىرىلگەن كۇيىندە دە ءوز قاسيەتتەرىن ساقتايتىندىعىمەن ەرەكشەلەنەدى. سوندىقتان بالعىن جانە قۇرعاق قىزىل بۇرىشتى قولدانا بەرۋگە بولادى. بۇرىش تۇنباسىن دايىنداۋ 2 بالعىن نەمەسە 3 قۇرعاق بۇرىشتى وتە ۇساقتاپ تۋرايدى. وعان 200 م ل سپيرت قۇيادى. تۇنبانى قۇرعاق ءارى قاراڭعى جەردە 1 اپتا ۇستايدى. قىزىل بۇرىشتان (تۇنبادان) جاسالاتىن ماسكالار رەتسەپتىنىڭ قۇرامىنا قاراماستان مۇنداي ماسكالاردى اپتاسىنا 2 رەتتەن ارتىق جاساۋعا بولمايدى. بۇرىش تۇنباسىن جوعارىدا جازىلعان رەتسەپت بويىنشا ءوزىڭىز دايىنداۋعا نەمەسە ءدارىحانادان ساتىپ الۋعا بولادى. ەندەشە، قىزىل بۇرىشتان جانە ونىڭ تۇنباسىنان دايىندالاتىن بىرنەشە ماسكانى ۇسىنامىز.
شاش وسىرۋگە ارنالعان ماسكا. 25 م ل بۇرىش تۇنباسىن 1 اس قاسىق وشاعان مايىمەن ارالاستىرادى. وسى قوسپانى باس تەرىسىنە جاعىپ، باستى جىلى سۇلگىمەن وراپ تاستاۋ كەرەك. جاقسى ناتيجە بولۋ ءۇشىن سۇلگىنىڭ سىرتىنان فەنمەن ءسال قىزدىرعان ءجون. ماسكانى 30 مينۋتتان 2 ساعاتقا دەيىن ۇستاۋعا بولادى. سودان سوڭ سۋسابىنمەن جۋىپ تاستايسىز.
شاش تۇسۋگە قارسى ماسكا. 1 شاي قاسىق ۇنتاقتالعان قۇرعاق قىزىل بۇرىشتى شاشىڭىزعا قاجەتتى مولشەردەگى بالمەن ارالاستىرادى. قوسپانى باس تەرىسىنە ۋقالاي جاعادى. باسىڭىزدى جىلى سۇلگىمەن وراپ، قوسىمشا فەنمەن قىزدىرىڭىز. شاشىڭىزدى 30 مينۋتتان سوڭ جۋىڭىز. شاشتى قاتايتاتىن ماسكا. 2 اس قاسىق بۇرىش تۇنباسىنا 2 اس قاسىق مايلى ايران قوسادى. قوسپانى ازداپ قىزدىرىپ، قۇرعاق باس تەرىسىنە جاعادى. باستى سۇلگىمەن وراپ، 2-3 ساعات ۇستايدى. سودان سوڭ شاشىڭىزدى سۋسابىنمەن جۋىپ تاستاڭىز. بۇل ماسكاعا 1 شاي قاسىق قۇرعاق قىشا دا قوسۋعا بولادى.
Massaget.kz