قازاقستاندىقتار اۋا رايى بولجامىن ۆيدەو ارقىلى ءبىلىپ وتىرادى

قازاقستان بويىنشا الداعى ءۇش تاۋلىككە ارنالعان اۋا رايى بولجامى كۇندەلىكتى ۆيدەو، اۋديو تۇرىندەگى جاڭا فورماتتا (ۇزاقتىعى - 1 مين) بەرىلەدى.

«وندا عارىشتان سۋرەتتەر جانە اۋا رايىن بولجاۋدىڭ سيفرلىق ادىستەرى پايدالانىلادى. بولجام مەملەكەتتىك جانە ورىس تىلدەرىندە «قازگيدرومەتتىڭ» رەسمي سايتىندا جانە الەۋمەتتىك جەلىلەردەگى پاراقشالارى - Instagram, VKontakte, Facebook-كە سالىنىپ وتىرادى. الداعى ءۇش كۇنگە ارنالعان كۇندەلىكتى بولجام ساعات 19.00-گە دەيىن شىعادى» دەلىنگەن حابارلامادا.

جاڭا فورماتتىڭ ماقساتى - حالىقتى ەرتەڭ قانداي اۋا رايى كۇتىپ تۇرعانى جايلى اقپاراتتاندىرۋ، جىلى كيىنۋ كەرەك پە، الدە قولشاتىر الۋ كەرەك پە، نەمەسە ىستىق اۋا رايىنا دايىندالۋ قاجەت پە - سول جايىندا اقپارات بەرىپ وتىرۋ.

سونداي- اق، «قازگيدرومەت» سينوپتيكتەرى قازاقستان تۇرعىندارىنىڭ قاۋىپسىزدىگى ءۇشىن ۆيدەو، اۋديو ارقىلى ءقاۋىپتى تابيعي قۇبىلىستار تۋرالى (نوسەر جاۋىن، كۇشتى جەل، نايزاعاي، داۋىل، بۇرقاسىن، شاڭدى داۋىل، ۇسىك، تۇمان، بۇرشاق، تەمپەراتۋرانىڭ كۇرت تومەندەۋى/كوتەرىلۋى) اقپاراتتاندىراتىن بولادى.