ارىس تۇرعىندارىنا ەلىمىزدىڭ ءار وڭىرىنەن گۋمانيتارلىق كومەك رەتىندە جەتكىزىلگەن كيىم-كەشەك پەن ازىق-تۇلىكتى تاراتىلۋدا.
«ارىس، ءبىز بىرىگەمىز» اكسياسى اياسىندا ەلىمىزدىڭ بارلىق تۇرعىندارىنان ۇلكەن كومەك كورسەتىلدى. پاۆلودار وبلىسىنان 91 توننا ءتۇرلى قاجەتتى زاتتاردى الىپ كەلدىك، باسىم بولىگى ازىق-تۇلىك. پاۆلودارلىقتار ءبىر اۋىزدان اتسالىسىپ قولدارىنان كەلگەن كومەكتى ايامادى»، - دەيدى كاسىپكەر باۋىرجان بەكمىرزايەۆ.
ارىسقا ورالعان جەرگىلىكتى تۇرعىندار ەڭ الدىمەن بارشا قازاقستاندىقتارعا كومەك كورسەتكەندەرى ءۇشىن العىستارىن ءبىلدىردى. كەيبىر تۇرعىندار ءوز ۇيلەرىنىڭ جاي-كۇيىن تەكسەرىپ جاتتى.
«مەن جارىلىس بولعان كۇنى الماتىدا ەدىم. ءبىراق ۇيدە تۋىسقاندارىم، بالالار، نەمەرەلەرىمدى قوسقاندا 10 شاقتى ادام بولدى. ەكى نەمەرەم بالاباقشادا بولاتىن. ولاردى كورشىلەرىم الىپ كەتىپتى. سوندىقتان ول كىسىلەرگە ايتار العىسىم شەكسىز. ءبىزدىڭ قايعىمىزعا ورتاقتاسىپ، باسىمىزعا قيىندىق تۇسكەن كەزدە بۇكىل قازاقستاندىق كومەككە كەلدى. سوعان ريزامىن. اكىمدىكتەن ادامدار كەلىپ، ءۇيدى قايتا قالپىنا كەلتىرىپ بەرەمىز دەپ جاتىر»، - دەيدى ارىس قالاسىنىڭ تۇرعىنى قانات سيقىم.
بۇگىن كوممۋنالدىق شارۋاشىلىق قىزمەتىنىڭ ماماندارى ارىس قالاسىنداعى ەلەكتر جەلىسى مەن اۋىز سۋ جۇيەلەرىن ىسكە قوسۋدا. سونداي-اق، ارىس ستانساسىنداعى بارلىق باعىتتار بويىنشا تەمىر جول قاتىناسى قالپىنا كەلتىرىلدى.
ۆەتەريناريا قىزمەتى دەزينفەكتسيالاۋ ماقساتىندا ولگەن ءۇي جانۋارلارىن تاۋىپ، ونى جويۋ جۇمىستارىن جۇرگىزۋدە. سونداي-اق، 2019-جىلدىڭ 27-ماۋسىمىنان باستاپ دەنساۋلىق ساقتاۋ مينيسترلىگىنىڭ سانيتارلىق-ەپيدەميولوگيالىق قىزمەتى 155 ادام مەن 22 بىرلىك تەحنيكا بويىنشا 41 ۋچاسكەدە تەكسەرۋ جانە دەزينفەكتسيالىق جۇمىستار جاسالدى.