«بۇل - ءبىر رەتتىك اكسيا، اتراكسيون نەمەسە مەملەكەتتىڭ ەشكىم ەستىمەگەن شەتتەن تىس جومارتتىعى ەمەس. پراگماتيكالىق ءارى ويلى قادام. بۇل مۇقتاج ادامدارعا كومەك قانا ەمەس، نەسيەلىك-قارجىلىق جۇيەنىڭ جۇمىسىن جاقسارتۋ ەكەنىن ەسكەرۋ كەرەك. جۋىق ارادا ۇلتتىق بانك ەكىنشى دەڭگەيلى بانكتەر حالىققا نەسيە بەرۋ كەزىندە زايم الۋشىلاردىڭ جەتكىلىكتى دارەجەدە قاۋقارلى ەكەنىن ەسەپكە الاتىنداي جۇمىس جۇرگىزەدى. بۇل شارالار «جۇمىس ىستەمەيتىن» نەسيەلەردىڭ ۇلەسىن ايتارلىقتاي ازايتىپ، حالىقتىڭ نەسيەگە باتۋ ماسەلەسىن دە شەشەدى. ال بۇل وزەكتى پروبلەما»، - دەدى داۋرەن ابايەۆ «حابار» ارناسىنداعى «اشىق ديالوگ» باعدارلاماسىندا.
ءمينيستردىڭ ايتۋىنا قاراعاندا، بانكتەر حالىققا وڭدى-سولدى نەسيەلەردى بەرە بەرمەيتىن شارا قاراستىرىپ جاتقانىن اتاپ ءوتتى.
«بانكتەر حالىقتى نەسيەلىك «كارتاعا» وتىرعىزباۋى كەرەك. مىنە، قاسىم-جومارت توقايەۆتىڭ جارلىعىنىڭ ءمانى وسىندا. بۇل شارانى قولعا الماس بۇرىن ءبىز شىنىندا دا، ومىرلىك قيىن جاعدايدا قالعان ازاماتتارعا قول ۇشىپ سوزۋىمىز كەرەك. مەملەكەت «جامان» نەسيەلەردى سىزىپ تاستايدى. مەنىڭ ويىمشا، بۇل پرەزيدەنتتىڭ وتە جىگەرلى ءارى پراگماتيكالىق، الەۋمەتتىك تۇرعىدا ولشەنگەن شەشىمى»، - دەدى مينيستر.
ايتا كەتسەك، كەشە ق ر پرەزيدەنتى قاسىم-جومارت توقايەۆ «قازاقستان رەسپۋبليكاسى ازاماتتارىنىڭ قارىز جۇكتەمەسىن ازايتۋ تۋرالى» جارلىققا قول قويعان بولاتىن.
ەلىمىزدەگى الەۋمەتتىك تۇرمىسى تومەن توپتاعى ازاماتتار - كوپبالالى وتباسىلار، مۇگەدەك بالالارى بار وتباسىلار، جالعىز اسىراۋشىسىنان ايىرىلعان وتباسىلار، اتاۋلى الەۋمەتتىك كومەك الاتىندار جانە جەتىم بالالار ءتۇرلى سەبەپتەرمەن قيىن جاعدايعا تاپ بولىپ، ءوز اتتارىنا العان نەسيەلىك مىندەتتەمەلەرىن ورىنداي الماي وتىر.
تىكەلەي جانە اتاۋلى قارجىلاي كومەك رەتىندە جوعارىدا اتالعان ساناتتاعى ازاماتتار ءۇشىن مەملەكەت ەكىنشى دەڭگەيلى بانكتەر مەن شاعىن قارجى ۇيىمدارىنان الىنعان جالپى مولشەرى 300 مىڭ تەڭگەگە دەيىن نەگىزگى نەسيەنى جانە وعان ەسەپتەلگەن سىياقىنى وتەيدى.