«قازاقستان» تەلەارناسىنىڭ پاۆلودار وبلىستىق فيليالىنىڭ فەيسبۋكتە تاراعان ۆيدەو ماتەريالىنا قاراعاندا، بالالارعا وڭتۇستىكتەن كەلىپ، پاۆلوداردا ءبىلىم الىپ جاتقان ستۋدەنتتەر جەتەكشىلىك ەتەدى. ياعني، ۇيدەن جىراققا شىققان جەتكىنشەكتەر جابىرقاپ، جات جەردى توسىرقاماۋى ەسكەرىلگەن.
«كوپبالالى، باسقا دەپ مارتەبەگە بولمەدىك. تەك ارىس قالاسىنان بولسا بولعانى. سەبەبى، قانداي جاعدايعا بايلانىستى بولسا دا، وتباسىلىق جاعدايى قانداي بولسا دا، ءبىز ارىستان شىعۋعا، پاۆلودارعا كەلۋگە نيەتى بولسا الىپ كەلدىك»، - دەدى تەلەارناعا سۇحبات بەرگەن پاۆلودار وبلىستىق ءبىلىم بەرۋ باسقارماسىنىڭ باستىعى ءدىنيسلام بولاتحان ۇلى.
ارىستان كەلىپ جەتكەن جاس جەتكىنشەكتەردى وبلىس اكىمىنىڭ ورىنباسارى اسحات ورالوۆ قارسى العان.
«ارىس بالالارىنا پاۆلودارلىقتاردىڭ قوناقجايلىعىن، جەرگىلىكتى جاسىباي، سابىندىكول مەن تورايعىر كولدەرىنىڭ، جالپى تابيعاتىمىزدىڭ سۇلۋلىعىن تانىتۋىمىز قاجەت. وعان قوسا، قوناقتارىمىز ءبىزدىڭ ءوڭىردىڭ باي تاريحي- مادەني مۇرالارىمىزبەن تانىسۋى كەرەك. وبلىس باسشىلىعى اتىنان سىزدەرگە وسى 15 كۇندىك دەمالىق مازمۇندى، قىزىقتى وتۋىنە تىلەك بىلدىرەمىز. ءبىز، ءوز كەزەگىمىزدە، سىزدەرگە بارىنشا جاعداي جاساۋعا تىرىسامىز»، - دەيدى اسحات ورالوۆ.
وبلىستىق ءبىلىم بەرۋ باسقارماسىنىڭ مالىمەتىنشە، ارىس بالالارى ءۇشىن باياناۋىل اۋدانىنداعى «جاس داۋرەن»، شارباقتى اۋدانىنداعى «چايكا»، پاۆلودار اۋدانىنداعى «بالداۋرەن» جانە بەلوۆكا اۋىلىنداعى «قازحروم» لاگەرلەرى جۇمىس ىستەيدى.