«نەسيەلەردى كەشىرۋ ءبىز ءۇشىن ۇلكەن كومەك. اسىراۋشىمىزدان ايىرىلىپ، ءوزىم ەكى بالا باعىپ وتىرمىن. قازىر ەكەۋى دە ستۋدەنت، جاقسى وقيدى. بالالارىم ءۇشىن 1 ميلليون تەڭگە نەسيە الىپ ەدىم. اي سايىنعى تولەمىم - 70 مىڭ تەڭگە. ۋاقىتىلى تولەۋ قيىن بولعان سوڭ وتەۋ مەرزىمىن ۇزارتىپ، 41 مىڭ تەڭگەگە ەسەپتەتىپ الدىم. ءبىر قيىنى، 1 ميلليون تەڭگە الساڭ، تاعى 1 ميلليون تەڭگە قوسىپ قايتاراسىڭ»، - دەدى اقتوبەلىك ءلاززات جۇماعاليەۆا.
ول ەدەن جۋۋشى بولىپ جۇمىس ىستەيدى، كەيدە پاتەر جوندەۋ جۇمىستارىن جۇرگىزەدى. جارلىق تۋرالى ەستىگەندە بىردەن اقتوبەلىك انالارعا حابار بەرىپ، اقپاراتتى تاراتىپ جىبەرگەن.
«اقتوبەلىك كوپبالالى، مۇقتاج وتباسىلار ءبىر-بىرىمەن حابارلاسىپ، ەلدەگى جاڭالىقپەن ءبولىسىپ وتىرادى. تاياۋدا جۇمىستا 5 مىڭ تەڭگە سىياقى بەردى. ورتاق چاتتا انالارىمىزدىڭ ءبىرى «بالالاردىڭ جەيتىن تاماعى جوق» دەپ جازىپ، سول سىياقىعا ازىق-تۇلىك ساتىپ الىپ، اپارىپ بەردىم. جانى قينالعان ادامداردى كورسەم ءوزىم قينالامىن. سوندىقتان نەسيەنى كەشىرۋ ۇلكەن كومەك»، - دەدى ءلاززات جۇماعاليەۆا.
ەسكە سالساق، كەشە مەملەكەت باسشىسى كوپبالالى، اسىراۋشىسىنان ايىرىلعان وتباسىلار مەن جەتىم، اتا-انا قامقورلىعىنسىز قالعانداردىڭ، اتاۋلى الەۋمەتتىك كومەك الاتىنداردىڭ جانە مۇگەدەك بالا اسىراپ وتىرعانداردىڭ نەسيەسىن كەشىرۋ تۋرالى جارلىق شىعاردى.