مينيسترلىك باسشىسى تۇرعىنداردى قاۋەسەتكە سەنبەۋگە جانە ارانداتۋشىلىققا بوي الدىرماۋعا شاقىردى.
«ارىستى قالپىنا كەلتىرۋ پرەزيدەنت قاسىم- جومارت توقايەۆتىڭ جەكە باقىلاۋىندا. قالانى، الەۋمەتتىك نىسانداردى، تۇرعىن ءۇي مەن ينجەنەرلىك ينفراقۇرىلىمدى جوندەۋ جانە قالپىنا كەلتىرۋ ءۇشىن بارلىق قاجەتتى قاراجات ءبولۋ تۋرالى ۇكىمەتكە ءتيىستى تاپسىرما بەرىلدى. سىزدەردەن ارانداتۋشىلىققا بوي الدىرماۋلارىڭىزدى جانە قاۋسەتكە سەنبەۋلەرىڭىزدى سۇرايمىن. ۇكىمەت پەن جەرگىلىكتى ورگاندار تاراپىنان قاجەتتى ماسەلەلەردىڭ بارلىعى شەشىلۋدە»، - دەدى مينيستر.
مينيستر قيىن ساتتە بۇكىل قازاقستان ارىس تۇرعىندارىنا قولداۋ كورسەتەتىپ جاتقانىن اتاپ ءوتتى.
«ەلىمىزدىڭ تۇكپىر-تۇكپىرىندەگى ازاماتتاردان كومەك كەلىپ تۇسۋدە. بارلىق قاراجات پەن گۋمانيتارلىق كومەك سىزدەرگە اشىق جانە ءادىل تۇردە ءبولىنىپ بەرىلەتىن بولادى. بۇل ءۇشىن قۇرامىنا سىزدەردىڭ وكىلدەرىڭىز كىرەتىن قوعامدىق كوميسسيا قۇرىلادى. بۇل ماسەلە ەرەكشە باقىلاۋدا»، - دەدى ەڭبەك ءمينيسترى ارىستىقتارعا قاراتىپ ايتقان سوزىندە.
سونىمەن قاتار، اسكەري ءبولىمنىڭ ارىس قالاسىنان كوشىرىلەتىندىگىن دە ايتتى.
«پرەزيدەنتتىڭ تاپسىرماسىمەن اسكەري ءبولىمدى ارىس قالاسىنان قاۋىپسىز جەرگە كوشىرۋ ماسەلەسىن شەشەتىن كوميسسيا جۇمىس ىستەپ جاتىر. باستى مىندەت - بولاشاقتا اپاتتىڭ قايتالانۋىنا جول بەرمەۋ. ەكولوگيالىق جاعداي دا نازاردان تىس قالمايدى. جاقىن ارادا جاعداي قالپىنا كەلەدى، سول سەبەپتى سىزدەردى سابىرلىق پەن شىدامدىلىققا شاقىرامىن»، - دەدى ب. ساپاربايەۆ.
ساپار بارىسىندا ەڭبەك ءمينيسترى ارىس قالاسىنداعى جارىلىس كەزىندە زارداپ شەككەندەر ەم الىپ جاتقان №35-مەديتسينالىق جەدەل- جاردەم اۋرۋحاناسى مەن №1-بالالار اۋرۋحاناسىنا باردى. مينيستر دارىگەرلەرمەن جانە جاراقاتتانعاندارمەن اڭگىمەلەسىپ، زارداپ شەككەندەردىڭ تەز ارادا ساۋىعىپ كەتۋىنە تىلەكتەستىك ءبىلدىردى. سونداي-اق، ب. ساپاربايەۆ ارىس قالاسىنىڭ تۇرعىندارىنىڭ قازىرگى ۋاقىتتاعى جاي-كۇيىمەن تانىسۋ ءۇشىن ولاردى ۋاقىتشا ورنالاستىرعان «دارىن» مەكتەپ-ينتەرناتىندا، بالالار ۇيىندە جانە №89-ورتا مەكتەپتە بولدى.