بۇنداي پىكىردى ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.
«وتكەن 30 جىلعا تالداۋ جاساساق، تاريح ءۇشىن اسا كوپ ەمەس كەزەڭ، ءبىراق سوعان قاراماستان ءبىرقاتار ەكونوميكالىق جانە ساياسي رەفورمالاردى ءساتتى وتكىزۋگە مۇمكىن بولدى. سونىمەن قاتار، نارىقتىق ەكونوميكاسى بار مەملەكەتتى قۇرۋ جولىندا ەلەۋلى تابىستارعا قول جەتكىزە الدىق. تاۋەلسىزدىكتىڭ العاشقى كۇندەرىنەن باستاپ تەڭدەستىرىلگەن ىشكى ءارى سىرتقى ساياساتتى جۇرگىزۋدە ەلباسى باسىمدىقتاردى دۇرىس ايقىنداعانىن اتاپ وتكەن ءجون»، - دەدى مينيستر.
ن. نازاربايەۆ سىرتقى ساياساتتى دا سالماقتى جۇرگىزگەنىنە توقتالعان بەردىبەك ساپاربايەۆ، تۇڭعىش پرەزيدەنت قازاقستاننىڭ ەكونوميكالىق جانە گەوساياسي مۇددەسى نەگىزىندە الپاۋىت مەملەكەتتەرمەن ىنتىماقتاستىق ورناتقانىن، سونىڭ ناتيجەسىندە بۇگىندە حالىقارالىق ارەنادا ەلىمىز بەدەلدى رولگە يە بولعانىن اتاپ ءوتتى.
ونىڭ ايتۋىنشا، تاۋەلسىز قازاقستاننىڭ تاريحىندا ەلباسىنىڭ ەسىمى جۇزەگە اسىرىلعان اۋقىمدى ستراتەگيالىق جوبالارمەن ەستە قالادى. وسى ورايدا ە ق ى ۇ سامميتى، «ەكسپو-2017» حالىقارالىق كورمەسى، ب ۇ ۇ قاۋىپسىزدىك كەڭەسىندەگى ءتوراعالىق، سيرياداعى بەيبىتشىلىك ءۇشىن كەلىسسوزدەردى جۇرگىزۋ جانە باسقا دا ماڭىزدى وقيعالار بار.
«تۇڭعىش پرەزيدەنتتىڭ ماڭىزدى جوبالارىنىڭ ءبىرى جاڭا ەلوردانى كوشىرۋگە، الەمدىك دەڭگەيدەگى قالا قۇرىلىسىنا دا قاتىستى. ەلباسى جاڭا ەلوردانىڭ اۆتورى ەكەنى بارشاعا ايان. بۇگىندە بۇل شاھار XXI عاسىرداعى بىرەگەي ءارى اسەم استاناعا اينالىپ، تاۋەلسىز قازاقستاننىڭ سيمۆولى بولدى»، - دەدى ب. ساپاربايەۆ.
ەڭبەك ءمينيسترىنىڭ پايىمىنشا، ن. نازاربايەۆ الداعى ۋاقىتتا دا ەلدىڭ دامۋى جولىندا ءوزىنىڭ ۇلەسىن قوسۋعا ايرىقشا ءمان بەرەدى.
«ەلباسى حالىقتىڭ ءال-اۋقاتىن ارتتىرۋ باعىتىنا ۇنەمى ەرەكشە نازار اۋدارۋدا. سوندىقتان ەڭ قيىن دەگەن كەزەڭدەردىڭ وزىندە مەملەكەت ازاماتتار الدىنداعى ءوزىنىڭ الەۋمەتتىك مىندەتتەمەلەرىن ءارقاشان ورىنداپ كەلدى»، - دەدى بەردىبەك ساپاربايەۆ.