«اقمولا - ادالدىق الاڭى» جوبالىق كەڭسەسىنىڭ باسشىسى ساميرا تايتەنوۆا وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
ونىڭ ايتۋىنشا، بۇگىنگى جاستار ەكونوميكالىق، مادەني جانە ساياسي تۇراقتىلىعى ءبىر- ءبىرىن سەرپىندى الماستىراتىن وقيعالارعا تولى ەلدە ءومىر ءسۇرىپ جاتىر. بۇگىندە قازاقستاندىقتاردىڭ ءال-اۋقاتىن ارتتىرۋ، حالىقتىڭ تابىسىن كوتەرۋ - باستى ماقسات.
«مەملەكەت باسشىسى قاسىم-جومارت توقايەۆ جەمقورلىققا قارسى ءىس-قيمىل ماسەلەسىنە ەرەكشە ءمان بەرىپ وتىر. قازىرگى كەزدە «جەمقورلىقتان ادا وڭىرلەر» جوباسى جۇزەگە اسىرىلۋدا. اقمولا وبلىسىندا بۇل جوبا «اقمولا - ادالدىق الاڭى» اتاۋىمەن بەلگىلى. بۇل جوبا تۇرمىستىق جەمقورلىق دەڭگەيىن ازايتۋعا، مەملەكەتتىك قىزمەتتەردىڭ ساپاسىن ارتتىرۋعا، ازاماتتار ءۇشىن جايلى جانە كەدەرگىسىز جاعداي جاساۋعا جانە باسشىلاردىڭ جاۋاپكەرشىلىگىن ارتتىرۋعا باعىتتالعان»، - دەيدى ول.
ونىڭ سوزىنشە، جەمقورلىق رۋحاني قۇندىلىقتار داعدارىسى جاعدايىندا، ماتەريالدىق يگىلىك رۋحاني يگىلىكتەن قىمبات بولعان جاعدايدا تۋىندايدى. وسى سەبەپتى «اقمولا - ادالدىق الاڭى» جوباسىنىڭ قىزمەتىندە جەمقورلىققا قارسى قۇندىلىقتاردى دارىپتەۋ، ازاماتتاردىڭ جەمقورلىققا قارسى جوعارى مادەنيەتىن قالىپتاستىرۋ، قۇقىقتىق ساۋاتىن ارتتىرۋ بويىنشا جۇمىسقا زور ءمان بەرىلەدى.
«بۇگىنگى تاڭدا ق ر پرەزيدەنتى قاسىم-جومارت توقايەۆ سىبايلاس جەمقورلىققا قارسى كۇرەس بويىنشا تۇزەتۋلەر پاكەتىن ازىرلەۋدى تاپسىردى. پرەزيدەنت ءوز سوزىندە «ومىردە ەڭ باستىسى - ادامنىڭ پاراساتى، ءبىلىمى، جوعارى كاسىپقويلىعى جانە ءوز وتانىنا ادالدىعى» دەپ اتاپ وتكەن ەدى.
شىنىمەن دە مەنى، جاستار وكىلى رەتىندە «جاستار - پروگرەسس قوزعالتقىشى» دەگەن مەسسەدج شابىتتاندىرادى. ءبىز - قازاقستاننىڭ جاس ۇرپاعى، قازاقستاننىڭ دامۋىندا شەشۋشى ءرول اتقارىپ، پروگرەستىڭ قوزعاۋشى كۇشى بولۋىمىز كەرەك. ەلباسى 2019 -جىلدى جاستار جىلى دەپ جاريالادى. وسىعان وراي، ارنايى جوبا جۇمىس ىستەي باستادى. «جاس كاسىپكەر» جاستاردىڭ بيزنەس باستامالارىنىڭ باعدارلاماسى ىسكە اسىرىلۋدا، جاستاردىڭ ستارتاپ جوبالارىنا بەلسەندى قولداۋ كورسەتىلۋدە. بۇگىنگى كۇنى ءارقايسىسىمىز ەڭ ۇلكەن ارمانىمىزدى جۇزەگە اسىرا الامىز جانە ءوزىمىزدىڭ جەكە تابىس جولىمىزدى ءجۇرىپ وتۋگە مۇمكىندىگىمىز بار. تەك ماقساتكەرلىك، ەڭبەكقورلىق جانە كرەاتيۆ قاجەت»، - دەيدى ساميرا تايتەنوۆا.