بۇل تۋرالى ق ر ورتالىق سايلاۋ كوميسسياسىنىڭ ءتوراعاسى بەرىك يماشەۆ ءمالىم ەتتى، دەپ حابارلايدى قازاقپارات ءتىلشىسى.
كەشەگى ق ر و س ك-نىڭ اشىق وتىرىسىندا 2019 -جىلعى 9 -ماۋسىمدا بولعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنىڭ قورىتىندىلارىن انىقتاۋ تۋرالى قاۋلى قابىلداندى.
«بۇگىن ءبىز ەلىمىزدە سوڭعى ەكى اي بويى جالعاسقان سايلاۋ ناۋقانىن اياقتادىق. بارلىق دەڭگەيدەگى سايلاۋ ورگاندارىمەن 2019 -جىلعى 9 -ماۋسىمعا بەلگىلەنگەن كەزەكتەن تىس ق ر پرەزيدەنتىنىڭ سايلاۋىن وتكىزۋدى ۇيىمداستىرۋ تۋرالى قازاقستان پرەزيدەنتىنىڭ جارلىعىن ورىنداۋ قامتاماسىز ەتىلدى. سايلاۋدىڭ سوڭعى ناتيجەسى بەلگىلەندى، قازاقستان پرەزيدەنتى سايلاندى. بارلىقتارىڭىزدى وسى مەملەكەتتىك ماڭىزى بار وقيعامەن قۇتتىقتايمىن!»، - دەدى بەرىك يماشەۆ.
وسى ورايدا، ول سايلاۋدى ۇيىمداستىرۋ شارالارىنا قاتىسقاندارعا، حالىقارالىق جانە ۇلتتىق بايقاۋشىلارعا، سونداي-اق بەلسەندى ازاماتتىق پوزيتسياسى ءۇشىن سايلاۋشىلارعا العىسىن ايتتى.
بۇدان بۇرىن حابارلانعانداي، ق ر ورتالىق سايلاۋ كوميسسياسى 2019 -جىلدىڭ 9 -ماۋسىمىندا وتكەن كەزەكتەن تىس پرەزيدەنتتىك سايلاۋىنىڭ قورىتىندىسىن شىعاردى.
«جامبىل احمەتبەكوۆكە 167649 داۋىس بەرىلدى نەمەسە ول سايلاۋشىلاردىڭ 1,82 پروتسەنت داۋىسىن الدى. دانيا ەسپايەۆا 465714 نەمەسە بارلىق سايلاۋشىلاردىڭ 5,05 پروتسەنت داۋىسىن الدى. ءامىرجان قوسانوۆ 1495401، ياعني بارلىق سايلاۋشىلاردىڭ 16,23 پروتسەنتىن، تولەۋتاي راحىمبەكوۆ 280451 نەمەسە سايلاۋشىلاردىڭ 3,04 پروتسەنتىن جينادى. سوندا- اق امانگەلدى تاسپيحوۆقا 182898 داۋىس بەرىلدى، بۇل داۋىس بەرۋگە قاتىسقان سايلاۋشىلاردىڭ 1,98 پروتسەنتى، قاسىم-جومارت توقايەۆقا 6539715 داۋىس نەمەسە سايلاۋشىلاردىڭ 70,96 پروتسەنتى داۋىس بەردى. ءسادى-بەك تۇگەل 84542 نەمەسە سايلاۋشىلاردىڭ 0,92 پروتسەنت داۋىسىن الدى.