كوميتەت ءتوراعاسى ۆلاديمير بەككەردىڭ سوزىنە سۇيەنسەك، زاڭ بويىنشا توتەنشە جاعداي قىزمەتىنىڭ وكىلدەرى سايلاۋ ۋچاسكەلەرىندە كەزەكشىلىك ەتە المايدى. سول ءۇشىن ولار سايلاۋ ۋچاسكەسى ورنالاسقان عيماراتتاردىڭ ماڭايىندا باقىلاۋ جۇرگىزەتىن بولادى. ىشتەگى جاعدايدى ارا-تۇرا كىرىپ باقىلاماق.
«7 ماۋسىمنان باستاپ ىشكى ىستەر مينيسترلىگىنىڭ جەكە قۇرامى تۇگەلدەي كۇشەيتىلگەن رەجىمگە كوشىرىلەدى. ال توتەنشە جاعداي كوميتەتىنىڭ باقىلاۋىنا 9900 دەن استام داۋىس بەرۋ ۋچاسكەسى بەرىلگەن. ونىڭ 458 ى - جابىق تيپتەگى نىساندار. ءار ۋچاسكەگە ءبىر قىزمەتكەر بەكىتىلگەن. سايلاۋ كۇنى داۋىس بەرۋشىلەر كەلگەنشە ءار قىزمەتكەر ءوزى جاۋاپتى ۋچاسكەنى سوڭعى رەت تەكسەرىپ، قاۋىپسىزدىك ەرەجەلەرى ساقتالعانىنا كوز جەتكىزەتىن بولادى»، - دەيدى كوميتەت باسشىسى.
ول سونداي-اق، سايلاۋدىڭ جازدا ءوتۋى توتەنشە جاعداي وكىلدەرىنىڭ جۇمىسىن ءبىرشاما جەڭىلدەتكەنىن ايتادى.
«بىزگە قىس كەزىندە سايلاۋدى قاداعالاۋ قيىنىراق سوعاتىن. ويتكەنى جىلىتۋ نىساندارى مۇلتىكسىز جۇمىس ىستەۋى كەرەك. كەيبىر ۋچاسكەلەردە قوسىمشا جىلىتۋ قوندىرعىلارى قويىلادى. ونىڭ ءبارى قوسىمشا تاۋەكەل بولاتىن ءبىز ءۇشىن. ال جازدا بۇل جاعىنان الدەقايدا جەڭىل»، - دەيدى كوميتەت ءتوراعاسى.